Read Iloko Leviticus 2 Bible Online

Leviticus 2 - Iloko bible

Leviticus 2

¹No adda mangidatag iti daton a makan iti Apo, umuna pay nga aramidenna nga arina a nafino. Ikkanna daytoy iti lana ti olibo ken insenso

²sana ipan kadagiti papadi a kapuonan ni Aaron. Mangrakem ti padi iti arina ken iti lana ken amin nga insenso sana puoran iti rabaw ti altar a mangipakita a naidatonna amin iti Apo. Makaay-ayo ken nabanglo daytoy a daton iti Apo.

³Kukua dagiti papadi ti natda iti daton a makan. Sagrado unay daytoy agsipud ta paset ti naidaton iti Apo.

⁴No tinapay a naluto iti urno ti maidaton, masapul nga awan lebadurana ti maidatag. Mabalin a napuskol a tinapay a nalaokan iti lana ti olibo wenno naiingpis a kankanen a napulagidan iti lana ti olibo.

⁵No tinapay a naluto iti pariok ti maidaton, masapul a maaramid iti arina a nalaokan iti lana ti olibo, ngem awan ti lebadurana.

⁶Mapispisi ti tinapay sa mabuyatan iti lana no maidatag a kas daton a makan.

⁷No tinapay a naluto iti kaserola ti maidaton, masapul a maaramid iti arina ken lana ti olibo.

⁸Idatonmo daytoy iti Apo, ket yawatmo iti padi a mangipan iti altar.

⁹Mangalanto ti padi iti sangkabassit a mangipakita a naidatag amin iti Apo, ket puoranna iti altar. Nabanglo ken makaay-ayo daytoy a daton iti Apo.

¹⁰Kukua dagiti papadi ti natda iti daton. Sagrado unay daytoy agsipud ta naggapu iti naidaton iti Apo.

¹¹Masapul nga awan lebadurana dagiti makan nga idatonyo iti Apo. Diyo laokan iti lebadura wenno diro ti makan nga idatonyo iti Apo.

¹²Masapul a maidaton iti Apo ti umuna a trigo a maapityo iti tunggal tawen, ngem diyo puoran iti altar.

¹³Asinanyo dagiti amin a daton a makan, agsipud ta ti asin ti mangibagi iti tulagyo iti Dios. (Masapul nga asinam dagiti amin nga idatonmo.)

¹⁴No mangidatagkayo iti Apo iti daton nga agtaud kadagiti umuna a maapit iti trigo, masapul nga iniruban wenno nalebbek a trigo.

¹⁵Ikkanyo iti lana ti olibo ken insenso.

¹⁶Puoran ti padi ti paset ti nalebbek a trigo ken ti lana a mangipakita a naidaton amin, kasta met ti amin nga insenso a kas daton iti Apo.