Read Iloko Leviticus 24 Bible Online

Leviticus 24 - Iloko bible

Leviticus 24

¹Imbaga ni Yahweh ken ni Moises

²a bilinenna dagiti Israelita a mangalada iti kasayaatan a lana ti olibo para kadagiti pagsilawan iti Tolda, tapno adda silaw a kanayon a sigagangat sadiay.

³Rinabii a gangtan ida ni Aaron ket pagpatpatnagenna a sigagangat iti imatang ti Apo iti ruar ti kurtina iti sangoanan ti Lakasa ti Tulag nga adda iti Kasasantoan a Lugar. Maannurot daytoy nga alagaden iti agnanayon.

⁴Aywanan ni Aaron dagiti pagsilawan iti kandelero a puro a balitok tapno agtalinaedda a sigagangat iti imatang ti Apo.

⁵Mangalakayo iti 12 a kilo nga arina ket manglutokayo iti sangapulo ket dua a tinapay.

⁶Maurnos dagitoy iti dua nga intar—innem a tinapay iti tunggal intar—iti rabaw ti lamisaan a nakalupkopan iti puro a balitok iti imatang ti Apo.

⁷Iti tunggal intar, mangikabilkayo iti puro nga insenso a nayon ti tinapay a kas daton a mapuoran a panglagip iti Apo.

⁸Masapul a maikabil a kankanayon ti tinapay iti imatang ti Apo iti tunggal Aldaw a Panaginana. Agnanayon daytoy nga alagaden ti Israel.

⁹Kukua ni Aaron ken dagiti kaputotanna ti tinapay. Masapul a kanenda daytoy iti nasantoan a lugar agsipud ta nasantoan unay daytoy a paset ti daton a naidatag iti Apo nga agpaay kadagiti papadi.

¹⁰Adda maysa a lalaki nga Egipcio ti amana ken Israelita ti inana. Selomit ti nagan ti inana nga anak ni Dibri iti tribu ti Dan. Simrek ti lalaki iti kampo ket nakiriri iti maysa nga Israelita. Bayat ti panagririda, inlunodna ni Yahweh; iti kasta, indatagda ken ni Moises.

¹²Pinaguardiaan ni Moises ket inurayda ti pangngeddeng ni Yahweh no ania ti maaramid kenkuana.

¹³Kinuna ni Yahweh ken ni Moises,

¹⁴“Iruaryo dayta a lalaki iti kampo. Amin a nakangngeg iti panangilunodna ipatayda ti imada iti ulona ket kalpasanna, batoen ti entero a gimong agingga a matay.

¹⁵Ibagam kadagiti Israelita a no adda mangilunod iti Dios, masapul a sagabaenna ti dusa

¹⁶ket mapapatay. Siasinoman a mangilunod ken ni Yahweh, Israelita man wenno ganggannaet, masapul a batoen ti entero a gimong agingga a matay.

¹⁷“Mapapatay ti siasinoman a pumatay iti padana a tao.

¹⁸Ti siasinoman a mangpatay iti animal a kukua ti sabali a tao, masapul a suktanna ti pinatayna. Ta no biag ti inutangmo, biag met ti pagbayadmo.

¹⁹“No dangran ti maysa a tao ti padana a tao, lak-amenna met laeng ti kas iti inaramidna.

²⁰No nangtukkol iti tulang, masapul a matukkol met ti maysa kadagiti tulangna. No bulsekenna ti maysa a mata, masapul a mabulsek met ti maysa kadagiti matana; no mangpusi iti maysa a ngipen, masapul a mapusi met ti maysa a ngipenna. No ania ti inaramidna iti padana a tao, kasta met ti maaramid kenkuana.

²¹Siasinoman a mangpatay iti animal, suktanna dayta nga animal ngem ti siasinoman a mangpatay iti tao, masapul a mapapatay.

²²Agpaay daytoy a paglintegan kadakayo nga Israelita ken kadagiti ganggannaet a makipagnaed kadakayo, gapu ta siak ni Yahweh a Diosyo.”

²³Idi imbaga daytoy ni Moises kadagiti Israelita, inruarda ti lalaki iti kampo sada binato agingga a natay. Kastoy ti panangtungpal dagiti Israelita iti bilin ni Yahweh ken ni Moises.