Read Iloko Leviticus 25 Bible Online

Leviticus 25 - Iloko bible

Leviticus 25

¹Imbilin ni Yahweh ken ni Moises idiay Bantay Sinai

²nga itedna dagitoy nga alagaden kadagiti Israelita. Inton addakayon iti daga nga ited ti Apo kadakayo, diyo mulaan dagiti talonyo tunggal maikapito a tawen a kas pammadayawyo iti Apo.

³Innem a tawen a mulaanyo dagiti talonyo, arbasanyo dagiti ubasyo ken agapitkayo.

⁴Ngem iti maikapito a tawen, paginanaenyo ti daga. Daytoy ti tawen a maidaton iti Apo. Dikay agmula wenno agarbas.

⁵Diyo met apiten ti bunga dagiti nagtubo a mula iti talonyo ken ti bunga ti saan a naarbasan a kaubasanyo; daytoy ti tawen a panaginana ti daga.

⁶Nupay saan a namulaan ti daga iti dayta a tawen, addanto latta taraonyo, dagiti tagabuyo, dagiti tangtangdananyo nga agtrabaho, dagiti ganggannaet nga agnaed kadakayo,

⁷dagiti tarakenyo ken dagiti atap nga animal iti talonyo. Mabalin a kanen ti amin a maapit iti dayta a daga.

⁸Bumilangkayo iti mamimpito a sagpipito a tawen nga agdagup iti 49 a tawen.

⁹Iti maika-10 nga aldaw iti maikapito a bulan, iti Aldaw a Pannakapakawan ti Basol, mangibaonkayo iti mangpuyot iti trumpeta iti entero a pagilian.

¹⁰Kastoy ti panangngilinmo iti maika-50 a tawen ket ipakaammoyo ti pannakawayawaya dagiti amin nga agnaed iti daga. Iti daytoy a tawen, masapul a maisubli kadagiti sigud nga akinkukua wenno kadagiti kaputotanna ti amin a sanikua a nailako. No adda nailako a kas tagabu, masapul nga agsubli iti familiana.

¹¹Diyo mulaan dagiti talonyo wenno apiten dagiti dawa dagiti sagibo wenno burasen dagiti ubas kadagiti saan a naarbasan a kaubasan.

¹²Nasagradoan kadakayo ti entero a tawen; dagiti laeng maapit kadagiti nagtubtubo iti talonyo ti mabalinyo a kanen.

¹³Iti daytoy a tawen, maisubli ti amin a nalako a sanikua iti sigud nga akinkukua.

¹⁴Isut' gapuna a no aglakokayo iti daga iti padayo nga Israelita wenno gumatangkayo iti daga kenkuana, dikay agsisinnaur.

¹⁵No kayatmo a gatangen ti daga ti kaarrubam, bilangem ti tawen manipud iti naudi a Tawen ti Panagisubli kadagiti Sanikua.

¹⁶No ad-adu ti tawen, nanginngina ti bayadna ngem no bassit laeng ti bilang ti tawen, nalaklaka gapu ta ti mailako isu ti bilang ti maapit iti dayta a daga.

¹⁷Diyo sauren ti padayo nga Israelita, ngem tungpalenyo a siraraem ti Apo a Diosyo.

¹⁸Tungpalenyo ti amin a linteg ken bilin ti Apo tapno natalged ti panagnaedyo iti daga.

¹⁹Nawadwadto ti apit iti daga, saankayto a mabisinan ket natalgedto ti panagbiagyo.

²⁰Ngem nalabit nga addanto agsaludsod no anianto ti kanenyo iti maikapito a tawen idinto ta dikay agmula wenno agapit.

²¹Bendisionan ti Apo ti daga iti maikanem a tawen tapno adda apitenyo nga umanay iti dua a tawen.

²²Inton agmulakayo iti maikawalo a tawen, addanto pay la matda iti inapityo iti maikanem a tawen ket umanayto ti taraonyo agingga nga apitenyo dagiti immulayo iti dayta a tawen.

²³Saan a mailako ti dagayo a tagikuaen nga agnanayon ti gumatang. Ngamin, saan a dakayo ti akinkukua iti daga no di ti Dios ket mayarigkayo kadagiti ganggannaet a mapalubosan a mangtalon iti daytoy.

²⁴No mailako ti daga, masapul a mabigbig ti kalintegan ti sigud nga akinkukua a manggatang met laeng dayta a daga.

²⁵No pumanglaw ti maysa nga Israelita ket kapilitan nga ilakona ti daga, masapul a ti kaasitgan a kabagianna ti mangsaka.

²⁶No awan ti kabagianna a manggatang, isunto met la ti manggatang inton rumang-ay manen ti panagbiagna.

²⁷Isublina iti gimmatang ti gatad a kaibatogan ti maapit kadagiti nabati a tawen sakbay ti Tawen ti Panagisubli kadagiti Sanikua; iti kasta, agsubli met laeng kenkuana ti dagana a saanen a nasken a sakaenna.

²⁸Ngem no awan ti umanay a kuartana a mangsaka iti daga, agtalinaed ti daga iti gimmatang agingga a madanon ti sumaruno a Tawen ti Panagisubli kadagiti Sanikua. Iti dayta a tawen, maisubli ti daga iti sigud nga akinkukua.

²⁹No ilako ti maysa a tao ti balayna nga adda iti uneg ti siudad a nabakudan, adda kalinteganna a manggatang manen iti las-ud ti makatawen.

³⁰Ngem no dina gatangen iti las-ud ti makatawen, agnanayonen a kukua ti gimmatang ken dagiti kaputotanna ti balay ket saanen a maisubli ti balay uray pay iti Tawen ti Panagisubli kadagiti Sanikua.

³¹Ngem no dagiti balay nga adda kadagiti ili nga awan bakudna ti mailako, maitulad a kas kadagiti talon a mabalin a gatangen ket masapul a maisublida iti Tawen ti Panagisubli kadagiti Sanikua.

³²Nupay kasta, kadagiti siudad dagiti Levita, adda kalintegan dagiti Levita a mangsaka iti uray ania a tiempo iti aniaman a sanikua nga ilakoda.

³³No ilako ti Levita ti balay a nabangon iti uneg ti nabakudan a siudad, no saan a masaka, masapul a maisubli iti Tawen ti Panagisubli kadagiti Sanikua. Ngamin, agnanayon a kukua dagiti Levita dagitoy a balay a tawidda iti ili nga Israel.

³⁴Ngem saan a mabalin a mailako dagiti pagpastoran iti lawlaw dagiti siudadda, ta sanikuada dagitoy iti agnanayon.

³⁵No pumanglaw ti padayo nga Israelita nga agnaed iti asidegyo ket dina kabaelan a biagen ti bagina, masapul a tulonganyo a kas iti ganggannaet tapno maituloyna ti agnaed iti asidegyo.

³⁶Diyo paanakan ti uray ania nga ipabulodyo kenkuana; agbutengkayo iti Dios ket ipalubosyo nga agnaed ti padayo nga Israelita iti asidegyo.

³⁷Diyo paanakan ti kuarta nga ipautangyo kenkuana ket diyo pagganansiaan ti taraon nga ilakoyo kenkuana.

³⁸Daytoy ti bilin ti Apo a Diosyo a nangiruar kadakayo idiay Egipto tapno itedna kadakayo ti daga ti Canaan ken tapno agbalin a Diosyo.

³⁹No pumanglaw ti padayo nga Israelita nga agnaed iti asidegyo ket ilakona kadakayo ti bagina a kas tagabu, diyo pagbalinen a tagabu nga agserbi kadakayo.

⁴⁰Agnaed iti sidongyo a kas mangmangged ket agserbi agingga iti sumaruno a Tawen ti Panagisubli kadagiti Sanikua.

⁴¹Iti dayta a tawen, wayawayaanyo agraman dagiti annakna tapno agsublida iti nagtaudanda ken iti sanikua dagiti kapuonanda.

⁴²Adipen ti Apo dagiti Israelita ket isu ti nangiruar kadakuada idiay Egipto. Saanda a mailako a kas tagabu.

⁴³Diyo parigaten ida. Agbutengkayo ketdi iti Diosyo.

⁴⁴No masapulyo ti tagabu, mabalinyo ti gumatang manipud kadagiti pagilian iti likmutyo.

⁴⁵Mabalinyo met a gatangen dagiti annak dagiti ganggannaet a makipagnaed kadakayo. Mabalinyo a tagikuaen dagiti kasta nga ubbing a mayanak iti dagayo;

⁴⁶mabalinyo nga ipatawid ida kadagiti annakyo ket agserbida kadakuada bayat ti panagbiagda. Ngem diyo parigaten ti siasinoman a padayo nga Israelita.

⁴⁷No adda bumaknang a ganggannaet nga agnaed iti dagayo, no pumanglaw met ti padayo nga Israelita ket ilakona ti bagina a tagabu iti dayta a ganggannaet wenno iti kameng ti familiana,

⁴⁸kalpasan ti pannakailakona, adda pay laeng kalintegan a magatang manen tapno mawayawayaan. Mabalin a gatangen ti maysa kadagiti kakabsatna wenno ti ulitegna wenno ti kasinsinna wenno ti siasinoman nga asideg a kabagianna. Wenno, no adu ti matgedanna, mabalinna a gatangen met laeng ti pannakawayawayana.

⁴⁹

⁵⁰Makiuman iti gimmatang kenkuana ket bilangenda dagiti tawen manipud pannakailakona agingga iti masungad a Tawen ti Panagisubli kadagiti Sanikua sada ituding ti bayadanna iti pannakawayawayana kas maibatay iti sueldo ti mangmangged.

⁵¹Masapul nga isublina ti inggatangna a maksayan segun ti bilang ti nabati a tawen

⁵²

⁵³a kasla mangmangged a masueldoan iti tinawen. Masapul a saan a parigaten ti apona a kas maysa a tagabu.

⁵⁴No saan a mawayawayaan iti aniaman kadagitoy a pamuspusan, masapul a mawayawayaan iti masungad a Tawen ti Panagisubli kadagiti Sanikua, agraman dagiti annakna.

⁵⁵Saan a mabalin a tagabu iti agnanayon ti maysa nga Israelita agsipud ta adipen ti Apo dagiti tattao ti Israel. Inruarna ida idiay Egipto; isu ti Apo a Diosda.