Read Iloko Leviticus 26 Bible Online

Leviticus 26 - Iloko bible

Leviticus 26

¹Kinuna ni Yahweh, “Dikay agaramid kadagiti imahen wenno mangipasdek kadagiti estatua, adigi a bato wenno nasukog a bato a pagrukbaban. Siak ni Yahweh a Diosyo.

²Ngilinenyo dagiti fiesta ken raemenyo ti nasagradoan a lugar a pakadaydayawak. Siak ni Yahweh.

³“No annurotenyo dagiti lintegko ken tungpalenyo dagiti bilinko,

⁴pagtudoekto iti umisu a panawen tapno adda maapit iti daga ken agbunga dagiti kayo.

⁵Nawadwadto ti apityo ket agap-apitkayto pay laeng iti trigo uray no panagburasen iti ubas; agburburaskayto pay laeng iti ubas uray no panagmumulan iti trigo. Addanto amin a taraon a kayatyo a kanen ket natalgedto ti panagbiagyo iti dagayo.

⁶“Agturayto ti kappia iti daga ket mabalinyonto ti maturog nga awan ti pagbutnganyo. Pukawekto dagiti narungsot nga animal iti daga ket awanton ti gubat sadiay.

⁷Parmekenyonto dagiti kabusoryo;

⁸kabaelanto ti lima kadakayo a parmeken ti sangagasut ket ti sangagasut mabalindanto a parmeken ti sangapulo ribu.

⁹Bendisionankayto ket paraburankayto iti adu nga annak; tungpalekto ti karik iti tulagantayo.

¹⁰Nawadwadto unay ti apityo ket umanayto a taraonyo iti makatawen; wen, adunto pay la ti sobrayo, ket masapul nga ibellengyo ti nabati iti baak nga apit a pempenyo tapno adda pangikabilan iti baro nga apit.

¹¹Makipagnaedakto kadakayo iti Toldak ket pulos a dikayto tallikudan.

¹²Kaduakayto iti sadinoman a papananyo; siakto ti Diosyo ket dakayto dagiti tattaok.

¹³Siak, ni Yahweh a Diosyo, ti nangiruar kadakayo idiay Egipto tapno saankayon a matagabu. Inikkatko ti sangol a nangimameg kadakayo, isu a mabalinyo ti magna nga awan ti kabainyo.”

¹⁴Kinuna ni Yahweh, “No diyo tungpalen dagiti bilinko,

¹⁵no diyo ipangag dagiti bilin ken lintegko ket salungasingenyo ti tulagko,

¹⁶kellaatto nga idissuorko dagiti didigra kadakayo—dagiti saan a maagasan a sakit ken gurigor a mamagbulsek kadakayo a pakaigapuan ti main-inut a pannakagudas ti biagyo. Diyonto pakairanudan dagiti immulayo gapu ta kanento dagiti kabusoryo.

¹⁷Busorenkayto tapno parmekendakayto dagiti kabusoryo; iturayandakayto dagiti manggurgura kadakayo. Iti butengyo, agtataraykayto uray no awan mangkamkamat kadakayo.

¹⁸“No iti laksid amin dagitoy ket didak pay la ipangag, mamimpitonto ti kadagsen ti dusa nga ipatayko kadakayo kadagiti basolyo.

¹⁹Ikkatekto ti kinatangsityo; awanto ti tudo ket natikag ken natangkento ti dagayo a kas iti landok.

²⁰Awanto ti serserbi ti pagbambannoganyo, agsipud ta awanto ti maapit kadagiti dagayo ken dinto agbunga dagiti mulayo a kayo.

²¹“No itultuloyyo latta ti mangsukir kaniak ket didak ipangag, nayonakto manen iti mamimpito ti dusayo.

²²Bulosakto dagiti narungsot nga animal nga umay kadakayo, ket patayendanto dagiti annakyo ken rangrangkayendanto dagiti animalyo. Bassitto la ti matda kadakayo agingga nga awan matagtagitao kadagiti kalsadayo.

²³“No kalpasan amin dagitoy a dusa ket didak pay la ipangag no di ket itultuloyyo ti mangsukir kaniak,

²⁴busorenkayto ket mamimpitonto a nadagdagsen ngem ti immuna ti dusa nga ipatayko kadakayo.

²⁵No salungasingenyo ti tulagantayo, yegkonto ti gubat a pangdusak kadakayo; no agkamangkayo kadagiti siudadyo, mangyegakto kadagiti sakit a di maagasan ket kapilitanto a sumukokayo kadagiti kabusoryo.

²⁶Kissayakto ti taraonyo agingga a maymaysanto la nga urno ti paglutoan ti sangapulo a babbai iti amin a tinapay nga adda kadakuada; in-inutendanto nga ited ti kanenyo, ngem saankayonto a mabsog.

²⁷“No iti laksid amin dagitoy, itultuloyyo latta ti mangsukir kaniak ket didak ipangag,

²⁸bumtakto ti pungtotko kadakayo ket mamimpitonto a nadagdagsen ngem ti immuna nga idissuorko kadakayo a dusa.

²⁹Kasta unayto ti panagbisinyo ket kanenyonto dagiti mismo nga annakyo.

³⁰Dadaelekto dagiti lugar a pagdaydayawanyo kadagiti turod, rebbaekto dagiti altar a pagpupuoranyo iti insenso ket ipurruakkonto dagiti bangkayyo kadagiti natumba a didiosenyo. Iti kasta unay a gurak,

³¹rebbaekto dagiti siudadyo, dadaelekto dagiti lugar a pagrukrukbabanyo ket diakto awaten dagiti idatonyo.

³²Dadaelekto a maminpinsan ti dagayo ket urayto la makigtot dagiti kabusor a makakita iti napasamak. Sakupendanto ti daga.

³³Yegkonto ti gubat kadakayo ket iwarawarakayto kadagiti nadumaduma a pagilian. Awanton ti matagtagitao iti dagayo ket aglangalangto dagiti siudadyo.

³⁴Iti kasta, adunto a tawen nga aginana ti daga; wen, aginananto bayat ti pannakabaludyo iti daga dagiti kabusoryo.

³⁶“Dakayo nga adda iti daga dagiti kabusoryo, natakrotkayto ket agtataraykayo uray karasakas laeng ti bulong a mayang-angin ti mangngegyo. Kasla kamkamatendakayto iti paggugubatan ket mapasagkayto uray no awan ti kabusor iti asidegyo.

³⁷Agdidinnungparkayto uray no awan ti mangkamkamat kadakayo ket diyonto kabaelan a sarangten ti kabusoryo.

³⁸Mataykayto iti daga a nakaibellenganyo ket alun-onennakayto ti daga dagiti kabusoryo.

³⁹Dakayo a sumagmamano a makalasat iti daga dagiti kabusoryo, main-inutkayto a mapukaw gapu iti basolyo ken gapu iti basol dagidi kapuonanyo.

⁴⁰“Ngem ipudnonto dagiti kaputotanyo dagiti basbasolda ken dagiti basbasol dagidi kapuonanda a nangsalungasing ken nangbusor kaniak

⁴¹a nakaigapuan ti panangbusorko kadakuada ket imbellengko ida iti daga dagiti kabusorda. Inton agpakumbaba dagiti kaputotanyo ket naikarodan ti dusa ti basolda ken ti panangsukirda,

⁴²lagipekto ti tulagko kada Jacob, Isaac ken Abraham ket pabaroekto ti karik nga itedko ti daga kadagiti tattaok.

⁴³Ngem umuna pay a mapapanaw dagiti tattao tapno naan-anay nga aginana ti daga ken masapul nga ikaroda ti naan-anay a dusa iti pananglaksidda kadagiti linteg ken bilinko.

⁴⁴Ngem uray no kasta, diakto baybay-an wenno dadaelen a mamimpinsan ida bayat ti kaaddada pay laeng iti daga dagiti kabusorda. Ta no kasta ti mapasamak, mawaswas ti pannakitulagko kadakuada. Siak ni Yahweh a Diosda.

⁴⁵Pabaroekto ti tulagko kadagidi kapuonanda idi impakitak ti bilegko kadagiti amin a pagilian babaen iti panangiruarko kadagiti tattaok idiay Egipto tapno siak ni Yahweh, agbalinak a Diosda.”

⁴⁶Dagitoy ti amin a linteg ken bilin nga inted ni Yahweh ken ni Moises idiay Bantay Sinai nga annuroten dagiti Israelita.