Read Iloko Leviticus 3 Bible Online

Leviticus 3 - Iloko bible

Leviticus 3

¹No adda mangidatag iti maysa kadagiti bakana a kas daton a pakikappia, masapul a toro wenno kabaian nga awan depektona.

²Ipatayna ti imana iti ulo ti animal ket patayenna iti ruangan ti Tolda ti Dios. Ibuyatto dagiti papadi a kaputotan ni Aaron ti dara ti animal kadagiti uppat a sikigan ti altar.

³Puorandanto dagitoy a paset ti animal a kas daton iti Apo: amin a taba dagiti lalaem,

⁴dagiti bekkel ken dagiti kimpet a taba ken ti kasayaatan a paset ti dalem.

⁵Amin dagitoy, puoran dagiti papadi iti rabaw ti altar agraman dagiti daton a mapuoran. Nabanglo ken makaay-ayo daytoy a daton iti Apo.

⁶No karnero wenno kalding ti daton a pakikappia, mabalin a kalakian wenno kabaian, ngem masapul nga awan depektona.

⁷No karnero ti idatag ti maysa a tao,

⁸ipatayna ti imana iti ulo ti animal ket patayenna iti sangoanan ti Tolda ti Dios. Ibuyat dagiti papadi ti dara ti animal kadagiti uppat a sikigan ti altar.

⁹Maidatonto iti Apo dagitoy a paset ti animal: ti taba, ti entero a nataba nga ipus a naputed iti asideg ti duri, dagiti amin a taba a nangbalkot kadagiti lalaem,

¹⁰dagiti bekkel ken dagiti kimpet a taba ken ti kasayaatan a paset ti dalem.

¹¹Puoranto ti padi amin dagitoy iti rabaw ti altar a kas daton iti Apo

¹²No kalding ti idatag ti tao,

¹³ipatayna ti imana iti ulo ti animal, ket patayenna iti sangoanan ti Tolda ti Dios. Ibuyat dagiti papadi ti dara ti animal kadagiti uppat a sikigan ti altar.

¹⁴Maidatonto iti Apo dagitoy a paset ti animal: dagiti amin a taba dagiti lalaem,

¹⁵dagiti bekkel ken dagiti kimpet a taba ken ti kasayaatan a paset ti dalem.

¹⁶Puoranto ti padi amin dagitoy iti rabaw ti altar a kas nabanglo a daton iti Apo. Kukua ti Apo dagiti amin a taba.

¹⁷Awan ti Israelita a mapalubosan nga agsida iti taba wenno dara. Agnanayon daytoy nga alagaden a masapul a tungpalenda iti sadinoman a pagnaedanda.