Read Iloko Leviticus 4 Bible Online

Leviticus 4 - Iloko bible

Leviticus 4

¹Imbilin ni Yahweh ken ni Moises

²nga ibagana daytoy kadagiti Israelita. No adda agbasol ket salungasingenna ti uray ania kadagiti linteg ti Apo a dina inggagara, masapul a tungpalenna dagiti sumaganad nga annuroten.

³No ti Kangatoan a Padi ti agbasol a pakairamanan met dagiti tattao, masapul a mangidatag iti bumaro a baka nga awan depektona ket idatonna iti Apo gapu iti basolna.

⁴Ipanna ti baka iti ruangan ti Tolda, ipatayna ti imana iti ulo ti animal, ket patayenna sadiay iti imatang ti Apo.

⁵Mangala iti dara ti animal ket ipanna iti uneg ti Tolda.

⁶Isawsawna ti ramayna iti dara sana warsian iti mamimpito ti sangoanan ti nasagradoan a kurtina ti santuario.

⁷Pulagidanna iti dara dagiti sinan-sara ti altar a pagpuoran iti insenso iti Tolda. Ibuyatna ti natda a dara iti puon ti altar a pagidatagan iti daton a mapuoran nga adda iti ruangan ti Tolda.

⁸Ikkatenna amin a taba ti baka, ti taba dagiti lalaem,

⁹dagiti bekkel ken dagiti kimpet a taba ken ti kasayaatan a paset ti dalem.

¹⁰Alaen ti padi daytoy a taba ket puoranna iti altar dagiti daton a mapuoran, kas iti aramidenna iti taba dagiti animal a daton a pakikappia.

¹¹Ngem alaenna ti lalat ti animal, amin a lasagna, ti ulo, dagiti saka, dagiti lalaem, agraman dagiti bagis.

¹²Ipanna amin dagitoy iti ruar ti kampo, iti lugar a nadalus iti imatang ti linteg, iti pagibellengan iti dapu, ket puoranna ida iti rabaw dagiti kayo a pagsungrod.

¹³No ti entero nga Israel ti agbasol ket dida ammo a sinalungasingda ti maysa kadagiti bilin ti Apo,

¹⁴apaman a maammoan ti basolda, masapul a mangyeg ti sangkagimongan iti bumaro a baka a kas daton gapu iti basol. Ipanda ti animal iti Tolda ti Dios.

¹⁵Ipatay dagiti pangulo ti sangkagimongan dagiti imada iti ulo ti animal, ket sadiay ti pakapatayanna.

¹⁶Mangalanto ti Kangatoan a Padi iti dara ti baka sana ipan iti Tolda ti Dios.

¹⁷Isawsawna ti ramayna iti dara sa mamimpito a warsianna ti sangoanan ti kurtina.

¹⁸Pulagidanna iti dara dagiti sinan-sara ti altar a pagpuoran iti insenso iti uneg ti Tolda. Ibuyatna ti natda a dara iti puon ti altar a pagidatagan iti daton a mapuoran nga adda iti ruangan ti Tolda.

¹⁹Kalpasanna, alaenna ti amin a taba ti baka sana puoran iti rabaw ti altar.

²⁰Aramidennanto iti daytoy a baka ti kas iti inaramidna iti baka a naidatag gapu iti basol, ket kalpasan ti panangannongna iti seremonia a pangikkat iti basol, napakawanen dagiti tattao.

²¹Ipanna ti baka iti ruar ti kampo ket puoranna a kas iti inaramidna iti baka a naidaton gapu iti basolna. Daytoy ti daton a mangikkat iti basol ti sangkagimongan.

²²No maysa nga agturay ti agbasol ket dina ammo a sinalungasingna ti maysa kadagiti bilin ti Apo,

²³apaman a maibaga kenkuana ti basolna, mangidaton iti kalakian a kalding nga awan depektona.

²⁴Ipatayna ti imana iti ulo ti animal sana patayen iti akin-amianan a paset ti altar, iti pagpatayan kadagiti daton a mapuoran. Daytoy ti daton a mangikkat iti basol.

²⁵Isawsaw ti padi ti ramayna iti dara ti animal, pulagidanna iti dara dagiti sinan-sara ti altar, ket ibuyatna ti natda iti puon ti altar.

²⁶Kalpasanna, puoranna amin a taba ti animal iti altar, kas iti inaramidna iti taba dagiti animal a naidaton a pakikappia. Kastoy ti pannakaidatag ti daton gapu iti basol tapno mapakawan ti agturay.

²⁷No maysa kadagiti kadawyan a tattao ti agbasol ket dina ammo a sinalungasingna ti maysa kadagiti bilin ti Apo,

²⁸apaman a maibaga kenkuana ti basolna, masapul a mangidatag iti kabaian a kalding nga awan depektona.

²⁹Ipatayna ti imana iti ulo ti animal sana patayen iti akin-amianan a paset ti altar, iti pagpatayan kadagiti animal a maidatag a daton a mapuoran.

³⁰Isawsaw ti padi ti ramayna iti dara ti animal, pulagidanna iti dara dagiti sinan-sara ti altar, ket ibuyatna ti natda iti puon ti altar.

³¹Kalpasanna, ikkatenna ti amin a taba ti animal kas iti inaramidna iti taba dagiti animal a naidaton a pakikappia. Puoranna dagitoy iti altar kas nabanglo a daton iti Apo. Kastoy ti pannakaidatag iti daton gapu iti basol tapno mapakawan dayta a tao.

³²No karnero ti idatag ti maysa a tao a kas daton gapu iti basol, masapul a kabaian nga awan ti depektona.

³³Ipatayna ti imana iti ulo ti animal sana patayen iti akin-amianan a paset ti altar, iti pagpatayan kadagiti animal a maidatag a kas daton a mapuoran.

³⁴Isawsaw ti padi ti ramayna iti dara ti animal, pulagidanna iti dara dagiti sinan-sara ti altar, ket ibuyatna ti natda a dara iti puon ti altar.

³⁵Kalpasanna, ikkatenna ti amin a taba ti animal kas iti panangikkatna iti taba dagiti animal a naidaton a pakikappia. Puoranna dagitoy iti altar a maigiddan iti daton a mapuoran a naidatag iti Apo. Kastoy ti pannakaidatag iti daton gapu iti basol tapno mapakawan dayta a tao.