Read Iloko Leviticus 7 Bible Online

Leviticus 7 - Iloko bible

Leviticus 7

¹Dagitoy dagiti alagaden iti pannakaidatag dagiti daton a pagsupapak kadagiti biddut. Nasantoan unay daytoy a daton.

²Masapul a maparti ti animal iti pagpartian kadagiti daton a mapuoran, ket maibuyat ti darana kadagiti uppat a sikigan ti altar.

³Maikkat amin a taba ket maidaton iti altar: ti nataba nga ipus, ti taba a nangbungon kadagiti lalaem,

⁴dagiti bekkel ken dagiti tabada ken ti kasayaatan a paset ti dalem.

⁵Puoran ti padi ti amin a taba iti altar a kas daton iti Apo. Daton daytoy a pagsupapak iti biddut.

⁶Mabalin a kanen daytoy ti siasinoman a lalaki iti familia dagiti papadi, ngem gapu ta nasantoan unay daytoy a daton, masapul a kanenda iti nasantoan a lugar.

⁷Maymaysa nga alagaden ti maannurot iti daton gapu iti basol ken daton a pagsupapak iti biddut: ti padi a mangidatag iti daton ti akinkukua iti karne.

⁸Kukua ti padi a mangidatag iti daton ti lalat ti animal a maidatag a daton a mapuoran.

⁹Tunggal daton a makan a maluto iti urno wenno iti pariok kukua ti padi a nangidatag iti daytoy iti Dios.

¹⁰Ngem kukua dagiti papadi a kaputotan ni Aaron ti amin a saan a maluto a daton a makan, nalaokan man iti lana wenno saan; agpapada ti bingay ti tunggal maysa.

¹¹Dagitoy dagiti alagaden kadagiti daton a pakikappia a maidatag iti Apo.

¹²No idatag daytoy ti tao a kas daton a pagyaman iti Dios, pakuyoganna ti mapuoran nga animal iti tinapay nga awan lebadurana; napuskol a tinapay a nagamay iti lana ti olibo wenno naingpis a kankanen a napulagidan iti lana ti olibo wenno kankanen a naaramid iti nagamay nga arina a nalaokan iti lana ti olibo.

¹³Malaksid kadagitoy, mangidaton pay kadagiti nalebaduraan a tinapay.

¹⁴Mangala iti maysa iti tunggal kita ti tinapay ket idatagna a naisangsangayan a daton iti Apo; kukua daytoy ti padi a mangala iti dara ti animal ket iwarsina iti altar.

¹⁵Masapul a sidaen ti karne ti animal iti aldaw a pannakaidatonna; awan a pulos ti maipabigat.

¹⁶Ngem no maidatag ti daton a pakikappia a pangtungpal ti tao iti maysa a sapata wenno daton nga agtaud iti bukodna a nakem, saan a nasken a kanen amin iti dayta nga aldaw a pannakaidatagna. Mabalin a kanen ti mabati iti sumuno nga aldaw.

¹⁷No adda pay la matda iti maikatlo nga aldaw, masapul a mapuoran.

¹⁸Ngamin, saan nga awaten ti Dios ti daton no adda pay la mangan iti daytoy iti maikatlo nga aldaw. Agbalin a narugit iti imatang ti linteg ket madusa ti siasinoman a mangan iti daytoy.

¹⁹No maisagid ti karne iti aniaman nga ibilang ti linteg a narugit, masapul a saan a sidaen no di ket mapuoran. Mabalin ti siasinoman a nadalus iti imatang ti linteg ti mangan iti karne.

²⁰Ngem no ti tao a saan a nadalus iti imatang ti linteg ket mangan iti daytoy, saanen a maibilang a maysa kadagiti tattao ti Dios.

²¹Kasta met ti siasinoman a mangsagid iti aniaman a maibilang a narugit. No mangan iti karne iti daytoy a daton, mailaksid kadagiti tattao ti Dios.

²²Inted ni Yahweh ken ni Moises dagitoy sumaganad nga alagaden

²³nga agpaay kadagiti Israelita: Maiparit a sidaen ti taba ti baka, karnero wenno kalding.

²⁴Mabalin nga usaren ti taba ti animal a natay nga awan gapgapuna wenno pinatay ti padana nga animal ngem saan a mabalin a kanen.

²⁵Mailaksid kadagiti tattao ti Dios ti siasinoman a mangan iti taba ti animal a mapuoran a nairanta a maidaton iti Apo.

²⁶Iti sadinoman a pagnaedan dagiti Israelita, maiparit a kanenda ti dara ti tumatayab wenno animal.

²⁷Mailaksid kadagiti tattao ti Dios ti siasinoman a mangan iti dara.

²⁸Inted ni Yahweh ken ni Moises dagitoy sumaganad nga alagaden nga

²⁹agpaay kadagiti Israelita. Siasinoman a mangidatag iti daton a pakikappia, masapul a mangilasin iti agpaay iti Apo iti naisangsangayan a daton;

³⁰isu a mismo ti mangidatag a kas daton a mapuoran. Alaenna ti taba ti animal agraman ti barukongna ket idatagna a naisangsangayan a daton iti Apo.

³¹Puoran ti padi ti taba iti altar ngem maited kadagiti papadi ti barukong ti animal.

³²No maipapan iti makannawan a kammaudi a luppo ti animal, maited met a kas naisangsangayan a bingay

³³ti padi a mangidatag iti dara ken iti taba ti animal a daton a pakikappia.

³⁴Naisangsangayan a sagut ti barukong ken naidumduma a bingay ti makannawan a kammaudi a luppo; innala ida ti Apo kadagiti Israelita ket intedna kadagiti papadi. Daytoy ti masapul nga ited dagiti Israelita ken ni Aaron ken kadagiti annakna iti amin a kaputotan.

³⁵Daytoy ti paset ti daton a mapuoran a naidatag iti Apo a naited ken ni Aaron ken kadagiti annakna idi agserbida a kas padi.

³⁶Iti dayta nga aldaw, imbilin ti Apo kadagiti Israelita nga itedda kadakuada daytoy a paset ti daton. Masapul nga annuroten dagiti Israelita daytoy nga alagaden iti agnanayon.

³⁷Dagitoy ngarud dagiti alagaden maipanggep iti daton a mapuoran, daton a makan, daton gapu iti basol, daton a pagsupapak iti biddut, daton iti pannakaorden ken daton a pakikappia.

³⁸Inted ni Yahweh dagitoy a bilin ken ni Moises iti Bantay Sinai, iti let-ang, iti aldaw nga imbilinna kadagiti Israelita nga idatagda dagiti datonda.