Read Iloko Leviticus 8 Bible Online

Leviticus 8 - Iloko bible

Leviticus 8

¹Kinuna ni Yahweh ken ni Moises,

²“Ipanmo ni Aaron ken dagiti annakna iti ruangan ti Tolda. Itugotmo dagiti kawes dagiti papadi, ti lana a pagkonsagrar, ti bumaro a baka a maidaton gapu iti basol, ti dua a kalakian a karnero ken ti sangabasket a tinapay nga awan lebadurana.

³Kalpasanna, ummongem ti entero a gimong sadiay.”

⁴Tinungpal ni Moises ti bilin ni Yahweh kenkuana ket idi naguummong ti gimong

⁵kinunana kadakuada, “Bilin ti Apo ti innak aramiden.”

⁶Inayaban ni Moises ni Aaron ken dagiti annakna iti sangoanan ket binuggoanna ida kas mayannurot iti linteg.

⁷Inyarruatna ken ni Aaron ti bado ken ti kagay a rutap ken ti barikes. Inyusongna kenkuana ti efod ket pinairutanna babaen iti barikes a napintas ti pannakaabelna.

⁸Inyarruatna ti pektoral sana inkapet ti Urim ken Tummim.

⁹Insaadna ti turban iti ulona ket iti parupana, inkabilna ti balitok a balangat a nasagradoan a pakakitaan ti pannakaidaton kas imbilin kenkuana ni Yahweh.

¹⁰Kalpasanna, innala ni Moises ti lana ket inkonsagrarna ti Tolda ti Dios ken ti amin nga adda iti unegna; kastoy ti panangikonsagrarna ti amin ken ni Yahweh.

¹¹Nangala iti lana ket winarsianna iti namimpito ti altar ken dagiti alikamenna ken ti palanggana ken ti nagbatayanna tapno maikonsagrarda ken ni Yahweh.

¹²Inordenanna ni Aaron babaen iti panangibukbokna iti lana iti ulona.

¹³Kalpasanna, pinagpasangona dagiti annak ni Aaron; binadoanna ida, inkabilna ti barikes ti tunggal maysa ket inkapetna ti pannakakallugongda, kas imbilin ni Yahweh.

¹⁴Innala ni Moises ti bumaro a baka a maidaton gapu iti basol. Impatay ni Aaron ken dagiti annakna ti imada iti ulo ti animal.

¹⁵Pinarti ni Moises ti animal sa nangala iti dara ket babaen iti ramayna, pinulagidanna dagiti sinan-sara ti altar tapno maidaton ti altar. Imbuyatna iti puon ti altar ti natda a dara. Kastoy ti pannakaidaton iti altar ken ti pannakadalusna iti imatang ti linteg.

¹⁶Inikkat ni Moises ti amin a taba dagiti lalaem, ti kasayaatan a paset ti dalem ken dagiti bekkel ken dagiti tabada sana pinuoran dagitoy iti rabaw ti altar.

¹⁷Kas imbilin ni Yahweh, pinuoranna iti ruar ti kampo dagiti dadduma a paset ti baka agraman ti lalat, lasag ken bagbagis.

¹⁸Innala ni Moises ti kalakian a karnero a maidaton a mapuoran ket impatay ni Aaron ken dagiti annakna ti imada iti ulo ti animal.

¹⁹Pinatayna ti animal sana imbuyat ti darana iti uppat a sikigan ti altar.

²⁰Rinangrangkayna ti karnero, binuggoanna dagiti lalaem ken dagiti kammaudi a saka; pinuoranna ti ulo, ti taba ken dagiti dadduma a pasetna iti altar, kas imbilin ni Yahweh. Nabanglo dayta nga ayamuom ken ni Yahweh.

²²Innala ni Moises ti maikadua a kalakian a karnero a nairanta iti pannakaorden dagiti papadi. Impatay ni Aaron ken dagiti annakna ti imada iti ulo ti animal.

²³Pinarti ni Moises ti karnero ket nangala iti dara nga impulagidna iti kannawan a piditpidit ni Aaron, kadagiti akinkannawan a tangan ti ima ken sakana.

²⁴Pinagpasangona dagiti annak ni Aaron, ket impulagidna ti dara iti kannawan a piditpiditda, kadagiti tangan ti kannawan nga ima ken sakada. Imbuyatna ti natda a dara iti aglawlaw ti altar.

²⁵Innalana ti taba, ti nataba nga ipus, amin a taba a kimpet kadagiti lalaem, ti kasayaatan a paset ti dalem, dagiti bekkel agraman ti tabada, ken ti kannawan a kammaudi a saka.

²⁶Kalpasanna, nangala iti maysa a tinapay iti basket a nakaikabilan ti tinapay nga awan lebadurana a naidaton iti Apo, maysa a tinapay a nagamay iti lana, ken maysa a naingpis a kankanen. Imparabawna dagitoy iti taba ken ti kannawan a kammaudi a saka.

²⁷Inkabilna amin dagitoy a taraon iti ima ni Aaron ken dagiti annakna ket indatagda a kas naisangsangayan a sagut iti Apo.

²⁸Innalana met laeng dagitoy a makan kadakuada ket pinuoranna iti altar, iti rabaw ti daton a mapuoran, kas daton ti pannakaorden. Nabanglo daytoy nga ayamuom ken ni Yahweh.

²⁹Innala ni Moises ti barukong ti animal ket indatagna a kas naisangsangayan a sagut ken ni Yahweh. Daytoy ti bingay ni Moises iti karnero a naidaton iti pannakaorden. Natungpal ti amin nga imbilin ni Yahweh.

³⁰Nangala ni Moises iti lana a pagkonsagrar ken iti dara nga adda iti altar ket winarsianna ni Aaron ken dagiti annakna ken dagiti pagan-anayda. Kastoy ti panangikonsagrarna kadakuada ken kadagiti arruatenda ken ni Yahweh.

³¹Kinuna ni Moises ken ni Aaron ken dagiti annakna, “Ipanyo ti karne iti ruangan ti Tolda ti Dios; angrenyo, ket sadiay, ipanganyo iti tinapay nga adda iti basket a nakaikabilan dagiti daton a nausar iti pannakaorden, kas imbilin ti Apo.

³²Puoranyo ti aniaman a matda a tinapay wenno karne.

³³Dikay pumanaw iti ruangan ti Tolda no di malpas ti seremonia ti pannakaordenyo; agtalinaedkayo sadiay iti las-ud ti pito nga aldaw.

³⁴Imbilin ti Apo nga aramidentayo ti inaramidtayo ita nga aldaw tapno maikkat dagiti basolyo.

³⁵Agyankayo iti ruangan ti Tolda ti Dios iti aldaw ken rabii iti las-ud ti pito nga aldaw, ta no saanyo nga aramiden, mataykayo. Daytoy ti imbilin kaniak ti Apo.”

³⁶Ngarud, inaramid ni Aaron ken dagiti annakna ti imbilin ni Yahweh ken ni Moises.