Read Iloko Leviticus 9 Bible Online

Leviticus 9 - Iloko bible

Leviticus 9

¹Iti aldaw kalpasan ti seremonia ti pannakaorden, inayaban ni Moises ni Aaron ken dagiti annakna ken dagiti pangulo ti Israel.

²Kinunana ken ni Aaron, “Mangidatonka iti bumaro a baka ken kalakian a karnero nga awan depektoda. Maidatag ti baka a daton gapu iti basol ken ti karnero a kas daton a mapuoran.

³Kalpasanna, ibagam kadagiti Israelita a mangalada iti kalakian a kalding a maidaton gapu iti basol, urbon ti baka a maysa ti tawenna, ken urbon ti karnero a maysa ti tawenna nga awan depektoda a maidatag a daton a mapuoran

⁴ken toro a baka ken kalakian a karnero a maidatag a kas daton a pakikappia. Masapul nga idatagda iti Apo a mapakuyogan iti daton a makan a nalaokan iti lana. Nasken nga aramidenda daytoy ta agparang ti Apo kadakuada ita nga aldaw.”

⁵Impanda iti sangoanan ti Tolda ti Dios ti amin nga imbilin ni Moises ket naguummong sadiay ti sangkagimongan nga agdaydayaw ken ni Yahweh.

⁶Kinuna ni Moises, “Imbilin ti Apo nga aramidenyo amin daytoy tapno agparang kadakayo ti makapurar a lawag a pakakitaan ti kaaddana.”

⁷Kinunana ken ni Aaron, “Inka iti altar ket idatagmo ti daton a maipaay iti basol ken ti daton a mapuoran a mangikkat kadagiti basolmo ken kadagiti basol dagiti tattao. Idatagmo met ti daton a mangikkat kadagiti basbasol dagiti tattao, kas imbilin ti Apo.”

⁸Napan ni Aaron iti altar ket pinatayna ti bumaro a baka a datonna gapu iti basolna.

⁹Impan kenkuana dagiti annakna ti dara ket insawsawna ti ramayna, impulagidna ti dara kadagiti sinan-sara ti altar ket imbuyatna ti natda iti puon ti altar.

¹⁰Pinuoranna iti altar ti taba, dagiti bekkel ken ti kasayaatan a paset ti dalem kas imbilin ni Yahweh ken ni Moises.

¹¹Ngem iti ruar ti kampo ti nangpuoranna iti karne ken ti lalat.

¹²Pinartina ti animal a bukodna a daton a mapuoran. Impan kenkuana dagiti annakna ti dara ket imbuyatna iti uppat a sikigan ti altar.

¹³Inyawatda kenkuana ti ulo ken dagiti dadduma a paset ti animal ket pinuoranna ida iti altar.

¹⁴Kalpasanna, binuggoanna dagiti lalaem ken dagiti kammaudi a saka sana pinuoran ida iti altar iti rabaw dagiti dadduma a daton a mapuoran.

¹⁵Insarunona nga innala ti kalding a maidaton gapu iti basol dagiti tattao. Pinartina sana indaton a kas iti inaramidna iti bukodna a daton gapu iti basolna.

¹⁶Innalana met ti animal a maidaton a mapuoran ket indatagna kas mayannurot kadagiti alagaden.

¹⁷Indatagna ti daton a makan ket nangrakem iti arina sana pinuoran iti altar. (Mainayon daytoy iti inaldaw a daton a mapuoran.)

¹⁸Pinatayna ti toro a baka ken ti kalakian a karnero a kas daton a pakikappia a maipaay kadagiti tattao. Inyeg dagiti annakna ti dara ket imbuyatna iti aglawlaw ti altar.

¹⁹Inkabil ni Aaron dagiti taba ti baka ken karnero

²⁰iti rabaw dagiti barukong dagiti animal ket impanna amin ida iti altar. Pinuoranna ti taba iti altar

²¹ket indatagna dagiti barukong ken dagiti kannawan a kammaudi a saka a naisangsangayan a sagut iti Apo nga agpaay kadagiti papadi kas imbilin ni Moises.

²²Idi naidatagen ni Aaron dagiti amin a daton, intayagna ti imana sana binendisionan dagiti tattao ket kalpasanna, bimmaba manipud iti altar.

²³Simrek da Moises ken Aaron iti Tolda ti Dios. Idi rummuarda, binendisionanda dagiti tattao ket nagparang ti makapurar a lawag a mangipakita iti kaadda ni Yahweh.

²⁴Pagammoan, simgiab ti apuy ni Yahweh ket inkisapna ti sibubukel a daton ken dagiti taba dagiti animal iti altar. Nagririaw dagiti tattao a nakakita iti daytoy ket nagpaklebda iti daga.