Read Iloko Jeremiah 11 Bible Online

Jeremiah 11 - Iloko bible

Jeremiah 11

¹Kinuna ti Apo kaniak,

²“Denggem dagiti sagudayen daytoy a tulag. Ibagam kadagiti tattao ti Juda ken kadagiti agnanaed iti Jerusalem

³a siak ni Yahweh a Dios ti Israel, ilunodko ti saan nga agtungpal kadagiti alagaden daytoy a tulag.

⁴Isu met laeng ti imbilinko kadagiti kapuonanda idi iruarko ida idiay Egipto, ti daga a kasla landok nga urno kadakuada. Imbagak kadakuada a tungpalenda ti saok ken aramidenda ti amin nga imbilinko. Imbagak a no tungpalendak, tattaokto ida ket siakto ti Diosda.

⁵Iti kasta, tungpalek ti karik kadagiti kapuonanda iti pannangtedko kadakuada iti nabaknang ken nadam-eg a daga a kukuada itan.” “Wen, O Apo,” kinunak.

⁶Kalpasanna, kinuna ti Apo kaniak, “Inka kadagiti siudad ti Juda ken kadagiti kalkalsada ti Jerusalem. Ipakaammom ti mensahek sadiay ket ibagam kadagiti tattao nga ipangag ken tungpalenda dagiti alagaden daytoy a katulagan.

⁷Idi iruarko dagiti kapuonanda idiay Egipto, sipapasnekak a nangballaag kadakuada, ket agpapan ita, balballaagak pay laeng dagiti tattao.

⁸Ngem saanda a nangipangag wenno nagtulnog no di ket intultuloyda ti nagaramid iti dakes. Imbilinko kadakuada a tungpalenda ti katulagan ngem nagsukirda. Iti kasta, indissuorko kadakuada ti dusa kas nailanad iti daytoy a katulagan.”

⁹Kalpasanna, kinuna ti Apo kaniak, “Adda panggep dagiti tattao ti Juda ken Jerusalem a mangbusor kaniak.

¹⁰Sinublianda ti basol dagiti kapuonanda a di nagtungpal iti imbagak. Nagdaydayawda kadagiti didiosen. Sinalungasing ti Israel ken ti Juda ti nakitulagak kadagiti kapuonanda.

¹¹Iti kasta, siak, ni Yahweh, iballaagko kadakuada a dadaelekto ida ket saanda a makalisi. Uray no agpatulongda kaniak, saankonto nga ipangag ida.

¹²Agpatulongto dagiti tattao ti Juda ken Jerusalem kadagiti didiosen a nagidataganda kadagiti daton a mapuoran. Ngem awanto ti maitulong dagitoy a didiosen inton umay daytoy a didigra.

¹³Adu ti didiosenda a kas iti kaadu dagiti siudadda. Adu met dagiti altar a binangon dagiti agnanaed idiay Jerusalem a kas iti kaadu dagiti kalkalsada a pagidataganda kadagiti datonda iti dayta makarimon a didiosen a Baal.

¹⁴Jeremias, dimo ikararagan wenno idawdawatan kaniak dagitoy a tattao. No agrigatda ket agpatulongda kaniak, saankonto nga ipangag ida.”

¹⁵Kuna ti Apo, “Agar-aramid iti dakes dagiti tattao nga ay-ayatek. Ania ti kalinteganda nga umay iti Templok? Ipagarupda aya a malisianda ti didigra babaen iti panagkarida ken panagidatagda kadagiti animal a kas daton? Agrag-odanto ngata?

¹⁶Inawagak ida idi iti narukbos ken napintas nga olibo nga adu ti napipintas a bungana. Ngem ita, babaen iti gumilgil-ayab nga apuy, puorakto dagiti bulongna ken ikisapkonto dagiti sangana.

¹⁷“Siak, ni Yahweh a Mannakabalin-amin, ti nangimula iti Israel ken Juda. Ngem ita, ikeddengko a madidigrada gapu iti dakes nga inaramidda. Pinagpungtotdak gapu kadagiti panagidatagda ken ni Baal kadagiti daton a mapuoran.”

¹⁸Impakaammo ti Apo kaniak nga isiksikatdak dagiti kabusorko.

¹⁹Mayarigak iti naamo a karnero a maipan iti pagpartian ket diak ammo a dakes ti panggepda kaniak. Kinunkunada, “Pukanentayo ti kayo ita ta nasalun-at pay. Patayentayo tapno awanton ti makalaglagip kenkuana.”

²⁰Ket inkararagko, “O Apo a Mannakabalin-amin, nalintegka nga ukom. Suotem ti puso ken panunot ti tao. Ipalubosmo kadi a makitak ti panangbalesmo kadagitoy a tattao, ta intalekko kenka daytoy a parikutko.”

²¹Kayat idi dagiti taga-Anatot a mapapatayak. Imbagada kaniak a papatayendak no itultuloyko ti panangikaskasabak iti mensahe ti Apo.

²²Kinuna ngarud ti Apo a Mannakabalin-amin, “Dusaekto ida! Mapapatayto iti paggugubatan dagiti agtutuboda a lallaki. Matayto met iti bisin dagiti annakda.

²³Nangitudingak iti tiempo a panangyegko iti didigra kadagiti taga-Anatot ket inton dumteng dayta a tiempo, awanto ti makalasat kadakuada.”