Read Iloko Jeremiah 12 Bible Online

Jeremiah 12 - Iloko bible

Jeremiah 12

¹“O Apo, no agreklamoak kenka, maipakita a nalintegka. Ngem sadino ti ayan ti hustisia? Apay a narang-ay ti panagbiag dagiti managdakdakes? Apay nga agballigi dagiti manangallilaw?

²Imulam ida ket agramutda; dumakkel ken agbungada. Nasayaat panagsaoda't maipapan kenka ngem ti pusoda adayo kenka.

³Ngem, O Apo, ammonak, makitam ti aramidko ken ti panagayatko kenka. Ukodem dagitoy dakes a tattao a kas kadagiti maparti a karnero; ilasinmo ida agingga iti pannakapartida.

⁴Kasano pay kabayag ti kinatikag ti dagami ken ti pannakalaylay dagiti ruot iti tunggal talon? Matayen dagiti animal ken tumatayab gapu iti kinadakes dagiti tattaomi, isuda nga agkuna, ‘Saan a makita ti Dios ti ar-aramidentayo.’”

⁵Kinuna ti Apo, “Jeremias, no mabannogka a makilumba iti tao, kasano ti pannakilumbam kadagiti kabalio? Natalgedka iti awan sarikedkedna nga away ngem kasano ti panagbiagmo iti kabakiran iti igid ti Jordan?

⁶Uray dagiti kakabsatmo, liniputandaka; dagiti kameng ti bukodmo a familia, tumiponda kadagiti mangdarup kenka. Dika agtalek kadakuada uray no nasayaat ti panagsaoda.”

⁷Kuna ti Apo, “Binaybay-ak ti Israel, linaksidko ti pinilik a nasion. Inyawatko dagiti tattao nga ay-ayatek iti pannakabalin dagiti kabusorda.

⁸Binusordak dagiti pinilik a tattaok, nagbalinda a kas iti leon iti kabakiran, nginerngerandak, isu a kagurak ida.

⁹Kasla billit dagiti pinilik a tattaok, sippayoten ida dagiti kali iti aglikmut. Ayabanyo dagiti atap nga animal, ta umayda agpennek a mangan.

¹⁰Adu a pastor ti nangdadael iti kaubasak, inasak-asakda dagiti taltalonko; pinaglangalangda ti nasayaat a dagak.

¹¹Pinagbalinda nga awan serserbina, nakaay-ay-ay ti buyana. Nagbalin a let-ang ti entero a daga, ket awan man la ti mangikanawa.

¹²Dimteng dagiti lallaki nga agdadael; naglasatda iti nangangato a lugar iti let-ang. Inyegko ti gubat a mangdadael iti sapasap a daga; awan talna iti panagbiag dagiti tattao.

¹³Nagmula dagiti tattaok iti trigo, ngem sisiit ti inapitda. Inggaedda ti nagtrabaho, ngem awan supapak ti bannogda. Gapu iti kasta unay a pungtotko, awan naapitda kadagiti mulada.”

¹⁴Kuna ti Apo, “Adda masaok maipapan kadagiti kaarruba ti Israel a nangdadael iti daga nga intedko kadagiti tattaok nga Israelita. Ikkatekto dagitoy a tattao iti dagada, kas iti mula a maparut iti nagtuboanna ket isalakankonto ti Juda iti pannakabalinda.

¹⁵Ngem kalpasan ti panangipanawko kadakuada, kaasiakto met la ida. Isublikto ti tunggal nasion iti daga ken ilina.

¹⁶No awatenda iti amin a pusoda ti wagas dagiti tattaok, ket pagsapatada ti nagan ni Yahweh a sibibiag, kas panangisuroda kadagiti tattaok nga agsapata ken ni didiosen a Baal—makipagnaeddanto kadagiti tattaok ket rumang-aydanto.

¹⁷Ngem no adda pagilian a di agtulnog, parutekto a mamimpinsan ket dadaelekto. Siak, ni Yahweh, ti nagsao kadagitoy.”