Read Iloko Jeremiah 13 Bible Online

Jeremiah 13 - Iloko bible

Jeremiah 13

¹Imbaga ti Apo a gumatangak iti linen a sapin ket isuotko; ngem imbagana a diak babbabasaen.

²Gimmatangak ngarud iti linen a sapin ket kas imbilinna, insuotko.

³Kinunana manen kaniak,

⁴“Inka idiay Karayan Eufrates. Ikkatem ti sapin samo ilemmeng iti rengngat ti bato.”

⁵Iti kasta, inlemmengko iti asideg ti Eufrates kas imbilinna.

⁶Iti saan a nabayag, imbaga ti Apo nga agsubliak idiay Eufrates tapno alaek ti linen a sapin.

⁷Nagsubliak iti karayan ket innalak ti sapin iti nangilemmengak. Ngem nadadaelen ket awanen ti serserbina.

⁸Nagsao manen ti Apo kaniak ket kinunana,

⁹“Kastoyto ti panangdadaelko iti kinatangsit ti Juda ken ti Jerusalem.

¹⁰Saan nga impangag dagitoy dakes a tattao ti saok. Nasukir ken dakesda latta. Nagdaydayaw ken nagserbida kadagiti sabali a didiosen. Maipadadanto ngarud iti daytoy linen a sapin nga awanen ti serserbina.

¹¹Kas iti irut ti pannakaisuot ti linen a sapin iti siket, kayatko a kasta met ti irut ti ikakapet dagiti amin nga Israelita ken taga-Juda kaniak. Inaramidko daytoy tapno isudanto ti agbalin a tattaok a mangidaydayaw ken mangitan-ok iti naganko. Ngem dida met agtulnog kaniak.”

¹²Kinuna kaniak ti Apo a Dios, “Jeremias, ibagam kadagiti Israelita a masapul a mapunno ti amin a burnay iti arak. Isungbatdanto nga ammoda a masapul a mapno amin a burnay iti arak.

¹³Ibagam ngarud kadakuada a siak, ni Yahweh, painumekto iti arak dagitoy a tattao iti daytoy a daga agingga a mabartekda: dagiti ar-ari a kaputotan ni David, dagiti papadi, dagiti profeta ken amin nga umili ti Jerusalem.

¹⁴Kalpasanna, pagdidinnungparekto ida a kasla burnay, lallakay man wenno ubbing. Diakto kaasian wenno ilalaen ida. Diakto sumardeng agingga a mapapatayko ida.”

¹⁵Tattao ti Israel, nagsaon ti Apo! Agpakumbabakayo ket dumngegkayo kenkuana.

¹⁶Itan-okyo ti Apo a Diosyo, sakbay a yegna ti sipnget, ket maitublakkayo kadagiti bantay. Wen, itan-okyo sakbay a pagsipngetenna iti napalalo ti lawag a birbirokenyo.

¹⁷No dikay mangipangag, sangitakto iti nalimed ti kinatangsityo. Agsangitakto iti napait ket agarubosto ti luak agsipud ta naipanaw a kas balud dagiti tattao ti Apo.

¹⁸Kinuna ti Apo kaniak, “Ibagam iti ari ken iti inana a reyna nga umulogda manipud iti tronoda, agsipud ta naikkaten dagiti napintas a korona iti uloda.

¹⁹Nalakub dagiti il-ili ti Negeb; awan makaasideg kadakuada. Napapanawen dagiti amin a tattao ti Juda. Naitalawda a kas balud iti sabali a daga.”

²⁰Dakayo a tattao ti Jerusalem, kitaenyo! Umay dagiti kabusoryo nga aggapu iti amianan! Sadino ti yan dagiti tattao a naitalek kadakayo, dagiti tattaoyo a pagtangtangsityo?

²¹Anianto ti kunayo no iturayandakayo dagiti tattao nga impagarupyo a gagayyemyo? Marigatankayto a kas iti babai nga agpasikal.

²²Saludsodenyo no apay a napasamak kadakayo daytoy? Apay a naray-ab dagiti pagan-anayyo? Apay a naramrameskayo? Napasamak dagitoy agsipud ta nadagsen unay ti basolyo.

²³Masuktan aya ti nangisit a tao ti kolor ti kudilna? Maikkat aya ti leopardo ti labangna? Saan! No kasta ti mapasamak dakayo nga agar-aramid iti dakes masursuroyo met koma ti agaramid iti naimbag.

²⁴Iwarawaranakayto ti Apo a kas iti garami nga itayab ti angin-let-ang.

²⁵Kinuna ti Apo a daytoyto ti gasatyo. Daytoy ti inkeddengna nga aramiden kadakayo, agsipud ta linipatanyo ti Dios, ket nagtalekkayo kadagiti saan a pudno a dios.

²⁶Uksobento ti Apo ti pagan-anayyo, ket ibabainnakayto.

²⁷Nakitanakayo ni Yahweh a nagaramid iti kagurgurana. Nakitanakay a simmursurot kadagiti didiosen dagiti pagano kadagiti turturod ken taltalon; kaslakayo la lalaki nga aggartem iti asawa ti kaarrubana wenno kasla kalakian a kabalio a kumamat iti kabaian. Asikayo pay, tattao ti Jerusalem! Kaanonto ti panagbalinyo a nadalus?