Read Iloko Jeremiah 15 Bible Online

Jeremiah 15 - Iloko bible

Jeremiah 15

¹Kinuna ti Apo kaniak, “Uray no da Moises ken Samuel ti agparintumeng, diak kaasian dagitoy a tattao. Papanawem ida; diak kayat a makita ida.

²No saludsodenda ti rebbengda a papanan, ibagam daytoy kadakuada: Dagiti naikeddeng a matay iti sakit, matayda iti sakit. Dagiti naikeddeng a matay iti gubat, matayda iti gubat. Dagiti naikeddeng a matay iti bisin, matayda iti bisin. Dagiti naikeddeng a maibalud, maibaludda!

³Siak, ni Yahweh, nangikeddengak iti uppat a kita ti nakabutbuteng a didigra nga agdissuorto kadakuada: mapapataydanto iti gubat; ulod-ulodento dagiti aso dagiti bangkayda; kanento ida dagiti tumatayab, ken pagbibinggawanto dagiti atap nga animal dagiti matda.

⁴Pagbalinekto ida a pagbutbutngan dagiti pagarian ti lubong gapu iti dakes nga inaramid ni Manases nga anak ni Hezekias iti Jerusalem idi isu ti ari idiay Juda.”

⁵Kuna ti Apo, “Siasinonto ti mangngaasi kadakayo, dakayo a tattao ti Jerusalem, siasinonto ti mangdung-aw kadakayo? Siasinonto ti sumardeng tapno damagenda ti kasasaadyo?

⁶Dakayo a tattao, linaksiddak, dakayo amin tinallikudandak. Ngarud, dinissoankayo agingga a narumrumekkayo gapu ta diak magawidanen ti pungtotko.

⁷Iti tunggal ili iti daga, kasla arutang nga ipurruakkayo iti angin. Dinadaelkayo a tattaok; pinatayko dagiti annakyo gapu ta diyo insardeng ti dakes nga aramidyo.

⁸Ad-adu dagiti babbai a balo ngem dagiti darat iti igid ti baybay. Pinatayko dagiti annakyo a lallaki idinto ta ubbingda pay, ket pinagsagabak dagiti innada. Kellaat nga indissuorko kadakuada ti tuok ken buteng.

⁹Natalimudaw ti ina gapu iti ipapatay dagiti pito nga annakna; kamkamatenna ti angesna. Nagbalin a nasipnget ti aldawna, naibabain ket nasaem ti ladingitna. Papapataykayto kadagiti kabusoryo, dakayo a sibibiag pay laeng. Siak ni Yahweh, ti nangibaga iti daytoy.”

¹⁰Nagliday ketdin ti biagko! Apay nga inyanaknak pay laeng ni inak? Kasapulan a makisusik ken makisuppiatak iti amin a tao ditoy a daga. Diak nagpautang ket diak met immutang iti uray ania, ngem kaskasdi nga ilunoddak dagiti tattao.

¹¹O Apo, pumudno koma dagiti lunodda kaniak no saan a naimbag ti panagserbik kenka ken no saanko nga indawdawatan dagiti kabusorko idi adda rigatda. (

¹²Awan ti makatukkol iti landok, nangruna ti landok a nalaokan iti bronse a naggapu idiay amianan.)

¹³Kinuna ti Apo kaniak, “Ibaonkonto dagiti kabusorda a mangipanaw kadagiti sanikua ken gameng dagiti tattaok, tapno madusada gapu iti basol nga inaramidda iti entero a daga.

¹⁴Pagserbiekto ida kadagiti kabusorda iti daga a dida pay nadamdamag, agsipud ta kasla apuy ti pungtotko ket sumged iti agnanayon.”

¹⁵Ket kinunak, “O Apo, ammok a maawatam. Laglagipennak kadi ket tulongannak. Balsem dagiti mangidadanes kaniak. Dimo palubosan ida a mangpapatay kaniak. Laglagipem a gapu kenka, pinabpabainandak.

¹⁶Nagsaoka kaniak ket impangagko ti amin nga imbagam. Kukuanak, O Apo a Dios a Mannakabalin-amin, isut' gapuna a ti saom pinunnona ti pusok iti rag-o ken ragsak.

¹⁷Saanak a nakibunggoy kadagiti tattao a naayat iti katkatawa ken ragragsak. Gapu iti trabaho nga intedmo kaniak, nagmaymaysaak ket napnoak iti pungtot.

¹⁸Apay a di met la agsardengen ti panagsagsagabak? Apay a di maagasan dagiti sugatko? Apay a dida maimbagan? Panggepnak kadi a paayen a kas iti namaga a waig iti kalgaw?”

¹⁹Kastoy ti insungbat ti Apo, “No agsublika kaniak, awatenka manen nga adipenko. No agsaoka iti nasayaat a saan ketdi a dagiti awan serserbina, agbalinkanto manen a profetak. Dagiti tattao ti umayto kenka, saan a sika ti mapanto kadakuada.

²⁰No maipapan kadagiti umili, pagbalinenkanto a kas iti natibker a bakud a bronse. Karangetdakanto ngem didakanto maparmek. Addaakto a mangsalaknib kenka tapno saanka a maan-ano.

²¹Isalakankanto iti ima dagiti managdakdakes. Ikanawakanto iti pannakabalin dagiti naranggas a tattao. Siak, ni Yahweh, ti nagsao kadagitoy.”