Read Iloko Jeremiah 18 Bible Online

Jeremiah 18 - Iloko bible

Jeremiah 18

¹Kinuna ti Apo kaniak,

²“Inka iti balay ti dumadamili ket itedkonto kenka ti mensahek.”

³Napanak ngarud ket nakitak ti tao nga agdamdamili.

⁴No saan a nasayaat ti pannakasukog ti pila, masaenna manen ket baliwanna ti agaramid iti sabali.

⁵Kinuna ti Apo kaniak,

⁶“Diak aya maaramid kadagiti Israelita ti kas iti inaramid ti agdamdamili iti damilienna? Addakayo iti imak a kas iti kaadda ti pila iti ima ti dumadamili.

⁷No iti uray ania a tiempo, kunak a parutek, rumekek wenno dadaelek ti nasion wenno pagarian,

⁸ngem no pagpanawan dayta a nasion ti dakes nga aramidna, diak ituloy nga aramiden ti impangtak.

⁹Ket no kunak a mangipasdekak wenno mangbangonak iti nasion wenno pagarian,

¹⁰ngem agaramid met dayta a nasion iti dakes, diak ituloy nga aramiden ti nasayaat a panggepko.

¹¹Ngarud, ibagam kadagiti tattao ti Juda ken ti Jerusalem nga adda planok a maibusor kadakuada ket agsagsaganaak a mangdusa kadakuada. Ibagam nga isardengda ti dakes a panagbiagda ket balbaliwanda dagiti kababalin ken dagiti dakes nga aramidda.

¹²‘Saan,’ isungbatdanto. ‘Apay nga isardengmi? Agsukirkami latta ken agaramidkami iti dakes a kas iti kaykayatmi.’”

¹³Kuna ti Apo, “Saludsodem iti amin a nasion no adda kastoy a napasamaken. Nakabutbuteng ti inaramid dagiti Israelita.

¹⁴Adda kadi tiempo a maawanan iti niebe dagiti kabatoan a rangkis ti Libano? Mamagaan kadi dagiti nalamiis nga ubbog iti bantay?

¹⁵Ngem nalipatandak dagiti tattaok; agpuorda iti insenso kadagiti didiosen. Maitublakda iti dalan a rumbeng a pagnaanda; saanda a suroten ti nagkauna a dalan. Magnada kadagiti killo a dana ket awan turongenda.

¹⁶Pinagbalinda a nakabutbuteng daytoy a daga; nagbalin a mauy-uyaw iti agnanayon. Makigtotto amin a lumabas iti makitada, agwingiwingdanto iti siddaawda.

¹⁷Warawaraekto dagiti tattaok iti imatang dagiti kabusorda; kasdanto la tapok nga itayab ti angin nga aggapu iti daya. Tallikudakto ida; diakto tulongan ida inton dumteng ti didigra.”

¹⁸Kinuna dagiti tattao, “Isikattayo a pukawen ni Jeremias. Uray ta addanto latta papadi a mangisuro kadatayo, mamasirib a mamagbaga ken profeta a mangiwaragawag iti sao ti Dios. Padpadaksentayo ketdi ket isardengtayo a denggen ti ibagbagana.”

¹⁹Iti kasta, inkararagko, “O Apo, imdengam kadi ti dawatko. Denggem ti panangpadpadakes kaniak dagiti kabusorko.

²⁰Dakes aya ti supapak ti naimbag? Ngem nagkalida iti abut a pakatnagak. Laglagipem nga immayak kenka ket indawdawatak ida tapno saanka nga agpungtot kadakuada.

²¹Ngem ita, O Apo, bay-am a matay iti bisin dagiti annakda. Bay-am a matayda iti gubat. Bay-am a mabalo dagiti babbai ken matay dagiti annakda. Bay-am a matay iti sakit dagiti lallakay ken matay iti paggugubatan dagiti agtutubo a lallaki.

²²Ibaonmo dagiti agsamsam kadagiti balbalayda a di mapakpakadaan. Pagikkisem ida iti buteng. Nagkalida iti abut a pakatnagak ken nangikabilda iti silo a pangtiliw kaniak.

²³Ngem ammom, O Apo, ti panggepda a mangpapatay kaniak. Saanmo a pakawanen ti kinadakesda. Saanmo a pakawanen ti basolda. Dissoan ida inton aldaw ti pungtotmo.”