Read Iloko Jeremiah 2 Bible Online

Jeremiah 2 - Iloko bible

Jeremiah 2

¹Imbaga ti Apo kaniak

²nga innak ipakaammo daytoy a mensahe kadagiti amin nga agnaed idiay Jerusalem: “Malagipko ti kinapudnom idi ubingka; malagipko met ti ayatmo kaniak idi kakaskasarta. Sinurotnak idiay let-ang, iti maysa a daga nga awan pay mulana.

³Israel, nailasinka nga agpaay kaniak, sika ti pinilik a kasayaatan a bunga. Pinagsagabak dagiti amin a nangranggas kenka; inyegko ti didigra kadakuada. Daytoy ti sao ni Yahweh.”

⁴Denggenyo ti mensahe ti Apo, dakayo a kaputotan ni Jacob, dakayo a tribu ti Israel.

⁵Kuna ti Apo: “Ania ti pammabasol dagiti kapuonanyo kaniak? Apay a tinallikudandak? Nagdaydayawda kadagiti awan serbina a didiosen, ket nagbalinda met nga awan serbina.

⁶Saanda a sinaludsod, ‘Sadino ti ayan ti Apo a nangiruar kadatayo idiay Egipto? Sadino ti ayan ti nangidalan kadatayo idiay let-ang, daga a langalang ken ayan ti adu nga abut, namaga ken napeggad a daga, daga a saan a mapagpagnaan ken daga nga awan agnaed?’

⁷Impanko ida iti nadam-eg a daga, tapno lak-amenda dagiti bungana ken amin a naimbag a masarakan kenkuana. Ngem idi dimtengda sadiay, tinulawanda dayta a daga. Pinagbalinda a makarimon ti daga nga intedko kadakuada.

⁸Saan a sinaludsod dagiti papadi, ‘Sadino ti ayan ti Apo?’ Saandak nga am-ammo dagiti papadik; binusordak dagiti agtuturay. Iti nagan ni Baal, nagsao dagiti profeta ket nagdaydayawda kadagiti didiosen nga awan serbina.”

⁹Kuna ti Apo, “Isut' gapuna nga idatagko daytoy a pammabasol kadakayo. Idatagko pay daytoy a pammabasol kadagiti annak dagiti annakyo.

¹⁰Agpalaudkayo a mapan idiay puro ti Kitim ket kitaenyo. Mangibaonkay iti mapan idiay Kedar; matakuatanyonto nga awan pay ti kastoy a napasamak.

¹¹Addan aya nasion a nangisukat iti diosna uray pay saan a pudno a dios? Ngem insukatdak dagiti tattaok, siak a Dios a nangitan-ok kadakuada; wen, insukatdak kadagiti didiosen a saan a makatulong kadakuada.

¹²Iti kasta, siak, ni Yahweh, bilinek ti langit nga agkintayeg, pagamakek ken pagsiddaawek.

¹³Adda dua a basol dagiti tattaok: binaybay-andak nga ubbog ti danum a sibibiag, nagkalida kadagiti bubon a di mabalin a pagurnongan iti danum.

¹⁴“Tagabu aya ti Israel? Nayanak aya a tagabu? Apay ngarud nga an-anupen dagiti kabusorna?

¹⁵Kasda la leon a nagngernger kenkuana; pinagbalinda a disierto ti dagana ket dagiti ilina narbada, naan-anay a nagpanawan, awan agnaed kadakuada.

¹⁶Binurak tattao't Memfis ken Tafnes ti ulona.

¹⁷Israel, sika a mismo ti nangyeg iti daytoy a dusa ta binaybay-annak, ni Yahweh a Diosmo, idi kibkibinenka iti dalanmo.

¹⁸Ania ti maal-alam no mapanka idiay Egipto tapno uminumka iti Karayan Nile? Ania ti gunggonam no mapanka idiay Asiria tapno uminumka iti Karayan Eufrates?

¹⁹Ti mismo a kinadakesmo ti pakadusdusaam; maukomkanto gapu iti panangtallikudmo kaniak. Maammoamto ti kinapait ken kinadakes iti panangbaybay-am ken ni Yahweh a Diosmo, ken saanmon a panagbuteng kaniak. Daytoy ti saok nga Apo a Dios a Mannakabalin-amin.”

²⁰Kuna ti Apo a Dios, “Israel, nabayagen a linaksidmo ti panangiturayko. Dimo kinayat ti agtulnog ken agdaydayaw kaniak. Iti tunggal nangato a turod ken iti sirok ti nalangto a kayo, nagdaydayawka kadagiti didiosen, nagiddaka a kasla balangkantis.

²¹Immulaka a kas iti napili nga ubas, kas kasayaatan a bukel ti frutas. Ngem kitaem ti nagbalinam! Kaska la nalungsot nga ubas, nga awan serserbina, awan mangayat.

²²Uray no agdigoska iti adda apogna a danum, ken agsabonka iti adu, makitak latta ti mansa ti basolmo.

²³Kasano a kunam a dimo tinulawan ti bagim? Kasano a kunam a dika nagdaydayaw kadagiti didiosen a Baal? Kitaem ti panagbasolmo idi addaka iti tanap; kitaem ti inaramidmo. Arigmo ti agmaya a kamelio a taray a taray

²⁴nga agdardaras nga agturong iti disierto. Awan makapasardeng kenkuana. Nalaka a biroken dagiti agtarigagay kenkuana, ta sisasagana latta no masapulda.

²⁵Israel, dimo ipalubos nga agsakasakaka, wenno mamagaan ta karabukobmo. Ngem kunam, ‘Diak mabalin ti agsubli. Ay-ayatek dagiti didiosen, ket surotek ida.’”

²⁶Kuna ti Apo, “Kas iti mannanakaw a maibabain no matiliwan iti aramidna, kastanto met a maibabainkayo amin nga Israelita—dagiti ariyo ken ofisialesyo, dagiti papadi ken profetayo.

²⁷Maibabainkayto amin—dakayo nga agkuna nga amayo ti kayo, ken inayo ti bato. Mapasamakto daytoy ta tinallikudandak ket saankayo a nagsubli kaniak. Ngem no adda rigatyo, dawatenyo nga isalakankayo.

²⁸“Ngem sadino ti ayan dagiti didiosen nga inaramidyo a pagdaydayawanyo? No adda rigatyo, bay-anyo nga isuda ti mangisalakan kadakayo—no kabaelanda! Juda, adu ti didiosem a kas iti kaadu dagiti ilim.

²⁹Ania aya ti reklamoyo? Apay a sinukirdak?

³⁰Awan serserbi ti panangdusak kadakayo; diyo kayat ti paisuro kaniak. Kaskayo la narungsot a leon, a nangpapatay kadagiti profetayo.

³¹Dakay a tattao ti Israel, denggenyo a naimbag ti saok. Nagbalinak aya a let-ang kadakayo, kas iti nasipnget ken napeggad a daga? Saan! Apay ngarud a kunayo nga aramidenyonto ti kaykayatyo, ket pulos a dikayto agsubli kaniak?

³²Malipatan aya ti balasang ti alahasna? Malipatan aya ti babai ti kawesna nga agkasar? Ngem namin-adu a nalipatandak dagiti tattaok.

³³Nalaingka nga agarem! Mabalin a makasursuro kenka dagiti kadaksan a babbai.

³⁴Namansaan dagiti pagan-anaymo iti dara dagiti napanglaw ken awan basolna, saan nga iti dara dagiti mannanakaw. “Ngem uray kasta,

³⁵kunam pay laeng, ‘Awan basolko; awan duadua a nagbaawen ti pungtot ti Apo kaniak.’ Ngem siak, ni Yahweh, dusaenkanto gapu ta ilibakmo a nagbasolka.

³⁶Imbabam ta dayawmo babaen iti panagkamangmo kadagiti didiosen dagiti sabali a pagilian. Paayennakanto ti Egipto a kas iti panangpaay kenka ti Asiria.

³⁷Panawamto ti Egipto a nakadumogka gapu iti bainmo. Siak, ni Yahweh, linaksidko dagiti tattao a pagtaltalkam; awan pagimbagan a maitedda kenka.”