Read Iloko Jeremiah 25 Bible Online

Jeremiah 25 - Iloko bible

Jeremiah 25

¹Iti maikapat a tawen a panagari ni Jehoyakim nga anak ni Josias idiay Juda, naawatko ti mensahe ti Apo maipapan kadagiti amin a taga-Juda. (Daytoy ti umuna a tawen a panagari ni Nebucadnesar idiay Babilonia.)

²Kinunak kadagiti amin a tattao ti Juda ken ti Jerusalem,

³“Duapulo ket tallo a tawen itan a kasasaonak ti Apo. Nangrugi iti maika-13 a tawen a panagari iti Juda ni Josias nga anak ni Amon agpapan iti daytoy nga aldaw. Kankanayon nga ibagbagak kadakayo dagiti imbagbagana, ngem dikay nangipangag.

⁴Dikay dimngeg wenno nangipangag uray pay namin-adu a nangibaon ti Apo kadakayo kadagiti adipenna a profeta.

⁵Imbagada a paglikudanyo ti dakes a panagbiagyo ken dagiti dakes nga aramidyo, tapno mabalinyo ti agnaed iti daga nga inted ti Apo kadakayo ken kadagidi kapuonanyo kas agnanayon a sanikuayo.

⁶Imbagada a dikay agdaydayaw ken agserbi kadagiti sabali a dios. Saanyo a pagpungtoten ti Apo iti panagdaydayawyo kadagiti imahen nga inaramidyo. No tinungpalyo ti Apo, saannakay koma a dinusa.

⁷Ngem mismo a ti Apo ti nagkuna a diyo impangag. Pinagpungtotyo ketdi gapu kadagiti didiosenyo a nakaigapuan ti panangdusana kadakayo.

⁸“Ngarud, gapu ta diyo impangag dagiti sao ti Apo a Mannakabalin-amin, kastoy ti kunana,

⁹‘Paayabakto dagiti amin a tattao iti amianan agraman ni adipenko a Nebucadnesar nga ari ti Babilonia. Ibaonkonto ida a manggubat iti daytoy a nasion, kadagiti nagnaed kenkuana ken kadagiti amin a nasion a kabangibangna. Pukawekto ida a mamimpinsan. Agnanayonto nga aglangalang ti dagada ket agbalindanto a pagsidsiddaawan ken pagbutbutngan. Siak, ni Yahweh, ti nagsao iti daytoy.

¹⁰Pagsardengekto dagiti ikkisda iti ragsak ken rag-o, ken dagiti naragsak nga arimbangaw dagiti paboda. Iddepekto met dagiti silawda. Awanton ti makan.

¹¹Aglangalangto daytoy a daga ket agbalinto a nakabutbuteng ti buyana. Pitopulonto a tawen nga agserbi dagitoy a nasion iti ari ti Babilonia.

¹²Kalpasanna, dusaekto ti ari ti Babilonia ken ti nasionna gapu iti basolda. Dadaelekto ti dagada ket aglangalangto iti agnanayon.

¹³Dusaekto dayta a nasion. Idissuorkonto dagiti amin nga imbagak a maibusor kenkuana. Ipataykonto dagiti amin a naisurat iti daytoy a libro ken kadagiti amin nga insao ni Jeremias a maibusor kadakuada.

¹⁴Balsekto dagiti taga-Babilonia gapu kadagiti inaramidda, ket adunto a pagilian ken agkakatan-ok nga ari ti mangtagabu kadakuada.’”

¹⁵Imbaga kaniak ti Apo a Dios ti Israel, “Daytoy ti kopa ti arak a napno iti pungtotko. Alaem ket ipainummo kadagiti amin a nasion a pangibaonak kenka.

¹⁶Agsaruadanto inton inumenda. Agmauyongdanto gapu iti gubat a yegko kadakuada.”

¹⁷Innalak ngarud ti kopa iti ima ti Apo, ket impainumko kadagiti nasion a nangibaonanna kaniak.

¹⁸Imminum ti Jerusalem, dagiti il-ili ti Juda, dagiti ari ken dagiti pangulo tapno aglangalangda ken agbalinda a nakabutbuteng ken nakakigkigtot a buya. Iti kasta, aramatento dagiti tattao ti naganda a pagilunod. (Kasta pay laeng agingga ita.)

¹⁹Daytoy ti listaan dagiti dadduma a masapul nga uminum iti daytoy a kopa: Ti Faraon nga ari ti Egipto, dagiti ofisiales ken pangulona; amin nga Egipcio ken amin a ganggannaet idiay Egipto; amin nga ari idiay Uz; amin nga ari kadagiti siudad dagiti Filisteo: Askelon, Gaza, Ekron ken ti natda iti Asdod; amin a tattao ti Edom, Moab ken Ammon; amin nga ari ti Tiro ken Sidon; amin nga ari iti dagdaga iti igid ti Mediterranean; siudad ti Dedan, Tema ken Buz; amin a tattao a nagpukis iti ababa; amin nga ari ti Arabia; amin nga ari dagiti tribu ti let-ang; amin nga ari ti Zimri, Elam ken Media; amin nga ari ti amianan, adayo ken asideg nga agsasaruno. Masapul nga uminum dagiti amin a nasion iti rabaw ti daga. Maudi nga uminum ti ari ti Babilonia.

²⁷Kalpasanna, kinuna ti Apo kaniak, “Ibagam kadagiti tattao a siak, ni Yahweh a Mannakabalin-amin a Dios ti Israel, ti mangibilin nga uminumda agingga a mabartek ken agsaruada ket matuangda. Saandan a makabangon gapu iti gubat a yegko kadakuada.

²⁸No dida kayat nga alaen ti kopa iti imam tapno uminumda, ibagam kadakuada nga imbaga ni Yahweh a Mannakabalin-amin a masapul nga uminumda.

²⁹Irugikto ti agdadael iti bukodko a siudad. Ipagarupda aya a saandanto a madusa? Madusadanto a madusa agsipud ta iyegkonto ti gubat iti amin a tao iti rabaw ti daga. Siak, ni Yahweh a Mannakabalin-amin, ti agsasao.

³⁰“Ket sika, Jeremias, masapul nga ipakaammom dagiti amin nga imbagak. Ibagam daytoy kadagitoy a tattao, ‘Manipud langit agpukkawto ti Apo, ket agsao manipud iti nasantoan a taengna. Pukkawannanto dagiti tattaona; agriawto a kas iti agpespespes iti ubas. Mangngegto ti amin a tattao ditoy daga,

³¹ket agallangoganto ti timekna iti entero a daga. Agsipud ta adda pangpabasolan ti Apo kadagiti nasion. Ipaulogna ti sentensia iti sangkataoan ket patayennanto dagiti managdakdakes. Siak, ni Yahweh, ti nagsao iti daytoy.’”

³²Kuna ti Apo a Mannakabalin-amin nga agsasarunonto a didigraenna ti tunggal nasion. Addanto napigsa a bagio nga aggapu iti kaadaywan a pungto ti daga.

³³Iti dayta nga aldaw, maiwarawaranto dagiti pinatay ni Yahweh manipud maysa a pungto ti daga agingga iti sabali a pungto. Awanto ti mangdung-aw kadakuada. Saanto a maitanem dagiti bangkayda. Kasladanto takki a mabuntubunton iti daga.

³⁴Agsangitkayo, dakayo a pastor dagiti tattaok, agsangitkayo iti napigsa. Agdung-aw ken agiladkayo iti tapok. Umayen ti tiempo a pannakapartiyo, ket mapartikayto a kas iti napili a karnero.

³⁵Pulos nga awanto ti pamuspusan a makalisikayo.

³⁶Agsangit ken agsainnekkayo gapu ta iti pungtot ti Apo, dinadaelna ti natalna a dagada.

³⁸Binaybay-an ti Apo dagiti tattaona a kas iti panangpanaw ti leon iti rukibna. Nagbalin a disierto ti daga gapu iti nakabutbuteng a gubat ken iti gumilgil-ayab a pungtot ti Apo.