Read Iloko Jeremiah 27 Bible Online

Jeremiah 27 - Iloko bible

Jeremiah 27

¹Iti saan a nabayag kalpasan ti pannakaisaad ni Zedekias nga anak ni Josias a kas ari ti Juda, imbaga kaniak ti Apo

²nga agaramidak iti bukodko a sangol manipud iti kayo ken lalat ket ikabilko iti tengngedko.

³Kalpasanna, imbaga kaniak ti Apo nga ipakaammok ti damag kadagiti ari ti Edom, Moab, Ammon, Tiro ken Sidon babaen kadagiti imbaonda idiay Jerusalem a pannakabagida a makisao ken ni Zedekias.

⁴Imbaga kaniak ti Apo a Mannakabalin-amin a Dios ti Israel a bilinek ida nga ibagada kadagiti arida ti kinuna ti Apo,

⁵“Siak, babaen iti dakkel a pannakabalin ken pigsak, pinarsuak ti lubong, ti sangkataoan ken amin nga animal ditoy daga. Mabalinko nga ited ti lubong iti siasinoman a kayatko a pangtedan.

⁶Siak ti nangikabil kadagitoy a nasion iti babaen ti pannakabalin ti adipenko, ni Ari Nebucadnesar iti Babilonia, ket uray dagiti atap nga animal, agserbida kenkuana.

⁷Agserbinto dagiti amin a nasion kenkuana. Agserbidanto met iti anakna ken iti apokona agingga a dumteng ti tiempo a pannakaparmek ti nasionna. Kalpasanna, agserbinto ti pagilianna kadagiti nabileg a pagilian ken kadagiti mannakabalin nga ar-ari.

⁸“Ngem no addanto nasion wenno pagarian a saan a paiturayan ken ni Nebucadnesar, yegkonto a kas pangdusak ti gubat, bisin ken angol agingga a dadaelen a mamimpinsan ti ari ti Babilonia dayta a nasion wenno pagarian.

⁹Ngarud, diyo patpatien dagiti profetayo wenno ti siasinoman a mangibaga iti mapasamakto iti masakbayan babaen kadagiti tagtagainep wenno pannakiumanna iti espiritu dagiti natay wenno salamangka. Ibagada kadakayo a saanyo a pagserbian ti ari ti Babilonia.

¹⁰Al-allilawendakayo ket isudanto ti pakaigapuan ti pannakayadayoyo iti dagayo. Pagtalawenkayto ket madadaelkayto.

¹¹Ngem ti nasion a paiturayan iti ari ti Babilonia ket agserbi kenkuana, pagbatiekto iti bukodna a daga tapno talonenna ket agnaed sadiay. Siak, ni Yahweh, ti nangibaga iti daytoy.”

¹²Kastoy met laeng ti imbagak ken ni Zedekias nga ari ti Juda, “Paiturayanka iti ari ti Babilonia. Agserbika kenkuana ken kadagiti tattaona ket agbiagkanto.

¹³Apay a masapul a mataykayo iti gubat wenno bisin wenno angol? Kasta ti kinuna ti Apo a mapasamakto iti nasion a saan nga agserbi iti ari ti Babilonia.

¹⁴Diyo patpatien dagiti profeta a mangibagbaga a dikay agserbi iti ari ti Babilonia. Al-allilawendakayo laeng.

¹⁵Mismo a ti Apo ti nagkuna a saanna nga imbaon ida. Ul-ulbodendakayo laeng iti naganna. Ngarud, pagtalawennakayto ket mapapataykayto, sika ken dagiti profeta a mangibagbaga kadakayo kadagitoy a kinaulbod.”

¹⁶Kalpasanna, imbagak kadagiti papadi ken kadagiti tattao ti kinuna ti Apo, “Diyo patpatien dagiti profeta nga agkuna a maisublinto iti mabiit manipud Babilonia dagiti alikamen ti Templo. Ul-ulbodendakayo.

¹⁷Diyo ipangpangag ida. Agserbikay iti ari ti Babilonia ket agbiagkayto. Apay nga agbalin a gabsuon a batbato ken rebrebba daytoy a siudad?

¹⁸No agpayso a profetada, ken no adda kadakuada ti saok, dawatenda koma kaniak, ni Yahweh a Mannakabalin-amin a saanko a paipan idiay Babilonia dagiti nabati iti Jerusalem nga al-alikamen iti Templo ken kadagiti palasio.” (

¹⁹Idi impanaw ni Ari Nebucadnesar ni Jeconias nga anak ni Jehoyakim nga ari ti Juda, agraman dagiti natan-ok a lallaki iti Juda ken Jerusalem, imbatina dagiti monmon, palanggana a pagyanan ti danum, dagiti batay ken dagiti dadduma nga alikamen ti Templo.)

²¹“Denggenyo ti kunak, siak, ni Yahweh a Mannakabalin-amin a Dios ti Israel, maipanggep kadagiti alikamen a nabati iti Jerusalem, iti Templo ken iti palasio ti ari:

²²Maipandanto idiay Babilonia ket agtalinaeddanto sadiay agingga nga ibaw-ingko ti imatangko kadakuada. Iti dayta nga aldaw, isublikto ida iti daytoy a siudad. Siak, ni Yahweh, ti nagsao iti daytoy.”