Read Iloko Jeremiah 28 Bible Online

Jeremiah 28 - Iloko bible

Jeremiah 28

¹Iti dayta met la a tawen, iti maikalima a bulan iti maikapat a tawen a panagari ni Zedekias, kinasaonak ni profeta Hananias nga anak ni Azzur iti uneg ti Templo. Taga-Gabaon ni Hananias ken anak ni Azzur. Iti imatang dagiti papadi ken dagiti tattao, imbagana kaniak

²a kinuna ti Apo a Mannakabalin-amin a Dios ti Israel, “Pinarmekkon ti pannakabalin ti ari ti Babilonia.

³Iti uneg ti dua a tawen, isublikto iti daytoy a lugar ti amin nga alikamen iti Templo nga impan ni Ari Nebucadnesar idiay Babilonia.

⁴Isublikto ni Jeconias nga ari ti Juda ken anak ni Jehoyakim iti daytoy a lugar. Isublikto pay dagiti amin a tattao iti Juda a naipan a balud idiay Babilonia. Wen, parmekekto ti pannakabalin ti ari ti Babilonia. Siak, ni Yahweh, ti nagsao iti daytoy.”

⁵Iti imatang dagiti papadi ken dagiti amin a tattao nga agtaktakder iti Templo, kinunak ken ni profeta Hananias,

⁶“Sapay koma ta pumudno ti saom ket isubli ti Apo iti daytoy a lugar ti amin nga alikamen ti Templo a naipan idiay Babilonia. Isublina met koma dagiti amin a tattao a naipanaw a kas balud.

⁷Ngem denggem ti ibagak kenka ken kadagiti tattao.

⁸Impadto dagiti profeta nga immun-una ngem iti panawenta nga umayto ti gubat, bisin ken angol kadagiti adu a nasion ken napipigsa a pagarian.

⁹Ngem ti profeta a mangipadto iti kappia, mabigbig a pudno a profeta nga imbaon ti Apo no matungpal dagiti insaona.”

¹⁰Inikkat ni Hananias ti sangol iti tengngedko sana tinukko-tukkol.

¹¹Kinunana iti sangoanan dagiti tattao, “Imbaga ti Apo a kastoyto ti panangtukkolna iti sangol nga inkabil ni Ari Nebucadnesar iti tengnged dagiti amin a nasion. Aramidennanto daytoy iti uneg ti dua a tawen.” Kalpasanna, pimmanawak.

¹²Iti saan unay a nabayag kalpasan daytoy, imbilin ni Yahweh

¹³nga ibagak ken ni Hananias, “Kinuna ti Apo a Mannakabalin-amin a Dios ti Israel a mabalinmo a tukkolen ti kayo a sangol ngem suktannanto iti landok. Mangikabilto iti landok a sangol kadagitoy a nasion ket agserbidanto ken ni Nebucadnesar nga ari ti Babilonia. Kinunana pay nga uray dagiti atap nga animal agserbidanto ken ni Nebucadnesar.”

¹⁵Kinunak ken ni Hananias, “Denggem, Hananias! Saannaka nga imbaon ti Apo. Al-allilawem dagitoy a tattao tapno patienda ti ulbod a sasaom.

¹⁶Daytoy ti gapuna a kuna ti Apo a pukawennaka. Sakbay a maturpos daytoy a tawen, mataykanto agsipud ta imbagam kadagiti tattao a sukirenda ti Apo.”

¹⁷Ket natay ni Hananias iti maikapito a bulan iti dayta met la a tawen.