Read Iloko Jeremiah 29 Bible Online

Jeremiah 29 - Iloko bible

Jeremiah 29

¹Nagsuratak kadagiti pangulo a naikuyog kadagiti balud, kadagiti papadi, profeta ken amin nga impanaw ni Ari Nebucadnesar idiay Jerusalem ket impanna ida a kas balud idiay Babilonia.

²Insuratko daytoy kalpasan ti pannakaipanaw ni Ari Jeconias, ni inana, dagiti ofisiales ti palasio, dagiti pangulo ti Juda ken Jerusalem, dagiti mammanday ken dagiti trabahador.

³Intedko ti surat kada Elasa nga anak ni Safan ken Gemarias nga anak ni Hilkias. Isuda dagiti imbaon ni Ari Zedekias a mapan ken ni Nebucadnesar nga ari ti Babilonia. Daytoy ti nailanad iti surat,

⁴“Kuna ti Apo a Mannakabalin-amin a Dios ti Israel kadagiti amin a tattao nga impalubosna nga impanaw ni Nebucadnesar idiay Jerusalem ket impanna a kas balud idiay Babilonia:

⁵‘Agbalaykayo ket agsimpakayo. Agmulakayo ket kanenyo ti maapityo.

⁶Mangasawa ken aganakkayo. Kalpasanna, pangasawaenyo dagiti annakyo tapno aganakda met. Umadukayo koma; diyo ipalubos a bumassit ti bilangyo.

⁷Agserbikayo iti pagimbagan dagiti siudad a nangipanak kadakayo a kas balud. Agkararagkayo kaniak a maipaay kadakuada agsipud ta no narang-ay dagitoy a siudad, narang-aykayto met.

⁸Siak, ni Yahweh a Dios ti Israel, ballaagankayo a dikay paallilaw kadagiti profeta a makipagtaeng kadakayo, wenno kadagiti tattao nga agkuna a maipadtoda ti mapasamakto iti masakbayan. Diyo patpatien dagiti tagtagainepda.

⁹Aramatenda ti naganko a mangisao iti ulbod. Diak imbaon ida. Siak, ni Yahweh, ti agsasao.’

¹⁰“Kuna ti Apo, ‘Inton maturpos ti Babilonia ti pitopulo a tawenna, sarungkarankayto ket yawidkayo, kas inkarik kadakayo.

¹¹Siak laeng ti makaammo kadagiti planok a maipaay kadakayo, planok a mangparang-ay a saan ketdi a mangdidigra, plano a mangibanag iti namnamayo iti masakbayan.

¹²Umawagkayto kaniak. Agkararagkayto ket sungbatankayto.

¹³Sapulendakto ket masarakandakto, agsipud ta birokendakto iti amin a pusoyo.

¹⁴Wen, kunak a masapulandak ket isublikayto iti dagayo. Ummongenkayto manipud kadagiti nadumaduma a daga ken kadagiti amin a lugar a nangiwaraak kadakayo ket isublikayto iti daga a naggapuanyo. Siak, ni Yahweh, ti agsasao.’

¹⁵“Kunayo nga inikkannakayo ti Apo kadagiti profeta dita Babilonia.

¹⁶Daytoy ti ibaga ti Apo maipapan iti ari nga agturay a kas iti panagturay ni David ken maipapan kadagiti tattao iti daytoy a siudad, isuda a kakabagianyo a saan a naikuyog kadakayo a naipanaw a kas balud.

¹⁷Kuna ti Apo a Mannakabalin-amin, ‘Yegko ti gubat, bisin ken angol kadakuada, ket pagbalinek ida a kas igos a nalungsot a di mabalin a kanen.

¹⁸Kamatekto ida babaen iti gubat, bisin ken angol. Iti kasta, makigtotto dagiti amin a nasion iti lubong iti makitada. Sadinoman a pangiwaraak kadakuada, makigtot ken agalinggagetto dagiti tattao a makakita iti napasamak kadakuada. Rabrabakento ida dagiti tattao ket usarendanto ti naganda a pagilunod.

¹⁹Mapasamakto daytoy kadakuada agsipud ta dida tinungpal ti saok a pinaibagbagak kadakuada babaen kadagiti adipenko a profeta. Saanda a nangipangag.

²⁰Dakay amin a tattao a pinaipanko a balud idiay Babilonia, denggenyo ti saok.’

²¹“Nagsao ti Apo a Mannakabalin-amin a Dios ti Israel maipapan ken ni Ahab nga anak ni Kolaias ken ni Zedekias nga anak ni Maaseyas, isuda nga agsasao iti ulbod kadakayo iti naganna. Kinunana a yawatna ida iti pannakabalin ni Nebucadnesar nga ari ti Babilonia a mangpapatayto kadakuada iti imatangyo.

²²No adda kadagiti tattao a naipanaw iti Jerusalem a kas balud a naipan dita Babilonia ti agtarigagay a mangilunod iti siasinoman, kunananto, ‘Aramiden koma kenka ti Apo ti kas iti inaramidna kada Zedekias ken Ahab a sibibiag a pinuoran ti ari ti Babilonia.’

²³Daytoyto ti pagbanaganda ta dakes dagiti aramidda. Nakikamalalada, ket nagsaoda iti ulbod iti nagan ti Apo. Maibusor daytoy iti pagayatanna. Ammona ti inaramidda, ket agsaksi iti maibusor kadakuada. Daytoy ti sao ti Apo.”

²⁴Inted kaniak ti Apo a Mannakabalin-amin a Dios ti Israel ti mensahena nga agpaay ken ni Semaias a taga-Nehelam. Nagsurat idi ni Semaias kadagiti amin a tattao iti Jerusalem ken ni Sofonias nga anak ni padi Maaseyas ken kadagiti amin a papadi. Iti daytoy a surat, imbaga ni Semaias ken ni Sofonias:

²⁶“Pinagbalinnaka ti Apo a padi a kas sukat ni Jehoyada, ket sikan ti pangulo nga ofisial iti Templo. Pagrebbengam a kawaran ken pabaklayan iti landok ti tunggal mauyong nga aginkukuna a profeta.

²⁷Apay a dimo binabalaw ni Jeremias a taga-Anatot idi agparparang a kas profeta kadagiti tattao?

²⁸Masapul a mababalaw ni Jeremias agsipud ta imbagana kadagiti tattao idiay Babilonia a maibaludda sadiay iti mabayag. Isut' gapuna nga agbalayda koma, agsimpada ken kanenda ti apitda.”

²⁹Imbasa ni Sofonias daytoy a surat kaniak,

³⁰ket imbilin kaniak ti Apo

³¹nga ipadamagna kadagiti amin a balud idiay Babilonia ti imbaga ni Yahweh maipapan ken ni Semaias: “Siak, ni Yahweh, dusaekto ni Semaias ken amin a kaputotanna. Saanko nga imbaon ni Semaias ngem nagpammarang kadakayo a kas maysa a profeta. Inallilawnakayo a mamati iti ulbod a saona. Awanto ti kaputotanna a makipagnaed kadakayo. Saannanto a mauray dagiti naimbag nga ipaayko kadagiti tattaok. Ngamin, insurona ida nga agsukir kaniak. Siak, ni Yahweh, ti nagsao iti daytoy.”