Read Iloko Jeremiah 3 Bible Online

Jeremiah 3 - Iloko bible

Jeremiah 3

¹Kuna ti Apo, “No isina ti lalaki ti asawana, ket pumanaw ti babai sa asawaen ti sabali, saan a mabalin a sublian ti lalaki ti asawana. Daytoy nga aramid ti mangtulaw iti daga. Ngem adu idi ti kaayan-ayatmo, Israel, ket ita kayatmo manen ti agsubli kaniak!

²Tangadem dagiti tapaw dagiti turod. Adda aya lugar a dimo nakikaiddaan? Nagtugawka iti igid dagiti dalan a nagur-uray kadagiti makikaidda kenka. Kaska la Arabo nga agpadpadaan iti sanebenna iti let-ang. Tinulawam ti daga babaen iti kinabalangkantismo.

³Daytoy ti gapuna a di nagtudo ken di met nagarbis. Balangkantiska a babai; awan a pulos ti babainmo.

⁴“Ita, kunam kaniak, ‘Sika ti amak, ket inay-ayatnak manipud pay idi ubingak!

⁵Saan nga agnanayon ti pungtotmo; agpatingga ti ungetmo!’ Daytoy ti kinunam, Israel, ngem nagum-umaka a nagaramid iti dakes.”

⁶Idi panawen ni Ari Josias, kinuna ti Apo kaniak, “Nakitam kadi ti inaramid ti Israel, dayta mangliliput a babai? Tinallikudannak ket simmang-at kadagiti nangato a turod ket nagbalangkantis iti tunggal sirok ti nalangto a kayo.

⁷Impagarupko a kalpasan ti panagaramidna kadagitoy, agsubli kaniak ngem saan a nagsubli. Nakita amin daytoy ti manangallilaw a kabsatna a Juda.

⁸Nakita met ti Juda nga insinak ti Israel, ket pinanawak agsipud ta naglikudannak ket nakikamkamalala. Nupay kasta, saan latta a nagbuteng ti mangliliput a kabsatna a Juda. Nakikamkamalala met

⁹a kas ketdin awan ti aniamanna kenkuana. Tinulawanna ti daga, ket nagbalangkantis babaen iti panagdaydayawna kadagiti bato ken kayo.

¹⁰Kalpasan amin dagitoy, naginsusubli kaniak ti Juda, ti manangallilaw a kabsat ti Israel. Saanna nga impapuso ti panagsublina. Siak, ni Yahweh, ti nagsao iti daytoy.”

¹¹Kinuna ti Apo kaniak a nupay tinallikudan ti Israel, impakitana a naim-imbag ngem ti manangallilaw a Juda.

¹²Imbagana kaniak nga innak idiay amianan ket ipakaammok daytoy iti Israel, “Mannakikamalala nga Israel, agsublika kaniak. Manangngaasiak ket saanak nga agpungtot. Saan nga agnanayon ti pungtotko kenka.

¹³Isuna laeng nga annugotem ti basolmo kaniak ket sinukirmo ni Yahweh a Diosmo. Ipudnom kaniak nga inayatmo dagiti didiosen iti sirok ti tunggal nalangto a kayo, ket dimo impangag dagiti bilinko. Siak, ni Yahweh, ti nagsao iti daytoy.

¹⁴“Agsublikayo, dakayo a saan a napudno a tattao agsipud ta kukuakayo. Mangalaak iti maysa kadakayo iti kada ili ken dua iti kada familia ket isublikayo idiay Bantay Sion.

¹⁵Mangisaadakto kadagiti agtuturay nga agtulnog kaniak. Iturayandakayto a buyogen ti kinasirib ken pannakaawat.

¹⁶Inton umadukayon iti daga, saanton a saritaen dagiti tattao ti maipapan iti ‘Lakasa ti Tulag ni Yahweh.’ Didanton panunoten wenno lagipen daytoy. Didanton masapul ket didanton agaramid iti sabali.

¹⁷Iti dayta a tiempo, managanto ti Jerusalem iti ‘Trono ni Yahweh.’ Aguummongto sadiay dagiti nasion tapno agdaydayawda kaniak. Didanton tungpalen ti tarigagay ti dakes ken nasukir a pusoda.

¹⁸Tumiponto ti Israel iti Juda ket agkuyogdanto nga agawid manipud iti daga iti amianan ket agsublida iti daga nga intedko kadagidi kapuonanyo a kukuada iti agnanayon.”

¹⁹Kuna ti Apo, “Israel, tinarigagayak nga awatenka a kas anak, ket ikkanka iti kapintasan a daga iti lubong. Impagarupko nga ibilangnak nga ama ken saannakton a paglikudan.

²⁰Ngem arigmo iti babai a liputanna ti asawana, saanka a napudno kaniak. Siak, ni Yahweh, ti nagsao iti daytoy.”

²¹Adda mangngeg a saibbek kadagiti tapaw dagiti turod; agdungdung-aw ken agpakpakaasi dagiti Israelita. Ta nagbiagda a managbasol, ket naglikudanda ti Apo a Diosda.

²²Agsublikayo, dakay amin a nangtallikud iti Apo; paimbagennakayto ket pagbalinennakayto a napudno. Kunayo, “Wen, agsublikami iti Apo, agsipud ta isu ti Diosmi.

²³Awan ti naitulong ti panagdaydayaw kadagiti didiosen kadagiti tapaw dagiti turod. Aggapu laeng iti Apo a Diostayo ti pannakaisalakan ti Israel.

²⁴Ngem gapu iti panagdaydayaw ken ni Baal a didiosen ti pannakaibabain, napukawmi dagiti pangen, arban ken annakmi—amin a nagbannogan dagidi kapuonanmi manipud idi punganay.

²⁵Rumbeng nga agiddatayo a sibabain ket abbongannatayo iti pannakaibabaintayo. Nagbasoltayo a kankanayon iti Apo a Diostayo, datayo ken dagiti kapuonantayo. Ditay tinungpal dagiti bilinna.”