Read Iloko Jeremiah 30 Bible Online

Jeremiah 30 - Iloko bible

Jeremiah 30

¹Kinuna kaniak ti Apo a Dios ti Israel, “Isuratmo iti libro dagiti amin nga imbagak kenka.

³Ngamin, dumtengen ti tiempo a panangisublik iti sigud a kasasaad dagiti tattaok iti Israel ken iti Juda. Isublikto ida iti daga nga intedko kadagidi kapuonanda tapno tagikuaendanto manen. Siak, ni Yahweh, ti agsasao.”

⁴Kuna ti Apo kadagiti tattao iti Israel ken Juda,

⁵“Nangngegmi ti nakabutbuteng nga ikkis, ikkis a nakaal-alliaw, saan nga ikkis ti talna.

⁶Ita, panunotenyo daytoy! Awan ti lalaki nga aganak, ngem apay a makitak ti tunggal lalaki a mangil-ilut iti tianna a kas iti agpasikal a babai? Apay a bumbumsag ti tunggal maysa?

⁷Adda dumteng nga aldaw a nakabutbuteng. Awan ti aldaw a makapada iti daytoy; agrigatto dagiti tattaok, ngem makalasatdanto.”

⁸Kuna ti Apo a Mannakabalin-amin, “Inton dumteng dayta nga aldaw, tukkolekto ti sangol iti tengngedda. Pugsatekto dagiti kawarda ket saanton a tagabuen ida dagiti ganggannaet.

⁹Agserbidanto ketdi kaniak, siak, ni Yahweh a Diosda, ken iti ari nga isaadkonto a nagtaud iti maysa a kaputotan ni David.

¹⁰“Dikay agbuteng, dakayo a tattaok; dikay agamak, dakayo nga Israelita. Isalakankayto iti dayta adayo a lugar, iti dayta a daga a nakaibaludanyo. Agawidkayto iti bukodyo a daga, ket agbiagkayto a sitatalna. Natalgedkayto ket awanto ti mangbutbuteng kadakayo.

¹¹Umayakto kadakayo tapno isalakankayo. Pukawekto a mamimpinsan dagiti amin a nasion a nangiwarawaraak kadakayo, ngem saankayto a dadaelen. Dusaenkayto a dusaen, ngem no dusaenkayo, dikayto unay parigaten. Siak, ni Yahweh, ti nagsao iti daytoy.”

¹²Kuna ti Apo kadagiti tattaona, “Saan a maagasan dagiti sugatyo, saan a mapaimbag dagiti dunoryo.

¹³Awan ti mangaywan kadakayo; awan agas ti gaddilyo, awan namnama nga umimbagkayo.

¹⁴Nalipatandakayo ti amin a kaayan-ayatyo; saandakayon a pagan-ano. Kaskayla kabusor a dinarupko, nadagsen ti pannakadusayo, agsipud ta adu dagiti basolyo, ken napalalo ti kinadakesyo.

¹⁵Saankayon nga agasug, saanen a maep-ep ti ut-ot dagiti sugatyo. Kastoy ti panangdusak kadakayo, agsipud ta adu dagiti basolyo, ken nakaro ti kinadakesyo.

¹⁶Ngem ita, maalun-onto met dagiti mangalun-on kadakayo, ket maipanawto a kas balud dagiti amin a kabusoryo. Maparigatto met dagiti amin a mangparigat kadakayo, ket masamsamanto met dagiti mangsamsam iti kinabaknangyo.

¹⁷Paimbagenkayto manen, paimbagekto dagiti sugatyo, uray kuna dagiti kabusoryo, ‘Nabaybay-anen ti Sion, awanen ti mangikankano kenkuana.’ Siak, ni Yahweh, ti nagsao iti daytoy.”

¹⁸Kuna ti Apo, “Isublikto dagiti tattaok iti dagada, kaasiakto ti tunggal familia. Mabangonto manen ti Jerusalem, ket maipatakderto manen ti palasiona.

¹⁹Agkantanto iti pagdaydayaw dagiti agnaed sadiay; agpukkawdanto gapu iti rag-oda. Paraburakto ida ket umadunto ti bilangda; bendisionakto ida ket maidaydayawdanto.

²⁰Isublikto ti sigud a pannakabalin ti nasion, ket ipasdekko manen a nalagda; dusaekto ti amin a mangidadanes kadakuada.

²¹Agtaudto iti nasionda ti mangituray kadakuada, agtaudto ti prinsipeda kadagiti tattaoda. Ayabakto ket umasidegto kaniak, ta awan ti umay a saan a naawis. Isudanto dagiti tattaok, ket siakto ti Diosda. Siak, ni Yahweh, ti nagsao iti daytoy.”

²³Nadawel a bagio ti kayarigan ti pungtot ni Yahweh. Kasla allawig a bumtak iti ulo dagiti managdakdakes. Saan nga agsardeng no dina maibanag ti amin a panggepna nga aramiden. Iti masakbayan, nalawagto a maawatan daytoy dagiti tattaona.