Read Iloko Jeremiah 31 Bible Online

Jeremiah 31 - Iloko bible

Jeremiah 31

¹Kuna ni Yahweh, “Dumtengen ti tiempo a siakto ti Dios ti amin a tribu ti Israel ket isudanto dagiti tattaok.

²Kinaasiak dagiti nakalasat iti patay idiay let-ang. Idi tarigagayan dagiti Israelita ti aginana,

³nagparangak kadakuada manipud iti adayo. Tattao ti Israel, inay-ayatkayo ket itultuloyko nga ipakita ti napudno a panagayatko kadakayo.

⁴Bangonenkayto manen. Alaenyonto manen dagiti panderetayo ket agsasalakayo a siraragsak.

⁵Agmulakayto manen iti ubas kadagiti turturod ti Samaria ket kanento dagiti agmula ti bunga dagiti kaubasan.

⁶Wen, dumtengen ti tiempo nga ipukkaw dagiti agbambantay nga adda kadagiti turod ti Efraim, ‘Umaykayon! Sumang-attayo idiay Sion ta mapantay iti Apo a Diostayo.’”

⁷Kuna ni Yahweh, “Kantaanyo a sirarag-o ti Israel, ti kangrunaan kadagiti nasion. Ikantayo ti pagdaydayawyo ket kunayo, ‘Insalakan ti Apo dagiti tattaona; inispalna dagiti amin a natda iti Israel.’

⁸Alaekto ida manipud iti amianan; yawidkonto ida manipud iti pungto ti daga. Kumuyogto kadakuada dagiti bulsek ken dagiti pilay, dagiti inna ken dagiti dandani agpasngay. Dakkeldanto a nasion nga agsubli.

⁹Agsangsangitto dagiti tattaok nga agsubli; agkarkararagdanto bayat ti panangyawidko kadakuada. Iturongkonto ida kadagiti agay-ayus a danum; nasimpa a dalan ti pagnaanda tapno dida maitibkol. Siak ti pannakaama ti Israel, ket ni Efraim ti inauna nga anakko.”

¹⁰Kuna ni Yahweh, “Dumngegkayo kaniak, dakayo a nasion, ipakaammoyo ti saok kadagiti adayo a purpuro. Winarawarak dagiti tattaok ngem ummongek ken bantayakto ida a kas iti panangaywan ti agpaspastor iti arbanna.

¹¹Winayawayaak dagiti Israelita, ket inispalko ida iti pannakabalin ti napigsa a nasion.

¹²Umaydanto agkanta a sirarag-o iti tapaw ti Bantay Sion. Maragsakandanto kadagiti sagsagutko a trigo, arak, ken lana, kadagiti karnero ken kadagiti baka. Kasdanto hardin a nasayaat ti pannakasibogna, addanto aminen a masapulda.

¹³Agsalanto dagiti babbalasang ket agragsakdanto; dagiti babbaro ken dagiti lallakay agrag-odanto. Liwliwaekto ida ket agbalinto a rag-o ti leddaangda, agbalinto a ragsak ti ladingitda.

¹⁴Pennekekto dagiti papadi iti naimas a taraon, ket dagiti tattaok mapnekdanto iti imbag nga ipaayko kadakuada. Daytoy ti sao ni Yahweh.”

¹⁵Kuna ni Yahweh, “Idiay Rama mangngeg ti arimbangaw, nasaem a sangsangit ken dungdung-aw. Dungdung-awan ni Raquel dagiti annakna, agsangsangit ket dina kayat ti maliwliwa, ta nataydan amin a padapada.

¹⁶Isardengyon ti agsangsangit, ket punasenyo dagiti luayo. Magunggonaanto ti amin nga impaayyo kadagiti annakyo, agsublidanto manipud iti daga dagiti kabusor.

¹⁷Adda namnama iti masakbayanyo; agsublinto dagiti annakyo iti bukodda a daga. Siak, ni Yahweh, ti nagsao iti daytoy.

¹⁸“Mangngegko dagiti Israelita a mangisangsangit, ‘O Apo, kaskami la atap a toro, ngem insuronakam nga agtulnog. Yawidnakami iti dagami; sisasaganakami nga agsubli kenka nga Apo a Diosmi.

¹⁹Naglikudandaka ngem iti saan a mabayag, kayatmi met la ti agsubli kenka. Kalpasan ti panangdusam kadakami, dinandanogmi ti barukongmi a mangipakita iti panagbabawimi. Nalalais ken naibabainkami, ta nagbasolkami idi agtutubokami.’

²⁰“Israel, napategka nga anakko, anakko a dungdungoek unay. Tunggal baliksek ti naganmo, maragsakanak a makalagip kenka. Kail-iliwnaka toy pusok; kaasiankanto.

²¹Mangikabilkayo iti pagilasinan, markaanyo ti dalan; birokenyo manen daydi dalan a nagnaanyo. Agsublikayo, dakayo nga Israelita, agawidkayo kadagiti il-ili a pinanawanyo.

²²Kasano pay kabayag ti panagsarimadengyo, dakayo a saan a napudno a tattao? Pinarsuak ti maysa a baro a banag; naidumduma a kas iti babai a mangsalaknib iti lalaki.”

²³Kastoy ti kuna ni Yahweh a Mannakabalin-amin a Dios ti Israel, “Inton isublik dagiti tattao iti dagada, kunadanto idiay Juda ken kadagiti il-ilina, ‘Bendisionan koma ti Apo ti nasantoan a turod ti Jerusalem, ti nasantoan a lugar a pagtaenganna.’

²⁴Agnaedto dagiti tattao idiay Juda ken iti amin nga il-ilina. Addanto dagiti mannalon ken dagiti agpaspastor agraman arbanda.

²⁵Pabaroekto ti pigsa dagiti nautoyan ket bussogekto dagiti napakapsutan iti bisin.

²⁶Iti kasta, kunanto dagiti tattao, ‘Naimas ti turogko ket napigsaak a bimmangon.’

²⁷“Siak, ni Yahweh, kunak a dumtengen ti tiempo a punnoek ti daga ti Israel ken Juda iti tao ken iti animal.

²⁸No kasano ti annadko idi a nangparut, nangrebba, nangparmek, nangdadael ken nangrakrak kadakuada, kastanto met ti annadko a mangimula ken mangpadakkel kadakuada.

²⁹Inton umay dayta a tiempo, saanton a kuna dagiti tattao, ‘Naalsem nga ubas ti kinnan dagiti kapuonan, ngem dagiti annakda ti naalino.’

³⁰Nupay kasta, maalinonto ti siasinoman a mangan iti naalsem nga ubas, ket matayto ti tunggal maysa gapu iti basolna met laeng.”

³¹Kuna ni Yahweh, “Dumtengen ti tiempo a mangaramidak iti baro a katulagak kadagiti Israelita ken kadagiti tattao ti Juda.

³²Saanto a kas iti pannakitulagko kadagidi kapuonanda idi iruarko ida idiay Egipto. Uray no arigko iti maysa nga asawa kadakuada, sinalungasingda ti katulaganmi.

³³Inton dumteng dayta a tiempo, kastoyto ti pagtutulaganmi kadagiti Israelita: Ikabilkonto ti lintegko iti panunotda ket isuratkonto iti pusoda. Siakto ti Diosda ket isudanto dagiti tattaok.

³⁴Saanton a masapul nga isuroda dagiti kaarruba ken kailianda a mangammo ken ni Yahweh. Ammodakto amin a tattao, natan-ok man wenno nanumo. Pakawanekto dagiti basolda, ket lipatekton dagiti dakes nga inaramidda. Siak, ni Yahweh, ti nagsao iti daytoy.”

³⁵Ited ni Yahweh ti init a silaw iti aldaw, iti rabii, pagraniagenna ti bulan ken dagiti bituen. Kiburenna ti baybay ket agdaranudor dagiti dalluyon; ni Yahweh a Mannakabalin-amin ti naganna.

³⁶Inkarina nga agtalinaedto ti Israel iti agnanayon, santo la mapukaw inton awanen urnos ti sangaparsuaan.

³⁷Iti aldaw a marukod koma ti langit ken masukimat dagiti nakaibatayan ti daga, isunto met ti aldaw a laksidenna dagiti Israelita, gapu kadagiti amin nga inaramidda. Daytoy ti sao ni Yahweh.

³⁸“Dumtengen ti tiempo,” kuna ni Yahweh, “a mabangonto manen ti entero a siudad manipud iti Torre ti Hananel agingga iti lugar a managan iti Ruangan iti Suli.

³⁹Agtuloy ti beddeng iti laud agingga iti turod ti Gareb ket agsikko iti Goa.

⁴⁰Nasantoanto kaniak ti entero a tanap a pakaitaneman dagiti natay ken pagibellengan iti basura. Nasantoanto met ti amin a talon iti surongen ti waig a Kidron agingga iti lugar a managan iti Ruangan ti Kabalio iti daya. Saanton a marakrak wenno madadael daytoy a siudad.”