Read Iloko Jeremiah 33 Bible Online

Jeremiah 33 - Iloko bible

Jeremiah 33

¹Idi sipupupokak pay laeng iti paraangan ti pagguardiaan, dimteng manen kaniak ti mensahe ti Apo.

²Nagsao kaniak ti Apo a nangbukel ken nangipasdek iti daga. Yahweh ti naganna. Kinunana:

³“Awagannak ket sungbatankanto. Ibagakto kenka dagiti nakaskasdaaw ken naindaklan a banag a saanmo pay nga ammo.

⁴Siak, ni Yahweh a Dios ti Israel, kunak a marakrakto dagiti balbalay iti Jerusalem ken ti palasio ti ari ti Juda, tapno mausarda iti iraraut dagiti taga-Babilonia. Addanto dagiti sumaranget kadakuada ket mapusekto ti siudad kadagiti bangkay dagiti tattao a papatayek gapu iti unget ken pungtotko. Binaybay-ak daytoy a siudad gapu kadagiti dakes nga aramid dagiti tattaona.

⁶Ngem agasakto daytoy a siudad ken dagiti tattaona ket nasalun-atdanto manen. Iparangarangkonto kadakuada ti nabuslon a kappia ken kinatalged.

⁷Parang-ayekto ti Juda ken ti Israel. Isublikto ida iti sigud a kasasaadda.

⁸Dalusakto ida kadagiti biddutda. Pakawanekto dagiti basbasolda ken ti panagsukirda kaniak.

⁹Pagtangsitkonton ti Jerusalem ket isunton ti gubbuayan ti ragsak ken dayawko. Agbuteng ken agkintayegto dagiti amin a nasion ditoy daga a makadamag kadagiti imbag nga ipaayko kadagiti tattao ti Jerusalem ken ti rang-ay nga yegko iti siudad.”

¹⁰Kinuna ti Apo, “Kunkuna dagiti tattao a kasla let-ang daytoy a disso. Awan tao wenno animal nga agnaed. Ket pudno ti ibagbagada. Awan tao ita kadagiti ili iti Juda wenno kadagiti kalsada iti Jerusalem. Awan tao wenno animal nga agnaed sadiay. Ngem kadagitoy a lugar, mangngegyonto manen dagiti ariwawa

¹¹ti ragsak ken rag-o, ken dagiti naragsak a parambak ti kasar. Mangngegyonto ti kanta dagiti tattao a mangyeg iti Templok kadagiti datonda a pagyaman. Kunadanto, ‘Agyamankayo iti Apo a Mannakabalin-amin, agsipud ta isu naimbag, ket agnanayon ti ayatna.’ Parang-ayekto daytoy a daga. Isublikto ti sigud a kasasaadna. Siak, ni Yahweh, ti nagsao iti daytoy.”

¹²Kinuna ti Apo a Mannakabalin-amin, “Iti daytoy a daga a mayarig iti let-ang ken awan tao wenno animal nga agnaed, addanto manen pagpaaraban dagiti agpaspastor kadagiti karneroda.

¹³Kadagiti ili iti katurturodan, kadagiti arisadsad dagiti turturod ken iti abagatan a Juda, iti sakup ti Benjamin, kadagiti barrio iti kabangibang ti Jerusalem, ken kadagiti il-ili ti Juda, bilangento manen dagiti agpaspastor dagiti karneroda. Siak, ni Yahweh, ti nagsao iti daytoy.”

¹⁴Kinuna ti Apo, “Dumtengen ti tiempo a panangtungpalko iti karik kadagiti Israelita ken kadagiti Judio.

¹⁵Iti dayta a tiempo, mangpiliakto iti agbalin nga ari nga agtaud iti kaputotan ni David. Aramidento dayta nga ari ti naimbag ken nalinteg iti entero a daga.

¹⁶Inton dumteng dayta a tiempo, maispalto dagiti tattao ti Juda ket agbiagto a sitatalged dagiti umili iti Jerusalem. Daytoyto ti ipanaganda iti nasion ken siudadda, ‘Insalakannatayo ti Apo.’

¹⁷Siak, ni Yahweh, ikarik nga addanto latta kaputotan ni David nga agari iti Israel.

¹⁸Addanto latta padi nga agtaud iti tribu ni Levi nga agserbi kaniak ken mangidatag kadagiti daton a mapuoran, kadagiti daton a makan ken kadagiti sakrifisio.”

¹⁹Kinuna ti Apo kaniak,

²⁰“Nakitulagak iti aldaw ken rabii tapno agparangda a kanayon iti naikeddeng a tiempoda. Saan a masalungasing dayta a katulagan.

²¹Kasta met a nakitulagak ken ni David nga adipenko nga addanto latta kaputotanna nga agbalin nga ari. Nakitulagak met kadagiti papadi iti kaputotan ni Levi nga agserbidanto a kanayon kaniak. Saan a mawaswas dagitoy a katulagan.

²²Paaduekto dagiti kaputotan ni David nga adipenko ken ti bilang dagiti papadi iti tribu ni Levi nga agserbi kaniak. Narigatto a bilangen ti kaaduda a kas iti karigat ti panangbilang kadagiti bituen wenno kadagiti darat iti igid ti baybay.”

²³Kinuna kaniak ti Apo,

²⁴“Saanmo aya a nadlaw ti kunkuna dagiti tattao a linaksidko ti Israel ken Juda dagiti dua a familia a pinilik? Iti kasta, lalaisenda dagiti tattaok ken saandan nga ibilang ida a nasion.

²⁵Ngem siak, ni Yahweh, kas iti panangituyangko ti aldaw ken rabii, dagiti annuroten ti daga ken ti tangatang,

²⁶kastanto met ti panangtungpalko iti nakitulagak kadagiti kaputotan ni Jacob ken ni David nga adipenko. Pumiliakto iti maysa a kaputotan ni David a mangituray kadagiti kaputotan ni Abraham, ni Isaac ken ni Jacob. Kaasiakto dagiti tattaok ket parang-ayekto manen ida.”