Read Iloko Jeremiah 36 Bible Online

Jeremiah 36 - Iloko bible

Jeremiah 36

¹Idi maikapat a tawen a panagari ni Jehoyakim nga anak ni Josias idiay Juda, kinuna kaniak ti Apo,

²“Mangalaka iti pagsuratan ket isuratmo amin nga imbagak kenka a maibusor iti Israel, iti Juda ken kadagiti amin a nasion. Isuratmo amin nga imbagak kenka manipud idi damo a pannakisaok kenka, idi ni Josias ti ari, agingga ita.

³Nalabit nga inton mangngeg dagiti tattao ti Juda dagiti amin a didigra a pinanggepko nga idissuor kadakuada, agbalbaliwda ket ikkatenda dagiti amin a dakes a kababalinda. Iti kasta, pakawanekto ti kinadakes ken basolda.”

⁴Inayabak ngarud ni Baruc nga anak ni Nerias. Indiktarko kenkuana dagiti amin nga imbaga ti Apo kaniak, ket insuratna amin ida iti pagsuratan.

⁵Kalpasanna, imbilinko kenkuana, “Saanakon a mapalubosan a sumrek iti Templo.

⁶Ngem kayatko a mapanka sadiay inton sumaruno a panagayunar dagiti tattao ket ipigsam a basaen daytoy nalukot a pagbasaan a nangisuratam iti indiktarko kenka tapno mangngegda dagiti amin nga imbaga ti Apo kaniak. Aramidem daytoy iti lugar a mangngeg dagiti amin a tattao agraman dagiti taga-Juda a naggapu kadagiti il-ilida.

⁷Mabalin nga agkararagdanto iti Apo ket idiandanton dagiti dakes nga aramidda, ta no saan agdissuor kadakuada ti napalalo a pungtot ken ungetna.”

⁸Imbasa ni Baruc idiay Templo dagiti amin nga imbaga ti Apo kas imbilinko nga aramidenna.

⁹Iti maikasiam a bulan ti maikalima a tawen a panagari idiay Juda ni Jehoyakim nga anak ni Josias, nagayunar dagiti tattao tapno magun-odda ti parabur ni Yahweh. Inaramid daytoy dagiti amin nga agnaed idiay Jerusalem ken amin a naggapu kadagiti il-ili ti Juda.

¹⁰Kalpasanna, binasa ni Baruc ti nalukot a pagbasaan a nakailanadan iti amin nga insaok. Dumdumngeg dagiti tattao bayat ti panagbasana. Inaramidna daytoy iti Templo, iti kuarto ni Gemarias nga anak ni Safan a mammagbaga iti ari. Adda ti kuartona iti akingngato a tukad iti serkan ti Baro a Ruangan ti Templo.

¹¹Nangngeg ni Mikaias nga anak ni Gemarias ken apoko ni Safan ti panangbasa ni Baruc iti sao ni Yahweh a nailanad iti nalukot a pagbasaan.

¹²Napan iti palasio ket simrek iti kuarto ti mammagbaga iti ari nga ayan dagiti ofisiales a madama nga agmimiting. Adda sadiay ni Elisama a mammagbaga iti ari, ni Delaias nga anak ni Semaias, ni Elnatan nga anak ni Acbor, ni Gemarias nga anak ni Safan, ni Zedekias nga anak ni Hananias ken dagiti amin nga ofisiales.

¹³Impakaammo ni Mikaias dagiti amin a nangngegna nga imbasa ni Baruc kadagiti tattao.

¹⁴Iti kasta, imbaon dagiti ofisiales ni Jehudi a mangibaga ken ni Baruc nga ipanna kadagiti ofisiales ti pagbasaan a binasana kadagiti tattao. (Ni Jehudi ti anak ni Netanias ken apoko ni Selemias, ken apoko ni Cusi iti tumeng.) Impan ni Baruc ti pagbasaan kadakuada.

¹⁵“Agtugawka,” kinunada, “ket ibasam kadakami.” Binasa ni Baruc ti nalukot a pagbasaan.

¹⁶Kalpasan ti panangbasana, nagkikinnitada a sidadanag ket kinunada ken ni Baruc, “Masapul nga ibagami daytoy iti ari.”

¹⁷Sinaludsodda kenkuana, “Ibagam man kadakami no kasano ti panangisuratmo kadagitoy. Indiktar kadi ni Jeremias kenka?”

¹⁸“Wen,” insungbat ni Baruc. “Indiktar ni Jeremias ti amin nga insuratko iti daytoy a pagbasaan.”

¹⁹Imbagada kenkuana, “Masapul nga aglemmengkayo, sika ken ni Jeremias, ket diyo ibaga iti siasinoman no sadino ti paglemmenganyo.”

²⁰Inkabil dagiti ofisiales ti nalukot a pagbasaan iti kuarto ni Elisama a mammagbaga sada napan iti paraangan ti palasio ket imbagada amin iti ari.

²¹Pinaala ti ari ti nalukot a pagbasaan ken ni Jehudi iti kuarto ni Elisama. Imbasa ni Jehudi iti ari ken kadagiti amin nga ofisiales nga agtatakder iti lawlawna.

²²Tiempo ti lam-ek idi ket agtugtugaw ti ari iti asideg ti paginudoan iti palasio a pagnanaedanna iti tiempo ti lam-ek.

²³Kada mabasa ni Jehudi ti tallo wenno uppat a binnatog, ragasen ti ari ti nabasa babaen iti bassit nga imuko sana ipurruak iti apuy ti paginudoan. Kasta a kasta ti naaramid agingga a napuoran ti entero a pagbasaan.

²⁴Ngem saan latta a nagbuteng wenno nagbabawi ti ari ken dagiti ofisialesna a nakangngeg iti amin a naibasa.

²⁵Nupay nagpakpakaasi da Elnatan, Delaias ken Gemarias a saanna a puoran ti pagbasaan, dina inkaskaso ida.

²⁶Kalpasanna, binilin ti ari ni prinsipe Jerameel, agraman ni Seraias nga anak ni Azriel, ken ni Selemias nga anak ni Abdeel a tiliwendakami ken ni Baruc a sekretariok. Ngem inlemmengnakami ti Apo.

²⁷Kalpasan ti panangpuor ni Ari Jehoyakim iti nakaisuratan ti indiktarko ken ni Baruc, imbaga ti Apo kaniak

²⁸a mangalaak iti sabali a pagsuratan. Imbagana nga isuratko dagiti amin a nailanad iti umuna a pagbasaan.

²⁹Imbilinna nga ibagak iti ari, “Pinuoram ti pagbasaan. Sinaludsodmo ken ni Jeremias no apay nga insuratna nga umay ti ari ti Babilonia ket dadaelenna daytoy a daga ken papatayenna dagiti tattao ken animal.

³⁰Siak, ni Yahweh, kunak kenka, Ari Jehoyakim, nga awanto kadagiti kaputotam ti agari. Maipurruakto ti bangkaymo iti lugar a mainitan iti aldaw ken malinnaawan iti rabii.

³¹Dusaenkanto ken dagiti kaputotam agraman dagiti ofisialesmo gapu kadagiti basolyo. Awan kadakayo kasta met kadagiti taga-Jerusalem ken taga-Juda, ti nangipangag kadagiti ballaagko kadakayo. Iti kasta, idissuorkonto kadakayo ti amin a didigra nga imbagak a mapasamakyonto.”

³²Nangalaak iti sabali a nalukot a pagbasaan. Intedko ken ni Baruc a sekretariok ket insuratna ti amin nga imbagak. Insuratna dagiti amin a nailanad iti umuna a nalukot a pagbasaan ken amin nga umasping a mensahe nga indiktarko.