Read Iloko Jeremiah 37 Bible Online

Jeremiah 37 - Iloko bible

Jeremiah 37

¹Insaad ni Nebucadnesar nga ari ti Babilonia ni Zedekias nga anak ni Josias a kas sukat ni Jeconias nga anak ni Jehoyakim a kas ari ti Juda.

²Ngem saan nga impangag ni Zedekias wenno dagiti ofisiales wenno dagiti tattao ti mensahe nga imbaga kaniak ni Yahweh.

³Imbaon ni Ari Zedekias ni Jehucal nga anak ni Selemias ken ni Sofonias a padi nga anak ni Maaseyas, nga umay kaniak ket kiniddawda nga agkararagak ken ni Yahweh a Diosmi para iti pagilianmi.

⁴Diak pay naibalud idi ket nawayaak pay laeng a makilangen kadagiti tattao.

⁵Madama idi ti panangdarup ti armada ti Babilonia iti Jerusalem ngem nagsanudda idi maammoanda a rimmuar ti armada ti Faraon idiay Egipto.

⁶Kinuna ti Apo a Dios ti Israel

⁷nga ibagak ken ni Zedekias, “Adda iti dalan ti armada ti Egipto nga umay tumulong kenka ngem agawidto met laeng.

⁸Agsublinto met dagiti taga-Babilonia. Rautendanto ti siudad. Parmeken ken puorandanto.

⁹Siak, ni Yahweh, ballaaganka. Dimo allilawen ta bagim. Dimo ipagarup a saanen nga agsubli dagiti taga-Babilonia, ta umaydanto nga umay.

¹⁰Uray no maparmekyo ti entero nga armada ti Babilonia a mangdarup kadakayo, ket dagitinto la nasugatan nga agid-idda kadagiti toldada ti matda, isudanto ti mangparmek iti daytoy a siudad ket puoranda agingga a dumapu.”

¹¹Gapu ta dumtengen ti armada ti Egipto, nagsanud ti armada dagiti taga-Babilonia manipud Jerusalem.

¹²Ngarud, nagrubbuatak a rummuar idiay Jerusalem tapno innak iti sakup ti Benjamin ket alaek ti pannakabingayko iti sanikua ti familiami sadiay.

¹³Ngem idi makadanonak iti Ruangan ti Benjamin, pinasardengnak ti ofisial dagiti soldado nga agbambantay sadiay. Isu ni Irijas nga anak ni Selemias ken apoko ni Hananias. Kinunana, “Tumiponka gayam kadagiti taga-Babilonia!”

¹⁴“Saan!” insungbatko. “Saanak a tumipon kadakuada.” Ngem dinak impangag ni Irijas. Tiniliwnak sanak indatag kadagiti ofisiales.

¹⁵Nakapungtotda kaniak ket pinakabkabildak; kalpasanna, pinaipupokdak iti balay ni Jonatan a mammagbaga iti ari. Pinagbalinda a pagbaludan ti balayna.

¹⁶Naipanak iti pagbaludan iti uneg ti daga ket nabayag a naipupokak sadiay.

¹⁷Pinaayabannak ni Zedekias ket idi addaakon iti palasio, nagsaritakami a dudua. “Adda kadi ibaga ti Apo?” sinaludsodna. “Adda,” insungbatko. “Mayawatkanto iti pannakabalin ti ari ti Babilonia.”

¹⁸Sinaludsodko, “Apay a pinaibaludnak? Ania aya ti basolko kenka wenno kadagiti ofisialesmo wenno kadagiti tattao?

¹⁹Sadino ti ayan dagiti profetam a nagkuna a saan nga umay dagiti taga-Babilonia tapno darupendaka wenno daytoy a daga?

²⁰Ita, agdawatak kenka, Natan-ok nga Ari. Patgam koma ti dawatko. Saannak a paisublin iti balay ni Jonatan. No isublinak matayak la ketdi sadiay.”

²¹Iti kasta, pinaipupoknak ni Zedekias iti paraangan ti pagguardiaan. Nagyanak sadiay, ket inaldaw a naikkanak iti tinapay no la ketdi adda tinapay idi kadagiti panaderia.