Read Iloko Jeremiah 38 Bible Online

Jeremiah 38 - Iloko bible

Jeremiah 38

¹Nangngeg da Sefatias nga anak ni Matan, Gedalias nga anak ni Pasur, Jehucal nga anak ni Selemias ken Pasur nga anak ni Malkias nga ibagbagak kadagiti tattao

²ti kinuna ti Apo, “Matayto iti gubat wenno bisin wenno angol ti siasinoman a di pumanaw iti siudad. Ngem saanto a mapapatay ti siasinoman a rummuar ken sumuko kadagiti taga-Babilonia. Makalisi ket agbiagto.”

³Imbagak pay kadakuada a kinuna ti Apo, “Yawatkonto ti siudad iti armada ti ari ti Babilonia ket parmekennanto.”

⁴Napan ngarud dagiti ofisiales iti ari, ket kinunada kenkuana, “Masapul a mapapatay daytoy a tao. Gapu iti sasawenna, tumakrot dagiti soldado ken dagiti amin a tattao a nabati iti siudad. Saanna a tulongan dagiti tattao no di ket butbutngenna ida.”

⁵Kinuna ni Ari Zedekias, “Ala, ipalubosko kadakayo nga aramidenyo kenkuana ti kaykayatyo.”

⁶Innaladak ngarud, pinarautandak iti tali sadak impababa iti bubon ni Prinsipe Malkias, iti paraangan ti palasio. Awan danum ti bubon. Pitak la ti adda ket nain-inut a nailumlomak.

⁷Ngem nadamag ni Ebedmelec, maysa nga eunoko a taga-Etiopia nga agtartrabaho iti palasio, nga impisokdak iti bubon. Iti dayta nga oras, adda ti ari nga agtugtugaw a kas ukom iti paraangan ti Ruangan ti Benjamin.

⁸Napan sadiay ni Ebedmelec ket kinunana,

⁹“Natan-ok nga Ari, dakes ti inaramid dagitoy a lallaki. Impisokda ni Jeremias iti bubon. Matay la ketdi a matay sadiay iti bisin. Awanen ti makan iti siudad.”

¹⁰Binilin ti ari ni Ebedmelec a mangala iti tallo a lallaki nga adda sadiay tapno aonendak iti bubon sakbay a matayak.

¹¹Nangayab ni Ebedmelec kadagiti lallaki sa napan iti kuarto a pagidulinan iti palasio ket nangala kadagiti rutrot a lupot. Siningdananna dagiti lupot iti tali ket impauyaoyna kaniak.

¹²Imbaga ni Ebedmelec nga ikabilko dagiti lupot iti kilikilik tapno diak madunor iti tali. Inaramidko daytoy,

¹³ket ginuyoddak agingga a nayaondak iti bubon. Naipanak iti paraangan ti pangukoman a nagyanak manipud idin.

¹⁴Iti maysa nga aldaw, pinaalanak ni Ari Zedekias ket naidatagak kenkuana iti maikatlo a ruangan ti Templo. Kinunana kaniak, “Adda man saludsodek kenka. Dawatek nga awan ti ilimedmo kaniak.”

¹⁵Kinunak, “No ibagak kenka ti pudno, awan duadua a papapataynak. Ket no bagbagaanka, dinak met la ipangag.”

¹⁶Imbaga kaniak ni Zedekias iti nalimed, “Ikarik iti Dios a nangted iti biagtayo a dikanto papapatay wenno yawat kadagiti agpanggep a mangpapatay kenka.”

¹⁷Imbagak ngarud ken ni Zedekias a daytoy ti kinuna ti Apo a Mannakabalin-amin a Dios ti Israel: “No sumukoka kadagiti ofisiales ti ari ti Babilonia, maispalto ti biagmo ket saanto a mapuoran daytoy a siudad. Agbiagkanto agraman ti familiam.

¹⁸Ngem no saanka a sumuko, parmekento dagiti taga-Babilonia daytoy a siudad ket puorandanto. Saankanto a makalisi.”

¹⁹“Kabutengko dagiti Judio a kimmappon kadagiti taga-Babilonia,” insungbat ni Ari Zedekias, “amangan no isuda ti pakayawatak ket parigatendak.”

²⁰“Saankanto a mayawat kadakuada,” kinunak. “Dawatek a tungpalem ti imbaga kenka ti Apo tapno saankanto a maan-ano ket maispal ti biagmo.

²¹Ngem impakita ti Apo iti sirmata ti mapasamakto kenka no dika sumuko.

²²Kitaem! Mairuar dagiti amin a babbai a nabati iti palasio ti Juda ket maipanda kadagiti ofisiales ti ari ti Babilonia. Denggem ti kunkunada bayat ti pannakaipanda, ‘Ti ari inyaw-awan dagiti nasinged a gagayyemna, ket saanda a binigbig ti turayna. Itan ta nailumlom dagiti sakana iti pitak, binaybay-anen dagiti gagayyemna.’”

²³Innayonko, “Maipanto dagiti amin nga assawayo ken amin nga annakyo idiay Babilonia. Uray sika, dikanto makalisi. Alaennakanto a kas balud ti ari ti Babilonia. Mapuoranto daytoy a siudad agingga a maikisap.”

²⁴Kinuna ni Zedekias, “Awan pangibagbagaam iti nagsaritaanta tapno saanka a madaksan.

²⁵No maammoan dagiti ofisiales a nakisaritaak kenka, umaydanto saludsoden ti nagsaritaanta. Ikaridanto kenka a saandaka a patayen no ibagam amin kadakuada.

²⁶Ngem ibagam kadakuada a nagpakpakaasika kaniak a saanka a paip-ipan iti balay ni Jonatan tapno sadiay ti pakatayam.”

²⁷Immay dagiti amin nga ofisiales ket nagsaludsodandak. Imbagak kadakuada ti amin nga imbilin ti ari a sawek. Awan ti naaramidda agsipud ta awan ti nakangngeg iti nagsaritaanmi.

²⁸Iti kasta, naipupokak iti paraangan ti pangukoman agingga a naparmek ti Jerusalem.