Read Iloko Jeremiah 39 Bible Online

Jeremiah 39 - Iloko bible

Jeremiah 39

¹Iti maika-10 a bulan iti maikasiam a tawen a panagari ni Zedekias idiay Juda, dinarup ni Nebucadnesar nga ari ti Babilonia ti Jerusalem. Inkuyogna ti entero nga armadana.

²Iti maikasiam nga aldaw iti maikapat a bulan ti maika-11 a tawen a panagari ni Zedekias, sinerrekda ti bakud ti Jerusalem. (

³Idi naparmek ti Jerusalem, napan dagiti amin nga ofisiales ti ari ti Babilonia iti lugarda iti Nagtengnga a Ruangan. Kimmuyog kadakuada da Nergal-sarezer, Samgar Nebo, Sarsekim ken sabali pay a Nergal-sarezer.)

⁴Idi makita ni Ari Zedekias ken dagiti amin a soldadona ti mapaspasamak, pinadasda ti aglibas iti rabii manipud iti siudad. Nagnada iti hardin ti palasio iti dalan iti nagbaetan ti dua a bakud. Nagturongda iti Tanap ti Jordan.

⁵Ngem kinamat ida ti armada dagiti taga-Babilonia ket tiniliwda ni Zedekias iti tanap iti asideg ti Jerico. Impanda ti ari ken ni Ari Nebucadnesar nga adda iti ili a Ribla iti sakup ti Hamat. Sadiay ti nangsentensiaan ti ari ken ni Zedekias.

⁶Idiay Ribla, pinatay ti ari ti Babilonia dagiti lallaki nga annak ni Zedekias iti sangoananna ti amada. Pinapatayna pay dagiti ofisiales ti Juda.

⁷Pinasuatna dagiti mata ni Zedekias. Pinakawaranna ni Zedekias sana pinaipan idiay Babilonia.

⁸Pinuoran met dagiti taga-Babilonia ti palasio ken dagiti balay dagiti tattao sada rinebba dagiti bakud ti Jerusalem.

⁹Kamaudiananna, innala ni Nebuzaradan a kapitan dagiti guardia dagiti tattao a nabati iti siudad agraman dagiti kimmappon kenkuana, ket impanna ida a kas balud idiay Babilonia.

¹⁰Imbatina idiay Juda ti sumagmamano kadagiti kapanglawan a tattao nga awan sanikuana, ket inikkanna ida iti kaubasan ken taltalon.

¹¹Ngem binilin ni Ari Nebucadnesar ni Nebuzaradan a kapitan dagiti guardia:

¹²“Birokem ni Jeremias ket taripatoem a naimbag. Dimo rangranggasan ket itedmo ti aniaman a kayatna.”

¹³Iti kasta, nagibaon ni Nebuzaradan ken ni Nebusasban a nangato nga ofisial, ni Nergal-sarezer a maysa pay a nangato nga ofisial, ken ti dadduma pay nga ofisiales ti ari ti Babilonia.

¹⁴Pinaaladak iti paraangan ti pangukoman. Pinaaywanandak ken ni Gedalias nga anak ni Ahikam ken apoko ni Safan tapno isu ti kumita kaniak a makasangpetak nga awan pakaan-anoak. Nakipagnaedak ngarud kadagiti tattao sadiay.

¹⁵Idi sipupukokak pay laeng iti paraangan ti pagguardiaan, imbilin ti Apo

¹⁶nga ibagak ken ni Ebedmelec a taga-Etiopia a kinuna ti Apo a Mannakabalin-amin a Dios ti Israel, “Kas impakaammok idi, yegkonto ti pannakadadael a saan ketdi a panagrang-ay iti daytoy a siudad. Ket inton mapasamak daytoy, addakanto a makaimatang.

¹⁷Ngem siak, ni Yahweh, salaknibankanto ket saankanto a mayawat iti pannakabalin dagiti tattao a kabutbutengmo.

¹⁸Aywanankanto ket saankanto a mapapatay. Makalasatkanto agsipud ta nagtalekka kaniak. Siak, ni Yahweh, ti nangibaga iti daytoy.”