Read Iloko Jeremiah 4 Bible Online

Jeremiah 4 - Iloko bible

Jeremiah 4

¹Kuna ti Apo, “Tattao ti Israel, no kayatyo ti agbabawi, agsublikayo kaniak. No napudnokayo kaniak, ket ibellengyo dagiti didiosen a kagurgurak,

²tumutopto ti panagsapatayo iti naganko. Iti kasta, dawatento dagiti amin a nasion a bendisionak ida, ket idaydayawdakto.”

³Kuna ti Apo kadagiti taga-Juda ken kadagiti taga-Jerusalem, “Aradoenyo dagiti saan a naarado a talonyo; dikay agmula iti ayan dagiti sisiitan.

⁴Tungpalenyo ti nakitulaganyo kaniak nga Apo yo ket idatonyo dagiti pusoyo kaniak, dakayo a tattao ti Juda ken Jerusalem. Ta no saan, gumil-ayabto ti pungtotko gapu kadagiti dakes nga aramidyo, ket sumged nga awan ti makaiddep.”

⁵Pagunienyo ti trumpeta iti entero a daga! Agpukkawkay iti nalawag a timek! Ibagayo kadagiti tattao ti Juda ken ti Jerusalem nga agkamangda kadagiti nasarikedkedan a siudad.

⁶Mangipasdekkay iti bandera iti dalan nga agpa-Sion. Agpaknikayo! Dikay agtaktak! Adda didigra ken adu a panagdadael a yeg ni Yahweh manipud iti amianan.

⁷Kas iti leon a rummuar iti rukibna, umayen ti agdaddadael kadagiti nasion. Umayna dadaelen ti Juda. Madadaelto dagiti siudadna. Ket mabaybay-andanton a rebrebba nga awan ti agyan kadakuada.

⁸Isut' gapuna nga agkaweskay iti nakersang a lupot; agsangit ken agdung-awkayo agsipud ta gumilgil-ayab pay laeng ti pungtot ti Apo iti Juda.

⁹Kinuna ti Apo, “Iti dayta nga aldaw, tumakrotto dagiti ari ken dagiti ofisiales. Makigtotto dagiti papadi ken maikulengto dagiti profeta.”

¹⁰Kinunak, “O Apo Dios, inallilawmo a namimpinsan dagiti tattao ti Jerusalem! Imbagam nga addanto talna ngem silalayat met ti kampilan iti karabukobda.”

¹¹Dumtengen ti tiempo a maipakaammo kadagiti tattao ti Jerusalem nga addanto makasinit nga angin-let-ang nga agturong kadakuada. Saanto a nakapsut nga angin a mangikay-ab laeng iti taep—

¹²napigpigsanto nga angin ti yeg ti Apo. Ti Apo a mismo ti mangibaga iti panangukomna kadagiti tattaona.

¹³Kitaenyo, sumungad ti kabusor a kas ulep. Mayarig iti alipugpog dagiti luganna a pakigubat. Naparpardas dagiti kabaliona ngem dagiti agila. Nadadaeltayon! Ditay makalisin!

¹⁴Jerusalem, dalusam ta pusom iti kinadakes tapno maisalakanka. Kasano pay kabayag ti panagpampanunotmo iti dakes?

¹⁵Adda dagiti naibaon a naggapu idiay Dan ken kadagiti katurturodan ti Efraim a mangipakaammo iti dakes a damag.

¹⁶Immayda a mangballaag kadagiti nasion ken mangibaga iti Jerusalem nga addan dagiti kabusor nga aggapu iti adayo a daga. Yikkisto dagitoy a kabusor ti pammutbuteng kadagiti siudad ti Juda.

¹⁷Lakubendanto ti Jerusalem, kas kadagiti lallaki a mangguguardia iti maysa a talon agsipud ta binusorna ti Apo. Daytoy ti sao ti Apo.

¹⁸Juda, sika met la ti akimbasol iti pannakadusam; dakes ngamin ti panagbiag ken aramidmo. Ti basolmo ti nangyeg iti daytoy a panagsagaba; sinalputna ta pusom.

¹⁹Nagsakiten! Diak maibturan ti saemna. Aggutok-gutok ti pusok! Saanak a makatalna. Mangngegko ti uni ti trumpeta ken ti arimbangaw ti gubat.

²⁰Agsasaruno ti pannakadidigra; aglangalang ti entero a daga. Pagammoan la ta narba dagiti tolda ket napigis dagiti kurtina.

²¹Kasano ti kabayag a kitkitaek ti bandera ken dengdenggek ti trumpeta?

²²Kinuna ti Apo, “Nengneng dagiti tattaok; saandak nga am-ammo. Kasda la maag nga ubbing; saanda a makaawat. Nalaingda nga agaramid iti dakes, ngem dida ammo ti agaramid iti naimbag.”

²³Kinitak ti daga—langalang nga awan mulana. Kinitak ti langit—awan ti lawagna.

²⁴Kinitak dagiti bantay—agkinkintayegda. Ket kinitak dagiti turod—agin-indayonda.

²⁵Pulos nga awan tao a nakitak, nagpapanaw uray dagiti tumatayab.

²⁶Nagbalin a let-ang ti nabunga a daga, narnarba dagiti amin a siudadna gapu iti gumilgil-ayab a pungtot ni Yahweh. (

²⁷Kinuna ti Apo nga aglangalangto ti entero a daga, ngem saannanto a dadaelen a mamimpinsan.)

²⁸Agladingitto ti daga, ket agsipngetto ti langit. Nagsao ti Apo; impakaammonan ti pangngeddengna, ket dinanto baliwan ti panunotna.

²⁹Agtatarayto amin a tattao inton mangngegda ti dalagudog dagiti nagkabalio ken nagtagipana. Addanto dagiti agkamang iti kabakiran; addanto met dagiti aglemmeng kadagiti rangrangkis. Mapanawanto amin a siudad, ket awanto ti agnaed kadakuada.

³⁰Ket sika, Jerusalem, naituding a madadaelka. Apay nga agkaweska pay laeng iti nalabaga? Apay nga agalahaska iti balitok? Apay a pinintaam pay laeng dagiti matam? Awan serserbi ti panagpapintasmo! Binaybay-andakan dagiti kaayan-ayatmo; kayatdaka a papatayen.

³¹Nakangngegak iti kasla asug ti agpaspasikal, kasla ikkis ti babai nga agdadamo nga aganak. Um-umkis ti Sion! Al-alawenna ti angesna. Igawgaw-atna dagiti imana a kunkunana, “Saanakon a makalisi! Umayen dagiti mangpapatay kaniak.”