Read Iloko Jeremiah 41 Bible Online

Jeremiah 41 - Iloko bible

Jeremiah 41

¹Iti maikapito a bulan iti dayta a tawen, napan sinarungkaran ni Ismael ni Gobernador Gedalias idiay Mizpa. Kaduana ti sangapulo a lallaki. Anak ni Netanias ni Ismael ken apoko ni Elisama a nagtaud iti familia dagiti ari ken kameng ti maysa kadagiti nangato nga ofisiales ti ari. Bayat ti panaglalanglangda amin a mangan,

²inasut ni Ismael ken dagiti sangapulo a lallaki ti kampilanda ket pinatayda ni Gedalias.

³Pinatay pay ni Ismael dagiti amin nga Israelita a kadua ni Gedalias idiay Mizpa, kasta met dagiti soldado ti Babilonia a nairana nga adda idi sadiay.

⁴Iti sumuno nga aldaw, sakbay a nagwaras ti damag ti pannakapapatay ni Gedalias,

⁵simmangpet ti 80 a lallaki a naggapu idiay Sikem, Silo ken Samaria. Sakbay ti ipapanda, nagibarbasda, rinay-abda dagiti pagan-anayda ken sinugsugatda dagiti bagbagida. Nangitugotda kadagiti makan ken insenso nga idatonda iti Templo.

⁶Iti kasta, rimmuar ni Ismael idiay Mizpa ket agsangsangit a simmabat kadakuada. “Pangngaasiyo ta umayyo kitaen ni Gedalias,” kinunana.

⁷Apaman a nakastrek dagiti 80 a lallaki iti siudad, pinatay ida ni Ismael ken dagiti tattaona sada intappuak dagiti bangkayda iti maysa a bubon.

⁸Ngem adda sangapulo a lallaki iti bunggoy a nagkuna ken ni Ismael, “Pangngaasim ta dinakami patayen! Adu ti trigo, sebada, lana ti olibo ken diro nga inlemmengmi iti taltalon.” Iti kasta, saanna nga inraman a pinapatay ida.

⁹Dakkel ti bubon a nangitappuakan ni Ismael kadagiti pinatayna. Daytoy ti bubon a kinali ni Ari Asa idi madama ti panangraut kenkuana ni Baasa nga ari ti Israel. Pinunno ni Ismael ti bubon kadagiti bangkay dagiti pinatayna.

¹⁰Imbalud ni Ismael dagiti babbai nga annak ti ari ken dagiti dadduma a tattao ti Mizpa nga impaaywan ni Nebuzaradan a kapitan dagiti guardia ken ni Gedalias. Impanawna ida a kas balud ket nagturong iti sakup ti Ammon.

¹¹Nadamag ni Johanan nga anak ni Karea ken dagiti pangulo ti armada ti krimen nga inaramid ni Ismael.

¹²Kinamatda ni Ismael ket nakamakamda iti asideg ti dakkel a tangke ti danum idiay Gabaon.

¹³Naragsakan dagiti tattao a balud ni Ismael idi makitada ni Johanan ken dagiti pangulo agraman dagiti kaduada.

¹⁴Iti kasta, nagtatarayda amin a timmipon kadakuada,

¹⁵ngem nakalibas ni Ismael ken walo kadagiti tattaona ket napanda idiay Ammon.

¹⁶Inaywanan ni Johanan ken dagiti pangulo ti armada dagiti soldado, dagiti babbai, dagiti ubbing ken dagiti eunoko a balud nga innala ni Ismael idiay Mizpa kalpasan ti panangpatayna ken ni Gedalias.

¹⁷Nagbutengda kadagiti taga-Babilonia gapu ta pinapatay ni Ismael ni Gedalias a pinaggobernador ti ari ti Babilonia iti dayta a daga. Ngarud, nagrubbuatda a mapan idiay Egipto tapno malisianda dagiti taga-Babilonia. Iti dalan, nagsardengda idiay Gerut-Kimham iti asideg ti Betlehem tapno aginanada.