Read Iloko Jeremiah 42 Bible Online

Jeremiah 42 - Iloko bible

Jeremiah 42

¹Kalpasanna, immay kaniak dagiti amin a pangulo dagiti armada agraman ni Johanan nga anak ni Karea, ni Azarias nga anak ni Hosaias ken nadumaduma a tattao, natan-ok ken nanumo.

²Kinunada kaniak, “Pangngaasim ta ipangagmo ti dawatmi! Ikararagannakami iti Apo a Diostayo. Idawdawatannakam amin a natda. Adukami idi, ngem kas makitam, bassitkamin.

³Idawdawatmo nga ipakaammo koma ti Apo a Diostayo ti tumutop a dalan ken rumbeng nga aramidenmi.”

⁴“Ala wen,” insungbatko. “Ikarkararagankayto iti Apo a Diostayo kas dawatenyo. No aniaman ti kunana, ibagakto kadakayo. Awanto ti ilimedko.”

⁵Kinunada kaniak, “Ti Apo a Diostayo ti agbalin a pudno ken matalek a saksi a maibusor kadakami no dimi tungpalen dagiti amin nga ibagana kenka nga aramidenmi.

⁶Naimbag man wenno dakes, agtulnogkamto iti Apo a Diostayo a pangibaonanmi kenka. Awanto ti pakaan-anoanmi no agtulnogkami kenkuana.”

⁷Kalpasan ti sangapulo nga aldaw, nagsao kaniak ti Apo,

⁸isu nga inayabak ni Johanan nga anak ni Karea, dagiti amin a pangulo dagiti armada a kinakuyogna ken dagiti nadumaduma a tattao, natan-ok ken nanumo.

⁹Kinunak kadakuada, “Kastoy ti imbaga ti Apo a Dios ti Israel a nangibaonanyo kaniak tapno idatagko ti dawatyo:

¹⁰‘No kayatyo ti agnaed iti daytoy a daga, parang-ayenkayo ket saankayo a dadaelen. Imulakayto ket saankayo a paruten. Ladingitek unay ti panangdadaelko kadakayo.

¹¹Saankayon nga agbutbuteng iti ari ti Babilonia. Diyo kabuteng ta aywanankayo. Salaknibankayo ket isalakankayo iti pannakabalinna.

¹²Gapu ta manangngaasiak, ipamuspusak ti panangngaasina kadakayo ket palubosannakayto nga agawid. Siak, ni Yahweh, ti nagsao iti daytoy.’

¹³“Ngem dakayo a natda iti Juda, saankayo nga agsuksukir iti Apo a Diosyo ket saankayo nga agsukir nga agnaed iti daytoy a daga. Diyo kunkuna, ‘Dimi kayat ti agnaed ditoy. Kayatmi ti mapan agnaed idiay Egipto. Awan gubgubat sadiay wenno mangayab kadakami a makigubat. Awan bisin.’ Ta no kunayo daytoy, kastoy met ti sao ti Apo a Mannakabalin-amin a Dios ti Israel, ‘No ipapilityo ti mapan agnaed idiay Egipto,

¹⁶makamakamnakayto ti gubat a kabutbutengyo. Surotennakayto ti bisin a kaam-amakyo. Mataykayto idiay Egipto.

¹⁷Matayto amin iti gubat wenno bisin wenno angol ti mapan agnaed sadiay. Awanto ti matda. Awanto ti makalisi iti didigra nga idissuorko kadakuada.’

¹⁸“Kuna ti Apo a Dios ti Israel, ‘No inkay idiay Egipto, idissuorkonto kadakayo ti unget ken pungtotko a kas iti indissuorko kadagiti taga-Jerusalem. Nakakaasinto ti kasasaadyo. Pagang-angawandakayto dagiti tattao ket pagilunoddanto ti naganyo. Saanyonton a makita daytoy a lugar.’”

¹⁹Intuloyko ti nagsao, “Imbaga ti Apo kadakayo a natda iti Juda a dikay mapmapan idiay Egipto. Ita nga aldaw, ballaagankayo

²⁰a nagbiddutkayo. Imbaondak iti Apo a Diostayo a nangikararag kadakayo. Imbagayo nga ibagak amin nga aramidenyo ket tungpalenyo.

²¹Ita, imbagak aminen kadakayo, ngem diyo tinungpal ti amin a pinaibaga ti Apo a Diostayo.

²²Ngarud, laglagipenyo daytoy: mataykayto iti kampilan wenno bisin wenno angol iti daga a kayatyo a pagnaedan.”