Read Iloko Jeremiah 46 Bible Online

Jeremiah 46 - Iloko bible

Jeremiah 46

¹Nagsao ti Apo kaniak maipapan kadagiti nasion.

²Maipapan iti Egipto, daytoy ti saona a maibusor iti armada ni Faraon Neco a pinarmek ni Nebucadnesar nga ari ti Babilonia idiay Carkemis iti asideg ti Karayan Eufrates. Pinarmek ni Nebucadnesar iti maikapat a tawen a panagari ni Jehoyakim nga anak ni Josias iti Juda. Kinuna ti Apo:

³“Ipukkaw dagiti ofisiales ti Egipto, ‘Isaganayo dagiti kalasagyo, ket inkayo makigubat!

⁴Isaganayo dagiti kabalioyo ket agsakaykayo! Agpuestokayo! Aghelmetkayo! Asaenyo dagiti gayangyo! Agkabalkayo!’

⁵“Ngem ania ti makitak?” saludsoden ni Yahweh. “Agsanudda a sibubuteng. Maparmek dagiti soldadoda. Gapu iti butengda, alistoanda ti agtaray ket saanda a tumalliaw.

⁶Saan a makaadayo dagiti napardas a tumaray; saan a makalibas dagiti mannakigubat. Maitibkol ken matumbada idiay amianan, wen, iti igid ti Karayan Eufrates.

⁷Siasino daytoy dumakkel a kasla Karayan Nile, kasla karayan nga aglayus?

⁸Ti Egipto ti dumakkel a kasla Karayan Nile, kasla karayan nga aglayus. Kinuna ti Egipto, ‘Dumakkelak ket layusekto ti lubong; dadaelekto dagiti siudad ken dagiti tattao.

⁹Abogenyo dagiti kabalio! Paggunayenyo dagiti lugan a pakigubat! Ibaonyo a sumaranget dagiti soldado: dagiti nakakalasag a taga-Etiopia ken taga-Put ken dagiti pumapana a taga-Lud.’”

¹⁰Daytoy ti aldaw ti Apo a Dios a Mannakabalin-amin: aldaw a panagibalesna, aldaw a panangdusana kadagiti kabusorna. Ibusento ida ti kampilan agingga iti mabsog ket inumennanto ti darada agingga iti mapnek. Ita nga aldaw, agidatag ti Mannakabalin-amin iti daton idiay amianan, iti igid ti Karayan Eufrates.

¹¹Inkay idiay Galaad, tattao iti Egipto, ket agsapulkay iti agas! Awan serserbi dagiti amin nga agasyo; awan ti makapaimbag kadakayo.

¹²Nadamag dagiti nasion ti pannakaibabainyo; nangngegda amin ti panagsangsangityo. Agdidinnungpar dagiti soldado ket matuangda a padapada.

¹³Idi napan rinaut ni Nebucadnesar nga ari ti Babilonia ti Egipto, kinuna ti Apo kaniak,

¹⁴“Ibagam kadagiti il-ili ti Egipto, idiay Migdol, Memfis ken Tafnes: ‘Agsaganakayo a mangikaluya kadagiti bagbagiyo; madadaelto iti gubat ti amin nga adda kadakayo.

¹⁵Apay a natuang ni Apis, ti sinan-baka a didiosenyo? Tinulid ngamin ni Yahweh!’

¹⁶Naitibkol dagiti soldadoyo ket natumbada. Kunada iti maysa ken maysa, ‘Darasentayo! Agsublitayon kadagiti tattaotayo, iti ili a nakayanakantayo. Itarayantayo ti kampilan dagiti kabusor.’

¹⁷“Ikkanyo ti ari ti Egipto iti baro a nagan— ‘Naariwawa ngem awan met mabalbalinna.’

¹⁸Siak, ni Yahweh a Mannakabalin-amin ket ari. Siak ti sibibiag a Dios. ‘Kas iti Bantay Tabor a kabilgan kadagiti bambantay, ken ti Bantay Carmel a nangatngato ngem ti baybay, kastanto ti bileg ti umay mangraut kadakayo.’

¹⁹Agsaganakayo a maipanaw a kas balud, dakayo a taga-Egipto. Agbalinto a let-ang ti Memfis, langalang nga awan ti agnaed.

²⁰Mayarig ti Egipto iti nabaked a baka, ngem sinilud ti dakkel a ngilaw a naggapu iti amianan.

²¹Uray pay dagiti natangdanan a soldadona, kasda la urbon ti baka nga awan gawayna. Saanda a nakiranget; nagsanud ken nagtarayda amin, agsipud ta dimtengen ti panungpalanda, tiempon ti pannakadusada.

²²Agtaray ti Egipto, agkarasakas a kas iti uleg ta darupen ti armada ti kabusorna. Nagtagiwasayda a mangraut kenkuana, kasda la lallaki nga agpukpukan iti kayo.

²³Pukanenda dagiti kaykayo iti bakirna. Saan a mabilang dagiti tattaoda; ad-adu ngem dudon dagiti soldadoda.

²⁴Maibabain dagiti taga-Egipto; pinarmek ida dagiti taga-amianan. Daytoy ti sao ti Apo.”

²⁵Kuna ti Apo a Mannakabalin-amin a Dios ti Israel, “Dusaek ni Amon a didiosen ti Tebes, agraman ti Egipto ken dagiti didiosen ken arina. Alaek ti Faraon ken dagiti amin nga agtalek kenkuana.

²⁶Yawatkonto ida ken ni Ari Nebucadnesar ti Babilonia ken ti armadana, isuda nga agpanggep a pumatay kadakuada. Ngem iti kamaudianna, addanto manen agnaed iti Egipto a kas idi un-unana. Siak, ni Yahweh, ti agsasao.”

²⁷Kuna ti Apo, “Dikay agbuteng, dakayo a tattaok; dikay agamak, dakayo nga Israelita. Isalakankayto iti dayta adayo a daga, iti daga a nakaibaludanyo. Agsubli ken agbiagkayto a sitatalna; natalgedkayto ket awanto ti mangbutbuteng kadakayo.

²⁸Dikay agbuteng ta addaak kadakayo. Pukawekto a mamimpinsan dagiti amin a nasion a nangiwarawaraak kadakayo, ngem saankayto a dadaelen. Dusaenkayonto a dusaen; ngem nainkalintegan ti panangdusak kadakayo. Siak, ni Yahweh, ti nagsao iti daytoy.”