Read Iloko Jeremiah 49 Bible Online

Jeremiah 49 - Iloko bible

Jeremiah 49

¹Daytoy ti sao ni Yahweh a maibusor iti Ammon: “Ayan dagiti lallaki nga annak ti Israel? Awan kadi kadakuada ti mangsalaknib iti dagada? Apay a pinalubosanda dagiti agdaydayaw ken ni Milcom a mangtagikua iti sakup ti tribu ti Gad ket agnaedda sadiay?

²Ngem dumtengen ti tiempo a pannakangngeg dagiti tattao ti Rabba iti ikkis ti gubat. Madadaelto ti siudad ken agbalin a rebrebba ket mapuoranto agingga a dumapu dagiti barbarriona. Kalpasanna, mapasublinto met laeng dagiti Israelita ti naagaw a dagada.

³Agsangitkayo, dakayo a taga-Hesbon. Nadadaelen ti Ai a siudadyo. Agdung-awkayo, dakayo a babbai a taga-Rabba! Agpanes ken agsangitkayo. Agtaraykayo a diyo ammo ti turturongenyo, ta maitalawto ni didiosenyo a Milcom agraman dagiti papadi ken prin sipena.

⁴“Apay nga agpasindayagkayo, babbai nga awanan pammati? Kumapkapsutkayon. Apay nga agtalgedkayo iti kinabaknangyo ket kunayo nga awan ti makaitured a dumarup kadakayo?

⁵Yegkonto ti pagbutnganyo iti aglawlaw. Agtataraykayto amin a mangikaluya iti biagyo. Awanto ti mangurnos kadagiti soldadoyo.

⁶“Ngem iti kamaudianna, parang-ayekto manen dagiti Ammonita. Siak, ni Yahweh, ti nagsao iti daytoy.”

⁷Daytoy ti kinuna ni Yahweh a Mannakabalin-amin maipapan iti Edom: “Napukaw kadin dagiti taga-Edom ti husto a panagpampanunotda? Saanen aya a kabaelan dagiti masirib nga ibaga ti aramidenda? Napukawdan aya dagiti siribda?

⁸Tattao ti Dedan, agsubli ken agtaraykayo! Inkay aglemmeng! Dadaelekto dagiti kaputotan ni Esau agsipud ta dimtengen ti tiempo a dusaek ida.

⁹No agburas dagiti tattao iti ubas, mangiteddada iti bunga iti sanga ket dagiti agtakaw iti rabii, ti laeng kayatda ti alaenda.

¹⁰Ngem linabusak a namimpinsan dagiti kaputotan ni Esau ket linukasak dagiti paglemlemmenganda tapno awanen pagkamanganda. Nadadaelen dagiti tattao ti Edom, dagiti kakabagianda ken dagiti kaarrubada. Awanen ti nabati.

¹¹Italekyo kaniak dagiti ul-ulila nga annakyo ta taripatoek ida. Mabalindak a pagtalkan dagiti babbai a balo nga adda iti sidongyo.

¹²“No uminum iti kopa ti pannakadusa dagiti saan a rumbeng a madusa, dakayto la ketdin? Dusaenkayto a dusaen. Masapul nga uminumkayo iti kopa ti pannakadusa!

¹³Siak a mismo ti agsapata nga agbalinto ti siudad ti Bozra a nakabutbuteng ken langalang. Pagang-angawanto dagiti tattao ket pagilunoddanto ti naganna. Agnanayonto a rebrebba ti amin a kabangibang a barriona. Siak, ni Yahweh, ti nagsao iti daytoy.”

¹⁴Kinunak, “Edom, adda mensahe kaniak ti Apo. Nangibaon iti mapan kadagiti nasion a mangipakaammo kadakuada nga ummongenda dagiti buyotda ket agsaganada a mangraut kenka.

¹⁵Pagkapsutennakayto ti Apo ket awanto ti mangraem kadakayo.

¹⁶Natangsitkayo! Daytoy ti mangallilaw kadakayo. Ipagarupyo nga adda agbuteng kadakayo ngem awan a pulos! Agnaedkayo kadagiti kabatoan a rangrangkis, iti tapaw dagiti bambantay; ngem uray no kas iti kangato ti umok ti agila ti pagnaedanyo, ipababanakayto ti Apo. Daytoy ti sao ti Apo.”

¹⁷Kinuna ni Yahweh, “Nakaam-amakto ti pannakadadael ti Edom, ket makigtot ken agbutengto dagiti amin nga aglabas a makakita iti amin a napasamak kenkuana.

¹⁸Madadaelto ti Edom a kas iti pannakadadael ti Sodoma ken Gomorra ken dagiti kabangibangda nga il-ili. Awanton ti agnaed sadiay. Daytoy ti sao ni Yahweh.

¹⁹Umayakto a kas iti leon a rummuar iti nasamek a bakir a mapan iti nalangto a pagaraban iti abay ti Karayan Jordan. Kellaatekto a kamaten dagiti Edomita ket agtataraydanto a mangpanaw iti dagada. Iturayanto ida ti piliek a pangulo. Siasino ti kas kaniak? Siasino ti kumarit kaniak? Siasino ti agturay a bumusor kaniak?

²⁰“Ngarud, denggenyo ti planok a maibusor kadagiti Edomita ken kadagiti agnaed iti siudad ti Teman. Uray dagiti babassit nga annakda maitalawdanto ket makigtotto ti tunggal maysa.

²¹Inton maparmek ti Edom, madayyegto ti daga iti daranudor ti pannakatnagna. Agiikkisto dagiti tattao ket dumanonto ti ikkisda idiay Baybay a Nalabaga.

²²Dumarupto ti kabusor a kasla agila a sumippayot manipud langit. Yukradnanto dagiti payakna a maibusor iti Bozra. Iti dayta nga aldaw, agdanagto dagiti soldado ti Edom, kas iti babai nga agpaspasikal.”

²³Daytoy ti kinuna ni Yahweh maipapan iti Damasco: “Madanagan ken maringgoran dagiti tattao kadagiti siudad ti Hamat ken Arpad. Ngamin, nakangngegda iti dakes a damag. Kasla baybay ti butengda a nanglemmes kadakuada. Saanda a makatalna.

²⁴Agkakapsut dagiti taga-Damasco ket agtatarayda iti kigtotda. Marigatan ken madanaganda a kas iti agpasikal.

²⁵Namimpinsan a nabaybay-an dayta agdindinamag ken naragsak a siudad.

²⁶Ngarud, iti dayta nga aldaw, mapapatayto dagiti amin nga agtutubo a lallaki ken dagiti soldado kadagiti lansangan ti siudad.

²⁷Puorakto dagiti bakud ti Damasco ket dumapunto dagiti palasio ni Ari Benhadad. Daytoy ti kuna ni Yahweh a Mannakabalin-amin.”

²⁸Daytoy ti kinuna ni Yahweh maipapan iti tribu ti Kedar ken dagiti agtuturay iti siudad ti Hazor a pinarmek ni Nebucadnesar nga ari ti Babilonia: “Rautenyo dagiti taga-Kedar. Dadaelenyo ti tribu dagiti taga-daya!

²⁹Alaenyo dagiti toldada, dagiti arbanda, dagiti kurtina ken dagiti amin nga alikamenda. Alaenyo dagiti kamelioda. Ibagayo kadagiti tattao nga adda nakabutbuteng iti amin nga aglawlawda.

³⁰“Tattao ti Hazor, pakdaarankayo! Siak ni Yahweh. Inkay aglemmeng iti adayo. Adda dakes a panggep ni Nebucadnesar nga ari ti Babilonia, ket kastoy ti kunana,

³¹‘Umaykayo! Rautentayo dagita a tattao nga agbibiag a sitatalna ken sitatalged. Awan rikep ken balunet dagiti ruangan ti siudadda ket awan salaknibda.’

³²“Samsamenyo dagiti kamelio ken amin a bakada. Iwarawarakto iti amin a lugar dagiti tattao nga agpukis iti ababa. Didigraekto ida iti amin a suli.

³³Agbalinto a disierto ti Hazor iti agnanayon, lugar a dagiti laeng atap nga animal ti agnaed. Awanton ti agnaed sadiay. Siak, ni Yahweh, ti nagsao iti daytoy.”

³⁴Idi mangrugi ti panagari ni Zedekias idiay Juda, nagsao kaniak ti Apo a Mannakabalin-amin maipapan iti daga ti Elam.

³⁵Kinunana, “Parmekekto amin a lallaki a pumapana a nangpabileg iti Elam.

³⁶Paganginekto iti napigsa iti amin a suli idiay Elam. Iwarawarakto dagiti tattao iti amin a disso agingga a pagbakwitan dagiti tattao ti amin a lugar.

³⁷Pagbutngekto dagiti taga-Elam. Kabutengdanto dagiti kabusorda nga agpanggep a mangpapatay kadakuada. Idissuorkonto kadakuada ti napalalo a pungtotko. Ibaonkonto dagiti armada agingga a maikisapda.

³⁸Papatayekto dagiti ari ken dagiti pangulo ti Elam ket ipasdekkonto ti tronok sadiay.

³⁹Ngem iti kamaudiananna, parang-ayekto manen dagiti tattao ti Elam. Siak, ni Yahweh, ti nagsao iti daytoy.”