Read Iloko Jeremiah 50 Bible Online

Jeremiah 50 - Iloko bible

Jeremiah 50

¹Daytoy ti impakaammo kaniak ti Apo maipapan iti Babilonia ken kadagiti tattaona:

²“Ipakaammom ti damag kadagiti nasion! Iwaragawagmo! Itedmo ti pagilasinan ket iwarasmo ti damag! Dimo ilimlimed! Naparmeken ti Babilonia! Naibabainen ni Bel! Naburburaken ni Marduk a didiosenna! Naibabainen dagiti imahen, narumrumeken dagiti didiosenna.

³“Immay ti maysa a nasion a taga-amianan tapno rautenna ti Babilonia ket paglangalangennanto. Agtatarayto nga agtalaw dagiti tattao ken dagiti animal, ket awanton ti agnaed sadiay.”

⁴Kuna ni Yahweh, “Inton dumteng dayta a tiempo, agsasangitto dagiti tattao ti Israel ken Juda a mangsapul kaniak a Diosda.

⁵Agdamagdanto no sadino ti dalan nga agpa-Sion ket surotenda. Makitulagdanto kaniak iti mataginayon a tulag, ket pulos a didanto salungasingen.

⁶“Mayarig dagiti tattaok kadagiti napukaw a karnero. Binaybay-an ida dagiti pastorda nga agkalkallautang kadagiti bambantay. Nagalla-allada a kasla karnero ket nalipatandan ti ayan ti balayda.

⁷Darupen ida dagiti makasarak kadakuada. Kuna dagiti kabusorda, ‘Saan a dakes ti inaramidtayo ta nagbasolda iti Apo. Nagtalek dagidi kapuonanda iti Apo ket rebbengda koma ti nagtalinaed a sipupudno kenkuana.’

⁸“Panawanyo ti Babilonia, dakayo nga Israelita! Pumanawkayo iti dayta a daga! Dakayo ti umuna a pumanaw!

⁹Tignayek ti bunggoy dagiti nabileg a nasion iti amianan. Parautkonto kadakuada ti Babilonia. Agmaymaysadanto a manggubat iti siudad ket parmekendanto. Saan nga agmintis ti panagpanada a kas kadagiti nalaing a mangnganup.

¹⁰Masamsamanto ti Babilonia. Alaento dagiti agsamsam ti amin a kaykayatda. Siak, ni Yahweh, ti agsasao.”

¹¹Kuna ni Yahweh, “Dakayo a taga-Babilonia, sinamsamanyo ti nasionko. Agraragsak ken aglagtolagtokayo a sibaballigi, kaslakayo baka nga agir-irik iti trigo wenno kasla kabalio nga aggargaraigi,

¹²ngem maibabain ken madadaelto ti siudadyo. Agbalinto ti Babilonia a kanumoan kadagiti amin a nasion. Agbalinto a let-ang. Natikagto nga awan ti danumna.

¹³Gapu iti pungtotko, aglangalangto ti Babilonia ket awanto ti agnaed. Mabaybay-anto a narnarba ket makigtot ken masdaawto dagiti amin nga aglabas a makakita iti napasamak kenkuana.

¹⁴“Dakayo a pumapana, agsaganakayo a manggubat iti Babilonia. Lawlawenyo. Ibiatyo amin a panayo iti Babilonia agsipud ta nagbasol ken ni Yahweh.

¹⁵Ipukkawyo ti ikkis ti gubat iti entero a siudad. Simmukon ti Babilonia. Natibbag ken narpuogen dagiti bakudna. Balsek dagiti taga-Babilonia. Balsenyo ngarud ida ket aramidenyo kadakuada ti kas iti inaramidda kadagiti sabsabali.

¹⁶Diyo ipalubos nga agmula wenno agapit dagiti tattao. Mabutengto amin a ganggannaet sadiay iti armada a mangraut kadakuada ket agsublidanto kadagiti bukodda a daga.”

¹⁷Kuna ni Yahweh, “Mayarig dagiti Israelita iti arban ti karnero a kinamatkamat ken winarawara dagiti leon. Rinangrangkay nga immuna ida ti ari ti Asiria. Kalpasanna, nginutngotan ni Ari Nebucadnesar dagiti tultulangda.

¹⁸Gapu iti daytoy, siak, ni Yahweh a Mannakabalin-amin a Dios ti Israel, dusaekto ni Ari Nebucadnesar ken ti pagilianna a kas iti panangdusak idi iti emperador ti Asiria.

¹⁹Isublikto dagiti Israelita iti dagada. Agpennekdanto a mangan kadagiti agtubo idiay Bantay Carmel ken iti sakup ti Basan, kasta met kadagiti katurturodan ti Efraim ken Galaad.

²⁰Inton dumteng dayta a tiempo, awanton ti basol a masarakan iti Israel ken ti kinadakes idiay Juda agsipud ta pakawanekto dagiti inispalko a tattao. Siak, ni Yahweh, ti nagsao iti daytoy.”

²¹Kuna ni Yahweh, “Rautenyo dagiti tattao iti Merataim ken Pekod. Patayen ken dadaelenyo ida. Aramidenyo amin nga ibilinko kadakayo.

²²Mangngeg ti daranudor ti gubat iti daga. Adda dakkel a pannakadadael.

²³Mayarig ti Babilonia iti dakkel a martilio a nangburak iti entero a lubong. Ita, natukkotukkolen dayta a martilio. Nakigtot dagiti amin a nasion iti napasamak iti Babilonia.

²⁴Babilonia, binusornak ket natnagka a dimo napuotan iti palab-og nga insaganak nga agpaay kenka.

²⁵Linuktakon ti pagiduldulinak kadagiti armasko. Iti pungtotko, inruarkon ida agsipud ta adda trabaho nga ileppasko iti Babilonia. Siak ni Yahweh a Dios a Mannakabalin-amin.

²⁶Darupenyo iti amin a suli ket rakrakenyo dagiti nakaidulinan dagiti trigona. Buntonenyo dagiti sinamsamyo! Rebbekenyo ti siudad! Dikayo mangibati iti uray ania.

²⁷Papatayenyo dagiti amin a soldadona! Pukawenyo ida! Nasentensiaan a madadael dagiti tattao ti Babilonia! Dimtengen ti tiempo a pannakadusada.” (

²⁸Nagkamang idiay Sion dagiti nagtalaw idiay Babilonia ket imbagada ti panangibales ti Apo a Diostayo iti dakes nga inaramid ti Babilonia iti Templona.)

²⁹“Ibagayo kadagiti pumapana a rautenda ti Babilonia. Ibaonyo dagiti amin a makaammo nga agpana. Lakubenyo ti siudad! Diyo ipalubos nga adda makalibas. Ibalesyo kenkuana ti amin nga inaramidna kadagiti sabsabali agsipud ta sitatangsit a nangbusor kaniak, siak a Nasantoan ti Israel.

³⁰Ngarud, iti dayta nga aldaw, mapapatayto dagiti agtutubo a lallaki iti Babilonia kadagiti kalsada ti siudad. Mapasagto amin a soldadona.

³¹“Natangsitka, Babilonia, isut' gapuna a siak nga Apo a Dios a Mannakabalin-amin, busorenka. Dimtengen ti panangdusak kenka.

³²Maitibkol ken matumbakanto, sika a napalangguad a pagilian. Awanto ti tumulong kenka. Puorakto dagiti siudadmo ket mauramto dagiti amin nga adda iti lawlawmo.”

³³Kuna ni Yahweh a Mannakabalin-amin, “Maparparigat dagiti tattao ti Israel ken ti Juda. Guguardiaan ida a nalaing dagiti nangparmek kadakuada. Dida kayat a wayawayaan ida.

³⁴Ngem nabilegak a mangisalakan kadakuada. Yahweh a Mannakabalin-amin ti naganko. Isalakanko ida tapno yegko ti talna iti daga idinto a yegko ti riribuk kadagiti tattao ti Babilonia.”

³⁵Kuna ni Yahweh, “Agdisso ti kampilan iti Babilonia! Mapapatay dagiti tattaona, dagiti agtuturay ken mamasiribna.

³⁶Mapapatay dagiti ulbod a profeta— anian a kinamaagda. Mapapatay dagiti soldadona— anian a pannakakigtotda.

³⁷Mapapatay dagiti kabaliona; marakrak dagiti luganna a pakigubat. Mapapatay dagiti natangdanan a soldadona— anian a kinakapuyda. Mapukaw dagiti gamengna—maala ken masamsamda.

³⁸Agtikag ti dagana ket agmaga dagiti karayanna. Napno ti Babilonia iti nakabutbuteng nga imahen a namagbalin a maag kadagiti tattao.

³⁹“Ngarud, agnaedto sadiay dagiti musang, ken dagiti atap nga animal, agraman dagiti narugit a tumatayab. Pulos nga awanton ti agnaed sadiay. Saanton a pagnaedan iti agnanayon nga awan inggana.

⁴⁰Dadaelekto ti Babilonia a kas iti panangdadaelko idi iti Sodoma ken Gomorra ken kadagiti kabangibangda nga il-ili. Awanton ti agnaed sadiay. Ni Yahweh ti agsasao iti daytoy.

⁴¹“Adtoy, umay dagiti tattao nga aggapu iti amianan. Iti pungto ti daga, agsagsagana a makigubat ti maysa a nabileg a nasion.

⁴²Nagtagipana ken nagtagikampilanda, naranggas ken awan asida. Kasla daranudor ti taaw ti dalagudog dagiti kabalio a nagsakayanda. Sisasaganada a manggubat iti Babilonia.

⁴³Nadamag ti ari ti Babilonia ti kaaddada, awanen ti bilegna. Kasta unay ti butengna, mariknana ti ut-ot a kas iti ut-ot ti agpasikal.

⁴⁴“Umayakto a kas iti leon a rummuar iti nasamek a bakir a mapan iti nalangto a pagaraban iti abay ti Karayan Jordan. Kellaatekto a kamaten dagiti taga-Babilonia ket agtataraydanto a mangpanaw iti siudadda. Iturayanto ida ti piliek a pangulo. Siasino ti kas kaniak? Siasino ti kumarit kaniak? Siasino ti agturay a bumusor kaniak?

⁴⁵Ngarud, denggenyo ti panggepko a maibusor iti siudad ti Babilonia ken kadagiti tattaona. Uray dagiti babassit nga annakda maitalawdanto ket makigtotto ti tunggal maysa.

⁴⁶Inton maparmek ti Babilonia, addanto napigsa nga ikkis ken daranudor a mangdayyeg iti entero a daga. Ti dung-awna mangngegto dagiti nasnasion.”