Read Iloko Jeremiah 51 Bible Online

Jeremiah 51 - Iloko bible

Jeremiah 51

¹Kuna ni Yahweh, “Mangyegak iti nadawel nga angin a mangbasnot iti Babilonia ken kadagiti tattaona.

²Mangibaonakto kadagiti ganggannaet a mangdadael iti dayta a daga, kas iti angin a mangitayab iti garami. Inton dumteng dayta nga aldaw a panagdadael, dumarupdanto iti amin a suli ket paglangalangendanto ti daga.

³Diyo ikkan dagiti soldadona iti gundawayda a mangibiat iti pana wenno mangikabil iti kabalda. Dadaelenyo ti entero nga armada. Patayenyo pay dagiti agtutubo a lallaki.

⁴Masugatdanto ket maidasayda agingga a matayda kadagiti kalsada ti siudadda.

⁵Siak, ni Yahweh a Mannakabalin-amin, diak binaybay-an ti Israel ken Juda uray no nagbasolda kaniak a Nasantoan ti Israel.

⁶Talawanyo ti Babilonia! Isalakanyo ti biagyo! Saankayo koma a matay gapu iti basol ti Babilonia. Agibalesakon ket dusaek a kas iti maiparbeng kenkuana.

⁷Kasla balitok a kopa ti Babilonia nga ig-iggamak. Binartekna ti entero a lubong. Ininum dagiti nasion ti arakna ket nagmauyongda.

⁸Kellaat a natnag ti Babilonia ket nadadaelen! Dung-awanyo! Yalaanyo iti agas dagiti sugatna bareng no umimbag pay.

⁹Kinuna dagiti ganggannaet nga agnaed sadiay, ‘Pinadasmi a tulongan ti Babilonia ngem naladawen. Umaykayon! Panawantayon ket agawidtayo kadagiti dagdagatayo. Impakat ti Dios ti amin a pigsana a nangdusa iti Babilonia. Dinadaelna a namimpinsan.’”

¹⁰Kuna ni Yahweh, “Ipukkaw daytoy dagiti tattaok, ‘Impakita ti Apo a saantayo a nagbiddut. Intay ibaga kadagiti tattao ti Sion ti inaramid ti Apo a Diostayo.’”

¹¹Gapu ta panggep ni Yahweh a dadaelen ti Babilonia, tinignayna dagiti ari ti Media. Kastoy ti panangibalesna iti pannakadadael ti Templona. Imbilin dagiti dumarup nga ofisiales, “Asaenyo dagiti panayo! Isaganayo dagiti kalasagyo!

¹²Ibayogyo ti pagilasinan ti pannakadarup dagiti bakud ti Babilonia. Nayonanyo dagiti guardia! Ipuestoyo dagiti agbantay kadagiti lugarda. Pagsaganaenyo dagiti agsaneb.” Tinungpal ni Yahweh ti imbagana nga aramiden kadagiti taga-Babilonia.

¹³Adu dagiti karayan ken nabaknang a gameng ti Babilonia ngem dumtengen ti panungpalanna. Napugsaten ti linas ti biagna.

¹⁴Insapata ni Yahweh a Mannakabalin-amin a mangyeg iti adu a tattao a kas iti pangen dagiti dudon a mangdarup iti Babilonia ket aggiikkisdanto iti balligida.

¹⁵Pinarsua ni Yahweh ti daga babaen iti bilegna; babaen iti siribna, inaramidna ti lubong ken inyukradna dagiti langit.

¹⁶No agbilin ni Yahweh, agdaranudor dagiti dandanum iti tangatang; pagulepenna manipud iti pungto ti daga. Paggilapenna ti kimat iti tudo, ket ibulosna ti angin iti pagiduldulinanna.

¹⁷Maag ken nengneng dagiti amin a tattao; maibabain dagiti agar-aramid iti imahen gapu ta dagiti didiosen nga inaramidda, saanda a pudno a dios ken awan biagda.

¹⁸Awan serserbida ket rumbeng a malaisda; madadaeldanto inton ukomen ida ni Yahweh.

¹⁹Saan a kasta ti Dios ni Jacob; isu ti nangaramid iti amin a banag, pinilina ti Israel nga agbalin a tribuna. Yahweh a Mannakabalin-amin ti naganna.

²⁰Kuna ni Yahweh, “Babilonia, sika ti martiliok, sika ti igamko a pakigubat. Inar-aramatka a pinangparmek kadagiti nasion: sika ti pinagdadaelko kadagiti pagarian.

²¹Pinagtumekka kadagiti kabalio ken kadagiti nagsakay: pinaglasangka kadagiti lugan a pakigubat ken naglugan.

²²Inar-aramatka a nangpatay kadagiti lallaki ken babbai; kadagiti lallakay ken ubbing, kadagiti babbaro ken babbalasang.

²³Sika ti pinangwarak kadagiti agpaspastor ken arbanda, kadagiti mannalon ken kadagiti kabalio a pagaradoda. Sika ti pinangparmekko kadagiti agtuturay ken nangato nga ofisiales.”

²⁴Kuna ni Yahweh, “Makitadakto a mangbales iti Babilonia. Balsekto dagiti tattaona gapu kadagiti dakes nga inaramidda iti Jerusalem.

²⁵Babilonia, mayarigka iti bantay a mangdadael iti sangalubongan, ngem siak, ni Yahweh, ti kabusormo. Kabilen ket rumrumekenkanto iti daga. Padapuenkanto.

²⁶Awanto kadagiti batom ti mabalin nga usaren a pagpatakder. Mayarigkanto iti let-ang nga agnanayon a langalang. Daytoy ti sao ni Yahweh.

²⁷“Ikabilyo ti pagilasinan ti idadarup! Pagunienyo ti trumpeta tapno mangngeg dagiti nasion! Pagsaganaenyo dagiti nasion a manggubat iti Babilonia! Ibagayo a dumarup dagiti pagarian ti Ararat, Minni ken Askenaz. Mangtudingkayo iti mangidaulo iti panangraut. Iruaryo dagiti kabalio a kas iti pangen ti dudon ti kaaduda.

²⁸Pagsaganaenyo dagiti nasion a manggubat iti Babilonia. Pagsaganaenyo dagiti ar-ari ti Media agraman dagiti papangulo ken dagiti ofisialesda ken dagiti amin a daga nga iturayanda.

²⁹Agpigerger ken agkintayeg ti daga ta ipatungpalen ni Yahweh ti planona. Paglangalangennanto ti Babilonia ket awanto ti agnaed sadiay.

³⁰Nagsardengen a makigubat dagiti soldado ti Babilonia ket nagtalinaedda kadagiti sarikedkedda. Napukawdan ti turedda; awan dumadan kadagiti babbai. Narban dagiti ruangan ti siudad. Maur-uramen dagiti balbalay.

³¹Agsasaruno ti agtaray a mangipadamag iti ari ti Babilonia a nakastreken dagiti kabusor iti amin a bakud ti siudad.

³²Sinakupen dagiti kabusor ti pagballasiwan iti karayan ket pinuorandan dagiti sarikedked. Kasta unay ti buteng dagiti soldado ti Babilonia.

³³Iti saan a mabayag, paraspasento ida dagiti kabusor, ket baddebaddekendanto ida a kasla irik iti pagirikan. Daytoy ti sao ni Yahweh a Mannakabalin-amin a Dios ti Israel.”

³⁴Rinangrangkay ti ari ti Babilonia ti Jerusalem ket kinnanna. Kasla dragon a nangalun-on kenkuana; imbukbokna a kasla burnay ti amin a nagyan iti siudad. Innalana ti kinaykayatna ket imbellengna ti natda.

³⁵Bay-an a kuna dagiti tattao ti Sion, “Ikaro koma ti Babilonia ti ranggas nga inaramidna kadatayo!” Bay-an a kuna dagiti tattao ti Jerusalem, “Ikaro koma ti Babilonia ti panagsagaba nga impaayna kadatayo!”

³⁶Iti kasta, kinuna ni Yahweh kadagiti tattao ti Jerusalem, “Siakto ti mangikalintegan kadakayo. Pagbayadekto dagiti kabusoryo gapu iti inaramidda kadakayo. Pamagaakto ti paggapuan ti danum ti Babilonia ket mamagaanto dagiti karayanna.

³⁷Agbalinto dayta a pagilian a nagrebbaan a taeng dagiti atap nga animal. Nakabutbutengto ti buyana. Awanto ti agtaeng sadiay, ket makigtotto dagiti amin a makakita iti napasamak kenkuana.

³⁸Agungorto a kasla leon dagiti taga-Babilonia. Agugadanto a kasla urbon ti leon.

³⁹Naagumda kadi? Isaganaakto ida iti padaya. Bartekekto agingga a kasta unay ti ragsakda. Maturogdanto ket didanto agriing.

⁴⁰Ipankonto ida iti pagpartian. Kasdanto la karnero, kalding ken kalakian a karnero. Siak, ni Yahweh, ti nagsao iti daytoy.”

⁴¹Kuna ni Yahweh maipapan iti Babilonia: “Nasakupen ti siudad a daydayawen ti sangalubongan. Anian a nakabutbuteng ti Babilonia iti imatang dagiti pagilian!

⁴²Dimmakkel ti baybay ket linapunos dagiti nadawel a dalluyon ti Babilonia.

⁴³Nagbalin a nakabutbuteng a buya dagiti il-ilina. Kasdala let-ang nga awan danumna. Awan ti agnaed wenno agdaliasat kadakuada.

⁴⁴Dusaekto ni Bel a didiosen ti Babilonia. Pairuarkonto dagiti sinamsamna. Saanton a mapan agdaydayaw dagiti nasion kenkuana. “Narban dagiti bakud ti Babilonia.

⁴⁵Tattao ti Israel, panawanyo dayta a lugar. Tumaray ti tunggal maysa tapno malisianna ti nakaro a pungtotko.

⁴⁶Dikay maupay wenno mabuteng gapu kadagiti madamdamagyo. Masukansukat ti damag iti tinawen—damag maipapan iti kinaranggas ditoy daga ken ar-ari nga aggiginnubat.

⁴⁷Iti kasta, dumtengto ti tiempo a panangpukawko kadagiti imahen ti Babilonia. Maibabainto ti entero a pagilian. Mapapatayto dagiti tattaona.

⁴⁸Inton umay dagiti taga-amianan a mangdadael iti Babilonia ket matnag ti siudad, agikkisto iti rag-o dagiti amin nga adda iti daga ken langit.

⁴⁹Ti Babilonia ti gapu ti nakatayan dagiti tattao iti entero a lubong. Maparmeken agsipud ta isu ti gapu ti nakatayan ti adu nga Israelita. Siak, ni Yahweh, ti agsasao iti daytoy.”

⁵⁰Kuna ni Yahweh kadagiti tattaona iti Babilonia, “Nalisianyo ti patay! Inkayon! Dikay agtaktak! Nupay adayokayo, siak, ni Yahweh, ti panunotenyo. Laglagipenyo ti Jerusalem.

⁵¹Kunayo, ‘Naibabain ken naumsikami. Awan a pulos gawaymi ta immay dagiti ganggannaet ket simrekda iti nasantoan a lugar iti Templo.’

⁵²Iti kasta, kunak a dumtengen ti tiempo a panangukomko kadagiti didiosen ti Babilonia. Agasugto dagiti nasugsugatan iti entero a daga.

⁵³Uray no makauli ti Babilonia iti tangatang ket agaramid iti nalagda a sarikedkedna sadiay, mangibaonakto latta kadagiti tattao a mangdadael kenkuana. Siak, ni Yahweh, ti nagsao iti daytoy.”

⁵⁴Kuna ni Yahweh, “Denggenyo ti sangsangit idiay Babilonia, dungdung-awanda ti pannakadadael ti pagilian.

⁵⁵Dadaelekon ti Babilonia, pagsardengekon ti arimbangawna. Kasla daranudor ti dalluyon ti idadarup ti armada ket agririawda a rumaut.

⁵⁶Umayda dadaelen ti Babilonia; natiliwen dagiti soldadona, ket natukkolen dagiti panada. Siak ti Dios a mangdusa iti dakes, aramidek iti Babilonia ti maiparbeng kenkuana.

⁵⁷Bartekekto dagiti agtuturay ken dagiti mamasiribna, dagiti papangulo ken dagiti soldadona. Maturogdanto ket didanton makariing. Daytoy ti saok nga ari, siak, ni Yahweh a Mannakabalin-amin.

⁵⁸Marbanto dagiti napuskol a bakud ti Babilonia, ket mapuoranto dagiti nangato a ruanganna. Awanto ti pagmamaayan ti trabaho dagiti tattao; dumapunto ti nagbannogan dagiti nasion. Siak, ni Yahweh a Mannakabalin-amin, ti nagsao iti daytoy.”

⁵⁹Ni Seraias nga anak ni Nerias ken apoko ni Maaseyas ti personal a katulongan ni Ari Zedekias. Iti maikapat a tawen a panagari ni Zedekias iti Juda, napan ni Seraias idiay Babilonia. Sakbay ti ipapanna, binilin ni Jeremias.

⁶⁰Insuratko iti maysa a libro ti pakasaritaan ti amin a pannakadadael a dumtengto iti Babilonia, kasta met dagiti amin a banag maipapan iti dayta a daga.

⁶¹Imbagak ken ni Seraias, “Inton makadanonka idiay Babilonia, pigsaamto nga ibasa kadagiti tattao dagiti amin a naisurat iti libro.

⁶²Kalpasanna, ikararagmo, ‘O Apo, imbagam a dadaelem daytoy a lugar tapno awanton ti sibibiag a parsua nga agnaed, tao man wenno animal, ket aglangalangto iti agnanayon.’

⁶³Seraias, inton maibasamon daytoy a libro, mangigalutkanto iti bato a padagsenna samo ipurruak idiay Karayan Eufrates.

⁶⁴Kunamto, ‘Kastoyto ti mapasamak iti Babilonia—lumnedto ket dinton lumung-aw gapu iti panangdadael ti Apo kenkuana.’” Daytoy ti paggibusan ti sao ni Jeremias.