Read Iloko Jeremiah 52 Bible Online

Jeremiah 52 - Iloko bible

Jeremiah 52

¹Duapulo ket maysa ti tawen ni Zedekias idi maisaad nga ari ti Juda. Sangapulo ket maysa a tawen a nagari idiay Jerusalem. Hamutal ti nagan ti inana nga anak ni Jeremias a nagnaed iti ili ti Libna.

²Dakes ti inar-aramid ni Zedekias iti imatang ni Yahweh a kas ken ni Jehoyakim idi.

³Nakapungtot ni Yahweh kadagiti tattao ti Jerusalem ken Juda, isu a pinagtalawna ida iti imatangna. Binusor ni Zedekias ti ari ti Babilonia.

⁴Daytoy ti gapuna nga iti maika-10 nga aldaw iti maika-10 a bulan iti maikasiam a tawen a panagari ni Zedekias idiay Juda, dimteng ni Nebucadnesar agraman dagiti amin nga armadana ket rinautda ti Jerusalem. Nagkampoda iti ruar ti siudad. Binangenanda ti aglawlawna.

⁵Nalakub ti siudad agingga iti maika-11 a tawen a panagari ni Zedekias.

⁶Iti dayta met la a tawen, iti maikasiam nga aldaw, iti maikapat a bulan, kimmaro ti bisin ket awan ti kanen dagiti tattao.

⁷Nastrek dagiti kabusor ti siudad. Idi makita daytoy ti ari ken dagiti soldadona, naglibasda. Pinanawanda ti siudad iti rabii, uray no linikmut ida dagiti taga-Babilonia. Nagnada iti ruangan iti baet dagiti dua a bakud iti abay ti hardin ti ari ket nagturongda iti Tanap ti Jordan.

⁸Ngem kinamat ida ti armada ti Babilonia ket tiniliwda ni Zedekias iti tanap nga asideg ti Jerico. Intarayan dagiti amin a soldadona.

⁹Naidatag ni Zedekias ken ni Ari Nebucadnesar nga adda idi idiay Ribla iti sakup ti Hamat. Sadiay ti nangsentensiaan ni Nebucadnesar kenkuana.

¹⁰Sadiay met ti nangpapatayan ti ari ti Babilonia kadagiti lallaki nga annak ni Zedekias iti imatangna. Pinapatayna pay dagiti ofisiales ti Juda.

¹¹Kalpasanna, pinasuatna dagiti mata ni Zedekias sana pinaipan a sikakawar idiay Babilonia. Nagtalinaed ni Zedekias iti pagbaludan agingga iti ipapatayna.

¹²Iti maika-10 nga aldaw, iti maikalima a bulan, iti maika-19 a tawen a panagari ni Nebucadnesar iti Babilonia, sinerrek ni Nebuzaradan ti Jerusalem. Isu ti mammagbaga iti ari ken pangulo ti armada.

¹³Pinuoranna ti Templo ken ti palasio ti ari, agraman ti amin a balbalay dagiti natan-ok a tattao idiay Jerusalem.

¹⁴Rinebba dagiti soldadona ti bakud ti Jerusalem.

¹⁵Innala ni Nebuzaradan dagiti tattao a natda iti siudad. Innalana pay dagiti simmuko idi iti ari ti Babilonia ken dagiti dadduma kadagiti trabahador. Pinaibaludna ida idiay Babilonia,

¹⁶ngem imbatina dagiti dadduma a kapanglawan a pinagtrabahona iti kaubasan ken taltalon.

¹⁷Binurak dagiti taga-Babilonia dagiti bronse nga adigi ken dagiti pagbatayan nga adda iti Templo agraman ti dakkel a bronse a palanggana ket inyawidda amin a bronse idiay Babilonia.

¹⁸Innalada met dagiti pala ken dagiti pagkargaan iti dapu a maus-usar iti pannakadalus iti altar. Innalada pay dagiti alikamen a mausar iti pannakaisagana ti pagsilawan, dagiti malukong a pagtaya iti dara ti maidatag a daton a mapuoran, dagiti malukong a pagpuoran iti insenso ken dagiti amin a bronse nga alikamen a mausar iti Templo.

¹⁹Innalada amin dagiti naaramid iti balitok ken pirak; dagiti babassit a malukong, dagiti palanggana a pagbunag iti beggang, dagiti malukong a pagyanan ti dara dagiti daton a mapuoran, dagiti pagkargaan iti dapu, dagiti pagbatayan ti silaw, dagiti palanggana a pagyanan ti insenso ken dagiti malukong a pagikargaan iti daton nga arak.

²⁰Innalada pay dagiti bronse nga alikamen a pinaaramid ni Ari Solomon nga agpaay iti Templo, dagiti dua nga adigi, dagiti batay, ti dakkel a palanggana ken dagiti 12 a sinan-toro a baka a nakaisadaganna. Nadagsenda unay ket saan a matimbang.

²¹Agpada dagiti dua nga adigi: sagduduapulo ket pito a kadapan ti katayag ken sangapulo ket walo a kadapan ti kapuskol. Naglungog dagiti adigi ket tallo a pulgada ti kapuskol ti bronse. Adda bronse a naituon iti tuktok ti tunggal adigi. Pito ket gudua a kadapan ti katayagda. Nakitikitan ti aglawlaw ken naarkosan iti kasla granada. Bronse amin dagitoy.

²³Sangagasut a sinan-bunga ti granada ti adda kadagiti adigi ket 96 kadagitoy ti makita manipud iti daga.

²⁴Innala pay ni Nebuzaradan da Seraias a Kangatoan a Padi, Sofonias a padi a sumaruno iti saad ken dagiti tallo a kangatoan nga ofisiales iti Templo. Impanawna ida a kas balud.

²⁵Innalana met iti siudad ti nangipangulo idi kadagiti soldado, pito kadagiti personal a mammagbaga iti ari nga adda pay la iti siudad, ti sekretario ti kapitan a para-aywan kadagiti listaan dagiti soldado, ken innem a pulo a natatan-ok a lallaki.

²⁶Impan ida ni Nebuzaradan iti ari ti Babilonia nga adda idi idiay Ribla,

²⁷iti sakup ti Hamat. Sadiay, pinasaplit ken pinapapatay ida ti ari. Naitalaw ngarud a kas balud dagiti tattao ti Juda iti dagada.

²⁸Dagitoy ti bilang dagiti tattao nga innala ni Ari Nebucadnesar: iti maikapito a tawen a panagarina, 3,023;

²⁹iti maika-18 a tawen, 832 a naggapu idiay Jerusalem;

³⁰iti maika-23 a tawen, 745 nga innala ni Nebuzaradan. Agdagup iti 4,600 dagiti amin a tattao a naipanaw a kas balud.

³¹Iti tawen a pannakaisaad ni Evilmerodac nga ari idiay Babilonia, kinaasianna ni Ari Jehoyakin ket pinairuarna iti pagbaludan. Naaramid daytoy iti maika-25 nga aldaw iti maika-12 a bulan, iti maika-37 a tawen kalpasan ti pannakaipanaw ni Jehoyakin a kas balud.

³²Naimbag unay ni Evilmerodac ken ni Jehoyakin ket insaadna iti lugar a natantan-ok ngem dagiti dadduma a padana nga ari a naipan idiay Babilonia.

³³Napalubosan ni Jehoyakin a mangsukat iti kawesna a kas balud, ken makilanglang iti ari iti amin a panagbiagna.

³⁴Iti unos ti panagbiagna, naikkan kadagiti inaldaw a kasapulanna.