Read Iloko Jeremiah 7 Bible Online

Jeremiah 7 - Iloko bible

Jeremiah 7

¹Imbaonnak ti Apo a mapan iti ruangan ti Templo a serkan dagiti tattao ti Juda nga agdaydayaw. Imbagana nga agtakderak sadiay ket iwaragawagko ti sao ti Apo a Mannakabalin-amin a Dios ti Israel. Kunana: “Baliwanyo ti panagbiagyo ken dagiti aramidyo tapno dikay pagtalawen iti daytoy a daga.

⁴Diyo patienen ti mangallilaw a sasaoda: ‘Saantayo a maan-ano! Daytoy ti Templo ti Apo, daytoy ti Templo ti Apo, daytoy ti Templo ti Apo!’

⁵“Balbaliwanyo ti panagbiagyo, kasta met ti ugaliyo. Diyo pagdudumaen ti panangibilangyo iti tunggal maysa.

⁶Diyo gundawayan dagiti ganggannaet, ulila ken balo. Dikay agpapatay kadagiti awan basolna ditoy nasantoan a lugar. Dikay agkararag kadagiti didiosen ta daytoy ti mangdadael kadakayo.

⁷Iti kasta, ipaluboskonto nga agnaedkayo iti daytoy a daga nga intedko a kukua dagiti kapuonanyo iti agnanayon.

⁸“Kitaenyo, awan ti magangganabyo kadagitoy mangallilaw a sasao.

⁹Agtakawkayo, pumataykayo, makikamalalakayo, sapataanyo ti ulbod, agidatagkay iti daton ken ni didiosen a Baal ken agdaydayawkayo kadagiti didiosen a diyo am-ammo.

¹⁰Kagurak dagitoy nga aramidyo, ket umaykayo pay la dumatag iti Templok, sayo kuna, ‘Saankami a maan-ano.’

¹¹Ipagarupyo aya a rukib dagiti mannanakaw ti Templok? Nakitak dagiti ar-aramidenyo.

¹²Inkay idiay Silo, ti umuna a lugar a pinilik a pakadaydayawak ket kitaenyo no ania ti inaramidko iti dayta a lugar gapu iti kinadakes dagiti tattaok nga Israelita.

¹³Inaramidyo amin dagiti nasaok a basol. Namin-adun a kinasaokayo, ngem dikay nangipangag. Dikay met simmungbat idi inayabankayo.

¹⁴Ngarud, ti inaramidko idiay Silo, aramidek met iti daytoy a Templok a pagtaltalkanyo. Iti daytoy a daga nga intedko kadakayo ken kadagiti kapuonanyo, aramidekto met ti kas iti inaramidko iti Silo.

¹⁵Pagtalawenkayto iti imatangko kas iti panamagtalawko kadagiti kakabagianyo nga Efraimita. Siak, ni Yahweh, ti agsasao.”

¹⁶Kinuna ti Apo, “Jeremias, dimo ikarkararagan dagitoy a tattao. Dimo idawdawatan ida. Dimo ibabaet ida ta saanka nga ipangag.

¹⁷Dimo aya makita dagiti ar-aramidenda kadagiti siudad ti Juda ken kadagiti kalkalsada ti Jerusalem?

¹⁸Agurnong dagiti ubbing kadagiti pagsungrod. Mangaron dagiti lallaki ken aggamay met dagiti babbai iti masa nga aramidenda a tinapay nga idatagda iti diosa nga awaganda iti Reyna ti Langit. Agidatagda iti daton nga inumen kadagiti dadduma a didiosen tapno pagpungtotendak.

¹⁹Ngem siak aya ti pagpungtotenda? Saan! Ti bagbagida met laeng ti dangran ken ibabainda.

²⁰Iti kasta, siak ni Yahweh a Dios, idissuorkonto ti nakaro a pungtotko iti daytoy a lugar, kadagiti tattao ken animal, uray pay kadagiti kayo ken kadagiti mula. Kaslanto apuy ti pungtotko nga awan ti makaiddep.

²¹“Dakayo a tattaok, naim-imbag laengen a kanenyo dagiti daton a mapuoran koma iti altar a mainayon kadagiti daton a maipalubos a kanenyo.

²²Idi inruarko dagiti kapuonanyo idiay Egipto, awan ti imbagak wenno imbilinko kadakuada maipapan kadagiti daton a mapuoran wenno aniaman a kita ti sakrifisio.

²³Ngem imbilinko kadakuada nga agtulnogda kaniak tapno siak ti Diosda ket isuda dagiti tattaok. Imbagak met kadakuada nga annurotenda ti panagbiag nga imbilinko tapno rumang-ayda.

²⁴Ngem saanda a dimngeg wenno nangipangag. Nagtulnogda ketdi iti nasukir ken dakes a pusoda, ket dida simmayaat no di ket dimmakesda.

²⁵Manipud rimmuar dagiti kapuonanyo idiay Egipto agpapan ita, saan a nagressat ti panangibaonko kadagiti adipenko a profeta.

²⁶Nupay kasta, didak inkaskaso wenno impangag. Pinatangkenyo ti uloyo. Ket ad-adda ti kinasukiryo ngem dagiti kapuonanyo.

²⁷“Jeremias, ibagamto dagiti saok kadakuada, ngem didakanto ipangag. Awagamto ida, ngem didakanto sungbatan.

²⁸Kunamto kadakuada: ‘Daytoy ti nasion a saan a nangipangag ken ni Yahweh a Diosda. Dida kayat ti paisuro. Awanen ti kinapudno. Dida pay ket sarsaritaenen.’”

²⁹Kuna ti Apo, “Agladingitkayo, dakayo a tattao ti Jerusalem; agpukiskayo ket ibellengyo ti buokyo. Agdung-awkayo iti tapaw dagiti turod, ta siak, ni Yahweh, makapungtotak ket linaksidko dagiti tattaok.

³⁰“Dakes ti inaramid dagiti tattao ti Juda. Inkabilda dagiti kagurgurak a didiosenda iti Templok ket tinulawanda.

³¹Idiay Tanap ti Hinnom, nangaramidda iti altar a managan Tofet a pagpuoranda kadagiti maidaton nga annakda. Awan imbilinko a kasta; awan dayta iti panunotko.

³²Iti kasta, dumtengto ti aldaw a saanen a Tofet wenno Tanap ti Hinnom ti naganna no di ket Tanap a Pagpapatayan. Ditoyto ti pagitaneman dagiti tattao kadagiti minatayda ta awanen ti sabali a lugar a pagitabonanda.

³³Agpaayto dagiti bangkay a taraon dagiti tumatayab ken dagiti atap nga animal, ket awanto ti mangbugaw kadakuada.

³⁴Agbalinto ti daga a let-ang. Gibusakto ti ragsak ken rag-o kadagiti siudad ti Juda ken kadagiti kalkalsada ti Jerusalem. Saanton a mangngeg dagiti naragsak nga ariwawa ti parambak dagiti agkasar.