Read Iloko Jeremiah 8 Bible Online

Jeremiah 8 - Iloko bible

Jeremiah 8

¹“Iti dayta a tiempo, mairuarto dagiti tultulang dagiti ari ken dagiti ofisiales ti Juda kadagiti tanemda. Mairuarto met dagiti tultulang dagiti profeta ken dagiti dadduma a nagnaed idiay Jerusalem.

²Maiwaranto dagiti tultulang iti imatang ti init, ti bulan ken dagiti bituen nga inay-ayat ken nagserserbianda. Isuda ti nakiumanan ken nagdaydayawanda. Imbes a maummong ken maikali dagiti tulang, kasladanto takki a maiwarwara.

³Dagiti tattao iti daytoy dakes a kaputotan a nakalasat nga agnaed kadagiti disso a nangibellengak kadakuada, kaykayatdanto ti matay ngem ti agbiag. Daytoy ti saok, siak ni Yahweh a Mannakabalin-amin.”

⁴Imbaga ti Apo nga ibagak daytoy kadagiti tattaona, “No adda matuang, saan kadi aya a bumangon? No adda mayaw-awan iti dalan, saan kadi aya nga agsubli?

⁵Apay ngarud, dakayo a tattaok, a tallikudandak ngem dikay met agsubli kaniak? Diyo mapanawan dagiti didiosenyo, ket diyo kayat ti agsubli kaniak.

⁶Nupay sipapasnekak a dimngeg kadakayo, saankayo a nagsao iti pudno. Awan ti uray maysa kadakayo a nagladingit gapu iti kinadakesna. Awan ti nagsaludsod no ania ti dakes nga inaramidna. Aramiden ti tunggal maysa ti kaykayatna, kas iti kabalio a sipapardas nga agturong iti paggugubatan.

⁷Uray ti kannaway iti tangatang ammona ti tiempo a panagsublina. Ammo ti kalapati, ti pagaw ken ti sallapingaw ti tiempo a mapanda iti sabali a lugar. Ngem, dakayo a tattaok, diyo ammo dagiti linteg iti panangiturayko kadakayo.

⁸Kasano a kunayo a masiribkayo, ken ammoyo dagiti lintegko? Kitaenyo, nabaliwan dagiti linteg; binaliwan ida dagiti ulbod nga eskriba.

⁹Naibabain dagiti mamasirib a tattaoyo; nariribuk ken nasiloanda. Dida inawat ti saok, ania ngarud ita ti sirib ti adda ita kadakuada?

¹⁰Iti kasta, itedkonto dagiti assawada kadagiti sabali a lallaki. Itedkonto met dagiti taltalonda kadagiti barbaro nga agtagikua. Isuda amin, nangato man wenno nanumo, naagumda. Agsaur met dagiti papadi ken profeta.

¹¹Awan aniamanna kadakuada ti sugat dagiti tattaok. Kunada nga awan pagdanagan, idinto nga awan met talna.

¹²Dakayo a tattaok, nagbainkayo kadi agsipud ta inaramidyo dagitoy makarimon a banag? Saan! Awan a pulos ti bainyo. Diyo pay ammo ti rikna ti mabainan. Iti kasta, matnagkayto a kas kadagiti dadduma. Inton dusaenkayo, isunton ti kanibusananyo. Siak, ni Yahweh, ti nangibaga iti daytoy.

¹³“Tinarigagayak nga ummongen dagiti tattaok, kas iti tao a manggapas iti apitna. Ngem arigda iti ubas nga awan bungana, kas iti igos nga awan ibungana; nalaylay uray dagiti bulongda. Ngarud, impalubosko a sakupen dagiti ganggannaet ti dagada.”

¹⁴“Apay nga agtutugawtayo nga awan ti ar-aramidentayo?” saludsoden dagiti tattao ti Dios. “Umaykayon, intayo kadagiti nasarikedkedan a siudad ket mataytayo sadiay. Inkeddeng ti Apo a Diostayo a mataytayo. Inikkannatayo iti nasabidongan a danum nga inumentayo agsipud ta nagbasoltayo kenkuana.

¹⁵Naguraytayo iti talna, ngem napaaytayo. Naguraytayo iti tiempo a pannakaagastayo, ngem panagbuteng ketdi ti dimteng.

¹⁶Addan dagiti kabusortayo iti siudad ti Dan. Mangngegtayo ti banang-es dagiti kabalioda. No aggaraigi dagiti kabalioda, agkintayeg ti entero a daga. Immay dagiti kabusortayo tapno dadaelenda ti dagatayo ken ti amin a linaonna, ti siudadtayo ken dagiti tattaona.”

¹⁷“Agannadkayo!” kuna ti Apo, “ta mangibaonak kadagiti uleg a kumagat kadakayo; nagitada ken saanda a mapaamo.”

¹⁸Maladingitanak ket saanak a maliwliwa, nalpay ti pusok gapu iti leddaangko.

¹⁹Denggenyo! Iti entero a daga mangngegko nga isangsangit dagiti tattaok, “Awanen aya ti Apo idiay Sion? Awanen aya sadiay ti ari ti Sion?” Sumungbat ni Yahweh nga arida, “Apay a pinagpungtotdak babaen iti panagdaydayawyo kadagiti imahen? Apay a nagtamedkayo kadagiti awan serserbina a didiosenyo?”

²⁰Isangit dagiti tattao, “Limmabasen ti kalgaw, nalpasen ti ani, ngem saankam pay a naisalakan.”

²¹Lumdaangak gapu iti ladingit dagiti tattaok. Agdung-awak, naikkat a namimpinsan ti pigsak.

²²Awan kadin ti agas idiay Galaad? Awan kadin ti mangngagas sadiay? Apay a saan a napaimbag dagiti tattaok?