Read Iloko Lamentations 1 Bible Online

Lamentations 1 - Iloko bible

Lamentations 1

¹Naglidayen ti kasasaad ti Jerusalem! Adu idi ti taona ngem ita nabaybay-anen. Raraemen idi ti lubong, ngem ita kasla maysan a balo. Katan-okan idi kadagiti siudad ngem nagbalin a tagabu.

²Agpatpatnag nga agsangsangit, agar-arubos dagiti luana. Kadagiti nangay-ayat kenkuana, awanen natda a mangliwliwa. Liniputan dagiti gagayyemna, nagbalinda amin a kabusorna.

³Awan gawayna a tagabu dagiti tattao ti Juda. Napilitda a naitalaw kadagiti pagtaenganda. Agnaeddan iti sabali a dagdaga. Ket awan ti disso a mabalinda a kuna a kukuada. Linawlaw ida dagiti kabusorda ket awan ti paglisianda.

⁴No dumteng dagiti nasantoan nga aldaw, Awanen ti umay iti Templo nga agdaydayaw. Agsagsagaba dagiti babbai a para-kanta sadiay, Awanen ti maaramid dagiti papadi no di agsennaay. Kadagiti ruangan ti siudad awanen tattao. Ket agsagsagaba ti Sion iti napalalo.

⁵Nagballigi dagiti kabusorna, Adda ti Jerusalem iti pannakabalinda. Pinagsagaba ni Yahweh gapu kadagiti adu a basolna. Uray dagiti annakna natiliwda ket naipanawda.

⁶Napukawen ti kinadayag ti Jerusalem. Ugsa nga agtartaray ti kayarigan dagiti pangulona. Itartarayanda dagiti mangan-anup kadakuada. Awanen kanenda ken dida makainana ket maibusen ti pigsada.

⁷Nadadaelen ti Jerusalem ket itan agmaymaysa. Malagipna ti napukaw a kinapintasna. Idi parmeken dagiti kabusor, awan timmulong kenkuana. Kinatkatawaan dagiti kabusor ti pannakatnagna.

⁸Napukawen ti dayawna, lamolamo ken lalaisenda. Agasug ket sibabain a mangilemmeng iti rupana. Tinulawanna ti bagina gaput' nadagsen a basolna.

⁹Nalaka idi a makita ti kinarugitna. Ngem dina inkankano ti pagbanaganna. Nakaal-alliaw ti pannakaparmekna, awan makaliwliwa kenkuana. Nagballigi dagiti kabusorna, ket agdawat ken ni Yahweh iti panangngaasina.

¹⁰Sinamsam ti kabusor ti amin a gamengna. Nakitana ti iseserrekda iti mismo a Templo, ti lugar nga iparit ni Yahweh a serken dagiti Hentil.

¹¹Agasug dagiti tattaona nga agsapsapul iti kanenda. Isukatda dagiti gamengda iti taraon tapno agbiagda. “Kitaennak, O Apo,” isangit ti siudad. “Kitaennak nga agsagsagaba.”

¹²“Kitaendak!” ipukkawna iti amin a lumabas. “Dinusanak ti Apo iti aldaw ti pungtotna. Awan pakayaspingan ti ladingitko nga impalak-amna.

¹³“Intinnagna ti apuy a gimmil-ayab iti unegko. Impakatna ti silo a nangitublak kaniak. Kalpasanna, binaybay-annak ket kanayon a matutuokak.

¹⁴“Nakita ti Apo dagiti basolko, pinagtitiponna ida. Inyukkorna iti tengngedko ket kimmapuyak gapu iti dagsenda. Inyawatnak kadagiti kabusorko, awan gawayko kadakuada.

¹⁵“Amin a kapigsaan a soldadok kinatawaan ti Apo. Nangibaon iti armada a mangdadael kadagiti agtutubo. Imbaddebaddekna dagiti tattaok, kasda la ubas nga ipayatpayatna iti pagpespesan ti arak.

¹⁶“Isut' gapuna nga agar-arubos dagiti luluak. Awan makaliwliwa ken makaparegta kaniak. Pinarmeknakami ti kabusor; awanen natda a sanikua dagiti tattaok.

¹⁷“Nagpatulongak ngem awan ti tumulong kaniak. Nangayab ti Apo kadagiti kabusor tapno lawlawendak. Narugit a nisnis ti nangibilanganda kaniak.

¹⁸“Nagsukirak ngem nalinteg ti inaramid ti Apo. Denggendak, tattao iti amin a disso, kitaenyo ti panagtutuokko. Naitalaw a kas balud dagiti annakko nga agtutubo.

¹⁹“Inayabak dagiti kaduak ngem didak kayat a tulongan. Natay dagiti papadi ken agtuturay kadagiti kalsada iti panagbirbirokda iti taraon a pagbiagda.

²⁰“Kitaem, O Apo, ti panagsagabak, iti panagtuok ti kararuak! Madudog ti pusok iti ladingit gapu kadagiti basbasolko. Iti kalsada, adda panagdung-aw gapu iti kampilan; iti uneg dagiti balay, adda met panagpapatay.

²¹“Denggem dagiti asugko, awan mangliwliwa kaniak. Maragsakan dagiti kabusorko gapu iti indissuormo a didigra. Yegmo ti aldaw nga inkarim; pagsagabaem dagiti kabusorko a kas iti bukodko a panagsagaba.

²²“Ukomem ida gapu kadagiti amin a kinadakesda. Dusaem ida a kas iti panangdusam kaniak gapu kadagiti basolko. Nasaem toy pusok, agasugak iti panagtutuokko.”