Read Iloko Lamentations 3 Bible Online

Lamentations 3 - Iloko bible

Lamentations 3

¹Napadasak ken ammok ti rikna ti tao a dusaen ti Dios.

²Inturongnak iti kasipngetan.

³Awan asina a nangkabkabil kaniak.

⁴Dinerderna dagiti lasagko, ket tinukko-tukkolna dagiti tulangko.

⁵Impupoknak iti pagbaludan ti nakaro a rigat ken tuok.

⁶Pinilitnak nga agnaed iti agnanayon a sipnget ni patay.

⁷Impupoknak a sikakawar, awan pagruaran ti bakud a binangonna iti likmutko.

⁸Umkisak a dumawat iti tulong, ngem dinak ipangag ti Dios.

⁹Binangenanna iti bato ti dalanko, pinagbalinna dagiti danak a killo-killo.

¹⁰Arigna iti oso a nangpadpadaan kaniak, kasla leon a nangtukma kaniak.

¹¹Kinamatkamatnak iti kalsada agingga a simmiasiak; tiniliwnak a rinangrangkay sanak binaybay-an.

¹²Insaganana ti bai ket siak ti nangituronganna kadagiti panana.

¹³Simmalput iti pusok dagiti imbiatna a pana.

¹⁴Agmalmalem a katkatawaandak dagiti tattao; siak ti sarsaritaenda iti panaggaangawda.

¹⁵Awan intedna kaniak a taraon ken inumen no di pasig a panagsagaba a nasaem.

¹⁶Indumdumodumnak iti daga, intimtim-ognak kadagiti bato agingga a napusi dagiti ngipenko.

¹⁷Nalipatakon ti rikna ti nasalun-at, ti addaan talna ken ragsak.

¹⁸Awanen ti dayagko, napukawen ti namnamak iti Apo.

¹⁹Lagipem ti tuok ken panagalla-allak, ti sabidong ken ti apro nga impalak-ammo.

²⁰Kanayon a lagipek ket mautoyanak.

²¹Nupay kasta, tumaud ti namnamak no malagipko daytoy:

²²Saan nga agpatingga ti ayat ni Yahweh, agnanayon ti panangngaasina.

²³Mapabaroda iti tunggal bigat. Ania ketdin a kinamatalekmo.

²⁴Ti laeng Apo ti adda kaniak; ngarud, isu ti pangitalkak iti namnamak.

²⁵Naimbag ti Apo kadagiti agbirok kenkuana.

²⁶Ngarud, nasayaat unay ti aguray a siaanus— aguraytay iti panangisalakanna.

²⁷Nasayaat a sursuroen ti maysa a tao ti panaganus bayat ti kinaagtutubona.

²⁸No agsagabatayo, masapul nga agmaymaysatayo, ket aganustayo a siuulimek.

²⁹Saantayo koma nga agreklamo ta mabalin nga adda pay la namnama.

³⁰Uray no maparigat ken mapabainantayo awatenyo ti amin a mapagtengtayo.

³¹Manangngaasi unay ti Apo; saan nga agnanayon a laksidennatayo.

³²Nalabit a pagladingitennatayo ngem nabileg, di agbalbaliw ti ayatna kadatayo.

³³Dina pagragsakan ti panangpaldaang wenno panangparigatna kadatayo.

³⁴Ammo ti Apo no napukaw ti namnamatayo iti uneg ti pagbaludan.

³⁵Ammona no saan a maited ti kalintegantayo nga intedna kadatayo.

³⁶Ammona no maballikug ti hustisia iti pangukoman.

³⁷Ti la pagayatan ti Apo ti kanayon a matungpal.

³⁸Agpada a tumaud ti naimbag ken dakes iti panagbilinna.

³⁹Apay nga agreklamotayo no madusatayo gapu kadagiti basoltayo?

⁴⁰Sukimatentayo ti wagas ken dalantayo ket agsublitayo iti Apo.

⁴¹Luktantayo ti pusotayo iti Dios sadi langit ket ikararagtayo:

⁴²“Nagbasol ken nagsukirkami kenka, O Apo, ket dinakami pay pinakawan agpapan ita.

⁴³“Kinamat ken pinapataynakami; awanen ti asim gapu iti pungtotmo.

⁴⁴Napuskol nga ulep ti pungtotmo ket saan a malasat ti kararagmi.

⁴⁵Pinagbalinnakami a pagbasuraan ti lubong.

⁴⁶“Lalaisen ken pabpabainandakami ti amin a kabusormi.

⁴⁷Nagpasaranmi ti didigra ken pannakadadael napeggad ken nakabutbuteng ti panagbiagmi.

⁴⁸Kasla karayan nga agayus ti luluak gapu iti pannakadadael dagiti tattaok.

⁴⁹“Di agsarday ti panagarubos ti luluak

⁵⁰agingga a tumannawag ti Apo ket imatangannatayo.

⁵¹Maladingitanak no makitak ti napasamak kadagiti babbai iti siudad.

⁵²“Mayarigak iti billit a siniloan dagiti kabusor— isuda nga awan panggapuanda a gumura kaniak.

⁵³Inggarangugongdak iti nasipnget nga abut sada sinerraan iti bato.

⁵⁴Rinugian ti danum ti manglapunos kaniak, impagarupko a dimtengen ti kanibusanak.

⁵⁵“Manipud iti abut, immawagak kenka, O Apo;

⁵⁶impangagnak idi nagpakpakaasiak a denggennak.

⁵⁷Sinungbatannak ket imbagam nga awan pagbutngak.

⁵⁸“O Apo, tinulongannak ket inispalnak.

⁵⁹Paborannak iti pangngeddengmo; ammom dagiti dakes nga inaramidda kaniak.

⁶⁰Ammom ti pananggura kaniak dagiti kabusorko ken ti panangisikatda iti biagko.

⁶¹“Nangngegmo, O Apo, nga imbabaindak. Ammom amin a gandatda a mangpatay kaniak.

⁶²Agmalmalem a sarsaritaen ken isiksikatdak.

⁶³Manipud bigat agingga iti rabii a pagang-angawandak.

⁶⁴“Dusaem ida, O Apo, gapu iti inaramidda;

⁶⁵ilunodmo ida ket pukawem ti namnamada!

⁶⁶Kamatem ida ket ikisapmo ida iti rabaw ti daga!”