Read Iloko Lamentations 5 Bible Online

Lamentations 5 - Iloko bible

Lamentations 5

¹Lagipem, O Apo, ti napasamak kadakami; talliawennakami ket kitaem ti pannakaibabainmi.

²Innala dagiti ganggannaet ti sanikuami, ganggannaet ti agnanaeden iti taengmi.

³Pinapatay ti kabusor dagiti ammami, ket nabalon dagiti innami.

⁴Masapul a bayadanmi ti danum nga inumenmi, masapul a gatangenmi ti kayo a pagsungrodmi.

⁵Kaskami la asno wenno kamelio a maparparigat, nabannogkamin ngem maiparit nga aginanakami.

⁶Tapno makaalakami iti makaanay a taraon a pagbiagmi, napankam idiay Egipto ken Asiria a nagdawatanmi.

⁷Nagbasol dagidi kapuonanmi ket ita awandan, ngem dakami ti agsagaba kadagiti basolda.

⁸Dagiti tagabu ti mangituray kadakami, awan ti makaispal kadakami iti imada.

⁹Agdakdakiwas dagiti mammapatay kadagiti away; no agsapulkami iti taraonmi, ipustami ti biagmi.

¹⁰Uraykami la aggurigor iti bisinmi, makasinit a kas iti urno ti kudilmi.

¹¹Mismo nga iti Bantay Sion ti nakaramesan dagiti assawami; iti tunggal away ti Juda, pinilitda dagiti annakmi a babbai.

¹²Tiniliw ken binitayda dagiti pangulomi, saanda a rinaem dagiti panglakayenmi.

¹³Mapilit nga aggiling a kas tagabu dagiti agtutubo, makusbo dagiti ubbing a lallaki iti dagsen ti awitda a kayo.

¹⁴Saanen a dumar-ay dagiti panglakayen iti taripnongda, dagiti agtutubo saanen a mangngeg ti panagtokarda.

¹⁵Napukawen ti ragsak ti panagbiagmi, ladingit ti naisukat iti panagsasalami.

¹⁶Awanen ti nabati iti amin a pagtangtangsitmi, nagbasolkami ket ita, agsagsagabakami.

¹⁷Nadagsen dagiti barukongmi, nakudrep ti panagkitami gapu iti kasasangitmi.

¹⁸Ngamin, napanawanen ti Bantay Sion, awanen matagtagitao. Agdakdakiwas sadiay dagiti atap nga aso.

¹⁹Ngem sika, O Apo, arika iti agnanayon. Agturayka iti agnanayon nga awan inggana.

²⁰Apay a binaybay-annakami iti nabayag? Malagipnakaminto ngata pay laeng?

²¹Isublinakami kenka, O Apo! Isublinakami! Isublim kadi daydi sigud a dayagmi.

²²Wenno linaksidnakami kadin a namimpinsan? Ti pungtotmo saan kadin a mabaawan?