Read Iloko Ezekiel 1 Bible Online

Ezekiel 1 - Iloko bible

Ezekiel 1

¹Iti maikalima nga aldaw, iti maikapat a bulan, iti maika-30 a tawen, siak, ni Ezekiel a padi ken anak ni Busi, nakipagnanaedak kadagiti napagtalaw a kas balud a Judio iti igid ti Karayan Kebar idiay Babilonia. Naglukat ti langit, ket nakitak ti Dios iti maysa a parmata. (

²Napasamak daytoy iti maikalima a tawen ti pannakaitalaw ni Ari Jehoyakin a kas balud.)

³Ket sadiay, iti igid ti Karayan Kebar idiay Babilonia, nangngegko ti timek ni Yahweh a nakisao kaniak ket nariknak ti pannakabalinna.

⁴Timmangadak ket nakitak ti napigsa nga alipugpog a naggapu iti amianan. Adda kimat nga aggapgapu iti napuskol nga ulep, ket naraniag ti langit iti likmutna. Iti pagkimkimatanna, adda sumilsilap a kasla bronse.

⁵Iti tengnga ti alipugpog, nakitak dagiti kasla sibibiag a parsua nga umasping iti tao,

⁶ket adda uppat a rupa ken uppat a payak ti tunggal maysa kadakuada.

⁷Nalinteg dagiti sakada ngem dagiti dapanda kasla kukod ti baka. Rumimatrimat dagiti parsua a kasla napasileng a bronse.

⁸Malaksid dagiti uppat a rupa ken uppat a payakda, adda pay ima ti tao iti baba ti tunggal payak nga adda iti uppat a sikiganda.

⁹Nakaukrad dagiti dua a payak ti tunggal maysa, ket agsisinnagid ti murdong ti payakda. Iti kasta, kuadrado ti formada. No aggunayda, aggunayda a kasla maysa a grupo a saan nga agpusipos dagiti bagida.

¹⁰Adda uppat nga agduduma a rupa ti tunggal animal: rupa ti tao iti sango, rupa ti leon iti kannawan, rupa ti baka iti kannigid ken rupa ti agila iti likud.

¹¹Siuukrad ti dua a payak ti tunggal parsua, ket agsisinnagid ti murdong dagiti payakda. Dua met a payak ti mangabbong kadagiti bagida.

¹²Sumango ti tunggal animal iti uppat a direksion. Iti kasta, mabalinda ti agturong iti kayatda a papanan a saanda nga agpusipos.

¹³Iti baet dagiti parsua, adda kasla gumilgil-ayab nga aluten nga agalis-alis. Gumil-ayab ti apuy ket agipugso iti kasla kimat.

¹⁴Agsublisubli dagiti animal a kasla iti kapardas ti kimat.

¹⁵Bayat ti panangmatmatko kadagiti uppat a parsua, nakitak ti uppat a pilid a sumagid iti daga iti abay ti tunggal maysa kadakuada.

¹⁶Rumimatrimat ti tunggal pilid a kasla napateg a bato. Agpapada dagiti uppat a pilid. Adda pilid iti uneg ti tunggal pilid nga agturong iti sabali a direksion.

¹⁷Iti kasta, mabalin nga agturong dagiti pilid iti uray ania kadagiti uppat a direksion.

¹⁸Pasig a mata ti nangabbong kadagiti rueda ti pilid.

¹⁹No aggunay dagiti parsua, aggunay met a maisurot dagiti pilid. No agpangatoda, agpangato met dagiti pilid.

²⁰Agturong dagiti pilid iti sadinoman a kayatda a pagturongan, ket aramidenda ti aramiden dagiti animal agsipud ta iturayan ida dagiti animal.

²¹Ngarud, no aggunay dagiti parsua, wenno no sumardengda, wenno no agpangatoda, kasta met ti aramiden dagiti pilid.

²²Iti ngatoen ti ulo dagiti parsua, adda kasla atep a naaramid iti rumimatrimat a kristal.

²³Sadiay, iti sirok ti atep nakatakder dagiti parsua. Siuukrad dagiti dua a payak ti tunggal parsua a situturong kadagiti sarsarunoenda, ket dua a payak met ti mangabbong kadagiti bagida.

²⁴Nangngegko ti banesbes dagiti payakda iti panagtayabda. Kasla daranudor ti baybay, kasla arimbangaw ti dakkel nga armada, kasla timek ti Dios a Mannakabalin-amin. Idi sumardengda nga agtayab, nagkupin dagiti payakda,

²⁵ngem adda latta mangngeg a timek nga aggapu iti atep, iti ngatoen dagiti uloda.

²⁶Iti ngatoen ti atep, adda kasla trono a naaramid iti safiro. Adda kasla tao nga agtugtugaw iti trono.

²⁷Kasla tao ti agranraniag a kasla bronse iti tengnga ti apuy. Raniaganna ti aglikmut,

²⁸ket addaan kadagiti amin a kolor nga adda iti bullalayaw. Daytoy ti makapurar a lawag a mangipakita iti kaadda ti Apo.