Read Iloko Ezekiel 13 Bible Online

Ezekiel 13 - Iloko bible

Ezekiel 13

¹Nagsao ti Apo kaniak.

²Kinunana, “Anak ti tao, babalawem dagiti profeta ti Israel, isuda nga agparparbo kadagiti bukodda a padto. Ibagam kadakuada a denggenda ti sao ni Yahweh.”

³Kastoy ti kuna ti Apo a Dios, “Nakakaasi ti pagbanagan dagitoy maag a profeta! Ipakaammoda dagiti ti bukodda a padto ken parboenda ti bukodda a parmata.

⁴Dakayo nga Israelita, awan serserbi dagiti profetayo a kas kadagiti musang nga agnaed kadagiti rebrebba ti maysa a siudad.

⁵Saanda a guardiaan dagiti paset a nakarbaan dagiti bakud wenno tarimaanen dagiti bakud isut' gapuna a saan a masalakniban ti Israel no bumtak ti gubat inton dumteng ti aldaw ti Apo.

⁶Saan nga agpayso dagiti ipakaammoda a parmatada ken ulbod dagiti padtoda. Ibagbagada nga ipakaammoda ti mensahek ngem saanko nga imbaon ida. Namnamaenda ketdin a matungpal ti sasawenda!

⁷Kunak kadakuada, ‘Saan nga agpayso dagiti parmata a nakitayo. Pasig nga ulbod dagiti padtoyo. Ibagayo a siak ti akinsao, ngem saanak a nagsao kadakayo.’”

⁸Iti kasta, kuna ti Apo a Dios kadakuada, “Busorenkayo gapu ta saan a pudno dagiti parmatayo ket kinaulbod dagiti ipakaammoyo.

⁹Dandanin ti panangdusak kadakayo a profeta a saan a pudno dagiti parmatayo ken ulbod dagiti padtoyo. Awankayto sadiay inton agtataripnong dagiti tattaok tapno agikeddengda. Dinto mairaman ti naganyo iti listaan dagiti umili ti Israel. Dikayton agsubli iti dagayo. Iti kasta, maammoanyonto a siak ti Apo a Dios.

¹⁰“Al-allilawenyo dagiti tattaok. Ibagbagayo nga adda urnos ken talna ngem agturay met ti riribuk. No nakapuy ti bakud a bangonen dagiti tattaok, saanyo a patibkeren no di ket palitadaanyo laeng.

¹¹Ibagam kadagiti profeta a marbanto ti bakudda, gapu ta yegkonto ti bumayakabak a tudo, agbagyonto iti yelo ket umayto ti napigsa nga angin.

¹²Inton marpuog ti bakud ket saludsodento dagiti tattao no ania ti naitulong ti palitada nga inkabilda.”

¹³“Ita, daytoy ti kuna ti Apo a Dios, ‘Iti pungtotko, yegkonto ti napigsa nga angin, bumayakabak a tudo, ken yelo tapno madadael ti bakud.

¹⁴Duprakek a mamimpinsan ti bakud a pinalitadaanda, agingga nga agparang dagiti bato a fondasionna. Magaburankayto inton marba, ket mataykayto. Iti kasta, mabigbigto ti tunggal maysa a siak ni Yahweh.’

¹⁵“Ibuloskonto ti pungtotko iti dayta a bakud ken dagiti nagpalitada. Kalpasanna, kunakto kadakayo nga awanen ti bakud, kasta met dagiti nangpalitada—

¹⁶dagiti profeta a nangipanamnama iti Jerusalem nga awan ti pagdanaganda idinto ta adu ti pagpeggadanda.” Daytoy ti kuna ti Apo a Dios.

¹⁷Kinuna ti Apo, “Ita, anak ti tao, sangoem dagiti babbai a kailiam nga agipakpakaammo iti bukodda a padto. Babalawem ti aramidda.

¹⁸Ibagam ti kuna ti Apo a Dios kadakuada: “Nakakaasi ti pagbanaganyo, dakayo a babbai! Idaitanyo dagiti tattao iti lupot a maiputipot iti pungupungoanda nga usarenda a pagsalamangka. Yaramidanyo pay ida iti abungot ti ulo a pagsalamangka tapno maaddaanda iti pannakabalin iti biag dagiti tattao. Kayatyo nga iturayan ti biag ken patay dagiti tattaok nga agpaay iti pagimbaganyo.

¹⁹Ibabaindak iti imatang dagiti tattaok tapno makagun-odkayo iti sangkabassit a sebada ken sumagmamano a tinapay. Kayatyo a papatayen dagiti tattao a saan a rumbeng a matay, ket palubosanyo nga agbiag dagiti saan a rumbeng nga agbiag. Iti kasta, agsaokayo iti ulbod kadagiti tattaok ket patiendakayo.”

²⁰Ita, daytoy ti kuna ti Apo a Dios, “Diak kayat dagiti lupot a maiputipot kadagiti pungupungoan nga aramatenyo a pangtengngel iti biag ken patay. Rabsutek ida kadagiti imayo, ket palubosak a makalibas dagiti tattaok nga iturayanyo.

²¹Pigisek dagiti atiddog nga abungotyo ket ispalek dagiti tattaok iti pannakabalinyo. Iti kasta, mabigbigyonto a siak ni Yahweh.

²²“Babaen kadagiti ulbod a sasawenyo, upayenyo dagiti nalinteg a tattao a diak kayat a pagladingiten. Lapdanyo dagiti managdakdakes a mangtallikud iti kinadakesda tapno maisalakanda.

²³Ngarud, agpatinggan dagiti saan a pudno a parmatayo ken dagiti makaallilaw a padtoyo. Ispalek dagiti tattaok iti pannakabalinyo tapno maammoanyo a siak ni Yahweh.”