Read Iloko Ezekiel 14 Bible Online

Ezekiel 14 - Iloko bible

Ezekiel 14

¹Sinarungkarandak ti sumagmamano a panglakayen ti Israel ket nakiumanda kaniak maipapan iti pagayatan ti Apo.

²Kalpasanna, nagsao kaniak ti Apo.

³Kinunana, “Anak ti tao, inyawat dagitoy a tattao ti pusoda kadagiti imahen ket yaw-awan ida dagitoy a didiosen tapno agbasolda. Saanko ida a sungbatan iti pannakiumanda kaniak.

⁴“Ita, kasaom ida ket ibagam a kastoy ti kunak nga Apo a Dios: ‘Siasinoman nga Israelita a masulisog nga agdaydayaw kadagiti imahen a pakaigapuan ti panagbasolna ket kalpasanna makiuman iti maysa a profeta, siak ti sumungbat kenkuana; daytoy ti sungbat a maikari kadagiti ginasut a didiosen a pagdaydayawanna.

⁵Dagitoy a didiosen ti nakaigapuan ti panangtallikud kaniak dagiti Israelita ngem sapay koma ta magun-odko manen ti kinapudnoda babaen iti sungbatko.’

⁶“Ngarud, ibagam kadagiti Israelita a siak nga Apo a Dios, kastoy ti kunak: Agsublikayo kaniak ket isardengyo ti agdaydayaw kadagiti makarimon a didiosenyo.

⁷“No tallikudannak ti siasinoman nga Israelita wenno ganggannaet nga agnaed iti Israel ket agdaydayaw kadagiti didiosen a pakaigapuan ti panagbasolna sa kalpasanna makiuman iti profeta—siak, ni Yahweh, ti sumungbat kenkuana.

⁸Busorek dayta a tao. Pagbalinek a pakaballaagan dagiti tattao. Ilaksidko iti taripnong dagiti tattaok tapno maammoanyo a siak ni Yahweh.

⁹“No maallilaw ti maysa a profeta ket saan a pudno ti ipakaammona, siak ti nangallilaw kenkuana. Ilaksidko kadagiti tattao ti Israel.

¹⁰Agpadpada ti dusa ti profeta ken ti makiuman kenkuana.

¹¹Aramidek daytoy tapno saandak a tallikudan dagiti Israelita ken saanda a tulawan ti bagida gapu kadagiti basolda. Iti kasta, isudanto ti agbalin a tattaok ket siak met ti Diosda.” Daytoy ti ibaga ti Apo a Dios.

¹²Nagsao ti Apo kaniak.

¹³Kinunana, “Anak ti tao, no agbasol ti maysa a pagilian ket saan a napudno kaniak, dusaek ket dadaelek ti paggapuan ti taraonna. Ipanko ti bisin a mangpapatay a padapada kadagiti tattao ken animal.

¹⁴Uray pay agnaed iti dayta a pagilian dagitoy tallo a lallaki, da Noe, Danel ken Job, isuda laeng ti maispal gapu iti nalinteg a panagbiagda.” Daytoy ti kuna ti Apo a Dios.

¹⁵“Wenno nalabit a mangibulosak kadagiti narungsot nga animal tapno patayenda dagiti umili ket pagbalinenda a napeggad ti pagilian agingga nga awan ti agdaliasat sadiay,

¹⁶uray no agnaed sadiay dagitoy tallo a lallaki, isapatak iti naganko nga Apo a sibibiag a Dios, nga awan ti maisalakanda uray pay dagiti annakda. Ti laeng bagbagida ti maispalda ket agbalinto a maysa a let-ang ti pagilian.

¹⁷“Wenno nalabit a mangyegak iti gubat iti dayta a pagilian a pangipanak kadagiti naranggas nga igam ket patayek amin dagiti tattao agraman dagiti animal,

¹⁸uray no agnaed sadiay dagitoy tallo a lallaki, isapatak iti naganko nga Apo a sibibiag a Dios, nga awan ti maispalda uray pay dagiti annakda no di la ti bukodda a biag.

¹⁹“No mangyegak iti angol iti dayta a pagilian ket iti pungtotko, adu a tattao ken animal ti patayek gapu iti pungtotko

²⁰uray no agnaed sadiay da Noe, Danel ken Job, isapatak iti naganko nga Apo a sibibiag a Dios, nga awanto ti maispalda uray dagiti annakda. Tinto laeng bagbagida ti maispal gapu iti kinaimbagda.”

²¹Daytoy ti sao ti Apo a Dios: “Idissuorko ti uppat a kakaroan a pannusak iti Jerusalem—gubat, bisin, narungsot nga animal ken angol—a mangpapatay kadagiti tattao ken animal.

²²No addanto makalasat ket ispalenna dagiti annakna, kitaenyo ida inton umayda kadakayo. Makitayonto no kasano ti kinadakesda ket mamatikayto a nainkalintegan ti dusa nga ipatayko iti Jerusalem.

²³Wen, maammoanyonto nga adda rasonko iti amin nga inaramidko.” Daytoy ti kuna ti Apo a Dios.