Read Iloko Ezekiel 16 Bible Online

Ezekiel 16 - Iloko bible

Ezekiel 16

²Kinunana, “Anak ti tao, ipabigbigmo iti Jerusalem dagiti makarimon nga aramidna.

³Ibagam a daytoy ti sao ti Apo a Dios maipapan kenkuana: “Nayanakka iti daga ti Canaan. Maysa nga Amorreo ti amam ket Heteo met ti inam.

⁴Idi naipasngayka, awan ti nangputed iti pusegmo wenno nangdigos kenka wenno nangrasras kenka iti asin wenno nangbungon kenka iti lampin.

⁵Awan ti nangngaasi kenka a nangaramid kadagitoy. Idi maipasngayka, awan ti nangipateg kenka ket imbellengdaka iti kataltalonan.

⁶“Nairana a limmabasak ket nakitak nga agkusaykusayka iti bukodmo a dara. Uray no nalapunoska iti dara diak impalubos a matayka.

⁷Pinatanorka a kas iti nasalun-at a mula. Pimmigsa ken dimmakkelka ket nagbalinka a balasang. Napintas ti pannakabukel dagiti susom ket immatiddog dagiti buokmo ngem lamolamoka.

⁸“Idi lumabasak manen, nakitak a dimtengen ti tiempo a makiinnayatka. Inabbongak ti lamolamo a bagim iti kagayko ket inkarik nga ayatenka. Wen, nakitulagak kenka nga asawaenka ket tinagikuaka.” Daytoy ti kuna ti Apo a Dios.

⁹“Dinigoska; binuggoak ti dara iti bagim ket sinapsapoanka iti lana ti olibo.

¹⁰Kinawesanka iti nabordaan a pagan-anay. Inikkanka iti sapatos a naaramid iti kasayaatan a lalat. Inikkanka iti linen a dalungdongmo ken seda a kagaymo.

¹¹Inikkanka kadagiti alahas nga usarem—pulseras ken kuentas.

¹²Inikkanka iti singsing ti agongmo ken aritos ken napintas a korona nga isaadmo iti ulom.

¹³Naaddaanka kadagiti alahas a pirak ken balitok ket kanayon nga agkaweska iti nabordaan a linen ken seda a pagan-anay. Nangnanganka iti tinapay a naaramid iti kasayaatan nga arina. Adda diro ken lana ti olibo a taraonmo. Nagpaiduma ti pintasmo ket nagbalinka a reyna.

¹⁴Nagdinamag ti pintasmo iti tunggal pagilian. Awan ti pagkurangan ti kinapintasmo ta pinagbalinka a nakapimpintas.” Daytoy ti kuna ti Apo a Dios.

¹⁵“Pinagpannakkelmo ti pintasmo. Inusarmo ti kinalatakmo a panggargari ket nagbalinka a kasla balangkantis iti siasinoman nga agtarigagay kenka.

¹⁶Inaramatmo ti sumagmamano a pagan-anaymo a pinangarkosmo kadagiti lugar a pagdaydayawam, ket kas iti balangkantis a babai intedmo ti bagim iti siasinoman a mayat kenka.

¹⁷Innalam dagiti intedko kenka nga alahas a balitok ken pirak. Sinukogmo ida nga imahen dagiti lallaki ket nakikamalalaka kadakuada.

¹⁸Inkawesmo kadagitoy nga imahen dagiti nabordaan a bado nga intedko kenka. Indatagmo kadakuada ti lana ti olibo ken ti insenso nga intedko kenka.

¹⁹Inikkanka iti taraon—ti kasayaatan nga arina, lana ken diro—ngem indatagmo dagitoy a daton kadagiti didiosen.” Daytoy ti kuna ti Apo a Dios.

²⁰“Kalpasanna, innalam dagiti annakta a lallaki ken babbai ket pinuoram ida a kas daton kadagiti imahen. Di pay la immanay aya ti panangtallikudmo kaniak,

²¹ta innalam pay dagiti annakko ket indatonmo ida kadagiti didiosen?

²²Bayat ti nakababain a panagbiagmo a kas balangkantis a babai, nalipatam a namimpinsan ti kinaubingmo idi lamolamoka nga agkusaykusay iti daram.”

²³Kinuna ti Apo a Dios, “Asika pay ta dakes ti pagtungpalam. Kalpasan ti panangaramidmo kadagita a kinadakes,

²⁴iti igid ti tunggal kalsada, nangbangonka iti pagdaydayawan kadagiti imahen ket nakikamkamalalaka.

²⁵Inlubnakmo ti kinapintasmo. Indiayam ti bagim iti tunggal aglabas, ket inaldaw a nagbalangkantiska.

²⁶Nakikaiddaka kadagiti Egipcio a naderrep a kaarrubam, ket pinagpungtotnak iti pannakikamalalam.

²⁷“Inlayatkon ti imak a mangdusa kenka: ikkatek ti bingaymo kadagiti bendisionko. Inyawatka kadagiti Filisteo a manggurgura kenka ken marimon kadagiti narugit nga aramidmo.

²⁸“Gapu ta awan ti pannakapnekmo, intedmo pay ti bagim kadagiti taga-Asiria, ngem nawawka latta iti kinaderrep.

²⁹Namin-adu pay a nakikaidda kadagiti taga-Babilonia, kadagiti tattao nga agtagtagilako, ngem kaskasdi a dika napnek kadakuada.”

³⁰Daytoy ti kuna ti Apo a Dios, “Inaramidmo amin dagitoy a kas awan bainna a balangkantis a babai.

³¹Iti igid ti tunggal kalsada, nangbangonka kadagiti pagdaydayawan kadagiti imahen ken nakikamkamalalaam. Ngem saan a kuarta ti kalkalikagumam a kas kadagiti gagangay a balangkantis a babbai.

³²Mannakikamalala a babai, kaykayatmo pay ti makikaidda kadagiti ganggannaet ngem iti bukodmo nga asawa.

³³Ngem nakarkaroka pay ngem iti balangkantis a babai, ta saanka a patangdanan iti pannakikaiddam. Sika ketdi ti mangted iti pasuksok kadagiti kaayan-ayatmo nga umay manipud iti amin a suli ti lubong tapno makikaiddada kenka.

³⁴Maigiddiatka ngarud kadagiti dadduma a balangkantis a babbai. Awan ti nangpilit kenka nga agbalin a kasta. Saandaka a tinangdanan. Sika ketdi ti nagbayad kadakuada. Wen, naidumdumaka a balangkantis a babai.”

³⁵Ita, Jerusalem, sika a balangkantis a babai, denggem ti sao ti Apo.

³⁶Daytoy ti kuna ti Apo a Dios, “Naglabuska ket kaska la balangkantis a babai a nangidiaya iti bagim kadagiti kaayan-ayatmo ken kadagiti amin a makarimon a didiosen. Pinapataymo dagiti annakmo a kas daton kadagiti didiosen.

³⁷Gapu iti daytoy, ummongekto dagiti amin a kaayan-ayatmo, dagiti impatpategmo ken dagiti ginurguram. Tiponekto amin ida iti lawlawmo, ket labusankanto tapno makitada a lamolamoka.

³⁸Dusaenkanto gapu iti pannakikamalala ken panagpapataymo. Iti pungtot ken ungetko, ikeddengkonto a mapapatayka.

³⁹Yawatkanto iti pannakabalinda. Rakrakendanto dagiti lugar a nakikamalalaam ken nagdaydayawam kadagiti didiosen. Alaendanto dagiti amin a kawesmo ken dagiti alahasmo, ket panawandakanto a lamolamo.

⁴⁰“Mangsugsogdanto kadagiti tattao a mangubor kenka, ket rangrangkayendakanto babaen kadagiti kampilanda.

⁴¹Puorandanto dagiti balaymo agingga a dumapu. Dusaendakanto iti imatang ti adu a babbai. Pagsardengenkanton a makikamalala, ket dikanton mangted iti pasuksok kadagiti kaayan-ayatmo.

⁴²Agbaawton ti pungtotko, ket agulimekakton. Diakton agunget wenno agimon.

⁴³Nalipatam ti panangtaripatok kenka idi ubingka, ket pinagpungtotnak gapu kadagiti amin nga inaramidmo. Isut' gapuna a dinusaka gapu kadagitoy. Apay a nakikamalalaka pay malaksid iti amin a makarimon nga inaramidmo?” Daytoy ti kuna ti Apo a Dios.

⁴⁴Kinuna ti Apo, “Aramatento dagiti tattao daytoy a pagsasao maipapan kenka, Jerusalem: ‘No ania ti ina, kasta met ti anakna a babai.’

⁴⁵Pudno a sika ti babai nga anak ni inam. Karurodna ti asawana ken dagiti annakna. Kaska la kadagiti kakabsatmo a babbai a nanggura kadagiti assawada ken kadagiti annakda. Sika ken dagiti kakabsatmo, Heteo ti inayo, ket Amorreo ti amayo.

⁴⁶“Inauna a kabsatmo ti Samaria iti amianan agraman dagiti barriona. Ti Sodoma iti abagatan agraman dagiti barriona ti inaudi a kabsatmo.

⁴⁷Ngem dika napnek a simmurot iti panagbiagda ken timmuladka kadagiti makarimon nga aramidda. Iti saan a nabayag, dakdakes ti amin nga aramidmo ngem ti amin nga inaramidda.”

⁴⁸Kuna ti Apo a Dios, “Iti naganko a sibibiag a Dios, isapatak a saan nga inaramid ni kabsatmo a Sodoma agraman dagiti barriona ti inaramidmo ken ti inaramid dagiti barriom.

⁴⁹Napalangguadda idi—isu ken dagiti annakna a babbai agsipud ta adu ti taraonda ket nagbiagda a natalna ken naulimek. Nupay kasta, saanda a tinulongan dagiti napanglaw ken dagiti marigrigat.

⁵⁰Napalangguad ken natangken ti uloda, ket inaramidda dagiti kagurak, isu a dinadadaelko ida a kas maiparbeng.

⁵¹“Nagbasol ti Samaria ngem awan pay kagudua laeng koma ti nagbasolam. Ad-adu ti makarimon nga inaramidmo ngem ti inaramidna. Kasla awan basol dagiti kakabsatmo a babbai no maidilig ti aramidda iti aramidmo.

⁵²Ita, masapul a sagabaem ti pannakaibabainmo. Nakarkaro ti basolmo ngem ti basol dagiti kakabsatmo, ket kasla awan basolda no maidiligda iti basolmo. Ita, agbainka ket sagabaem ti pannakaibabainmo, ta pagparangem dagiti kakabsatmo a kasla nadalusda.”

⁵³Kinuna ti Apo iti Jerusalem, “Parang-ayekto manen ti Sodoma ken ti Samaria agraman dagiti barrioda. Uray sika, parang-ayenkanto met.

⁵⁴Ibainmonto ti bagim, ket ti pannakaibabainmo, ipakitananto kadagiti kakabsatmo ti kinarang-ayda.

⁵⁵Rumang-aydanto manen, ket agsublinto met ti sigud a kasasaadmo agraman dagiti barriom.

⁵⁶Dimo aya nagang-angawan ti Sodoma idi narang-ayka pay,

⁵⁷sakbay a naibutaktak ti dakes nga aramidmo? Ita, kaska met kenkuana—pagang-angawandaka dagiti Edomita, Filisteo ken dagiti dadduma a kaarubam a gumurgura kenka.

⁵⁸Masapul nga agsagabaka gapu kadagiti naalas ken nakababain nga inaramidmo.” Daytoy ti kuna ti Apo.

⁵⁹Kuna ti Apo a Dios, “Ipatayko kenka ti pannusa a maitutop iti panangtallikudmo kadagiti karim ken panangsalungasingmo iti tulag.

⁶⁰Nupay kasta, bigbigek ti nagtulaganta idi ubingka pay, ket agtulagta iti mataginayon.

⁶¹Malagipmonto ti inaramidmo, ket pagbabainamto inton mapasublim ti inauna ken inaudi a kakabsatmo. Pagbalinekto ida a kasla annakmo a babbai, nupay saan a paset daytoy ti nagtulaganta.

⁶²Pabaroekto ti nagtulaganta, ket maammoamto a siak ni Yahweh.

⁶³Pakawanekto ti amin a dakes nga aramidmo, ngem malagipmonto ida, ket dikanto makapagtimek gapu iti napalalo a bainmo.” Daytoy ti kuna ti Apo a Dios.