Read Iloko Ezekiel 20 Bible Online

Ezekiel 20 - Iloko bible

Ezekiel 20

¹Iti maika-10 nga aldaw, iti maikalima a bulan, iti maikapito a tawen ti pannakaipanawmi, immay kaniak ti sumagmamano a panglakayen dagiti Israelita tapno ammoenda ti pagayatan ti Apo. Nagtugawda iti sangoanak.

²Nagsao ti Apo kaniak.

³Kinunana, “Anak ti tao, ibagam kadagitoy a panglakayen a kastoy ti kunak, ni Yahweh a Dios: ‘Immaykayo kadi tapno ammoenyo ti pagayatak? Iti naganko, siak a sibibiag a Dios, isapatak a diak ipalubos nga agsaludsodkayo kaniak.’” Daytoy ti kuna ti Apo a Dios.

⁴“Anak ti tao, nakasaganaka kadi a mangukom kadakuada? Ukomem ngarud ida. Ipalagipmo dagiti makarimon nga inaramid dagiti kapuonanda.

⁵Ibagam kadakuada ti kunak. Idi pinilik ti Israel, nagsapataak kadakuada. Imparangarangko ti bagik kadakuada idiay Egipto. Imbagak kadakuada: ‘Siak ni Yahweh a Diosyo.’

⁶Insapatak iti daydi met la nga aldaw nga iruarko ida idiay Egipto ket ipanko ida iti insaganak a daga, daga a nabaknang ken nadam-eg ken daga a kasayaatan.

⁷Imbagak kadakuada nga ibellengda dagiti makarimon a didiosen nga ipangpangrunada ket dida tulawan dagiti bagbagida kadagiti didiosen ti Egipto, ta siak ni Yahweh a Diosda.

⁸Ngem sinukirdak ket didak impangag. Dida imbelleng dagiti makarimon nga imahenda wenno tinallikudan dagiti didiosen ti Egipto. Kayatko idi nga idissuor ti amin a pungtotko kadakuada idiay Egipto.

⁹Ngem diak inaramid daytoy, ta diak kayat a madadael ti naganko; ngamin, imbagak kadagiti Israelita iti imatang dagiti tattao a pakipagnaedanda, nga iruarko ida iti Egipto.

¹⁰“Ngarud, inruarko ida idiay Egipto ket inturongko ida idiay let-ang.

¹¹Intedko kadakuada dagiti bilbilinko ket insurok kadakuada dagiti linlintegko a makaited iti biag iti siasinoman a mangannurot kadakuada.

¹²Pinagbalinko ti pannakangilin dagiti Aldaw a Panaginana a kas pakakitaan iti nagtutulaganmi tapno maammoanda a siak ni Yahweh a mamagsanto kadakuada.

¹³Ngem uray idiay let-ang, nagsukirda kaniak. Sinalungasingda dagiti lintegko ket dida inannurot dagiti bilinko a makaited iti biag iti siasinoman a mangannurot kadakuada. Pulos a saanda a nginilin ti aldaw a panaginana. Sisasaganaak a mangidissuor kadakuada ti amin a pungtotko idiay let-ang tapno matayda.

¹⁴Ngem diak inaramid daytoy ta diak kayat a madadael ti naganko iti imatang dagiti nasion a nakakita iti panangiruarko kadagiti Israelita idiay Egipto.

¹⁵Ngarud, insapatak idiay let-ang a diak ipan ida iti daga nga intedko kadakuada, daga a nabaknang ken nadam-eg; daga a kasayaatan.

¹⁶Insapatak daytoy ta dida inannurot dagiti bilinko, sinalungasingda dagiti lintegko ken dida nginilin ti aldaw a panaginana. Kinaykayatda ti agdaydayaw kadagiti didiosenda.

¹⁷“Ngem kinaasiak ida. Napanunotko a diak patayen ida idiay let-ang.

¹⁸Binallaagak ketdi dagiti annakda a dida annuroten dagiti linteg dagidi kapuonanda, dida tungpalen dagiti bilinda, dida tuladen dagiti ugalida ken dida agdaydayaw kadagiti didiosenda tapno dida matulawan.

¹⁹Siak ti Apo a Diosyo. Tungpalenyo dagiti linteg ken bilinko.

²⁰Ngilinenyo ti Aldaw a Panaginana kas nasantoan nga aldaw, tapno isut' mangipakita iti nagtutulagantayo ken mangipalagip kadakayo a siak ni Yahweh a Diosyo.

²¹“Ngem binusornak dayta a kaputotan. Sinalungasingda dagiti lintegko ket dida tinungpal dagiti bilin a makaited iti biag iti siasinoman a mangannurot kadakuada. Dida nginilin ti Aldaw a Panaginana. Kayatko idi nga idissuor ti amin a pungtotko kadakuada idiay let-ang ket papatayek amin ida.

²²Ngem diak inaramid daytoy ta diak kayat a madadael ti naganko iti imatang dagiti pagilian a nakakita iti panangiruarko kadagiti Israelita idiay Egipto.

²³Isut' gapuna a nagsapataak manen idiay let-ang. Insapatak nga iwarasko ida iti entero a lubong.

²⁴Inaramidko daytoy ta dida inannurot dagiti bilinko, sinalungasingda dagiti lintegko, dida nginilin ti Aldaw a Panaginana, ket nagdaydayawda kadagiti didiosen a nagdaydayawan met dagiti kapuonanda.

²⁵Kalpasanna, inikkak ida kadagiti saan a nasayaat a linteg ken bilin a di makaited iti biag.

²⁶Impalubosko a tulawanda dagiti bagbagida babaen kadagiti sagutda. Binay-ak ida a nagidaton kadagiti inauna nga annakda a lallaki. Inaramidko daytoy a pangdusak kadakuada ken pangipakitak a siak ni Yahweh.

²⁷“Ngarud, anak ti tao, ibagam kadagiti Israelita a daytoy ti kunak kadakuada. Adda pay sabali nga inaramid dagidi kapuonanda a pangpabain kaniak babaen iti panagtallikudda.

²⁸Impanko ida iti daga nga inkarik nga ited kadakuada. No makakitada idi kadagiti nangato a turod wenno narukbos a kaykayo, sadiay ti pagidatonanda ken pagpuoranda kadagiti sakrifisio a pakaigapuan ti panagpungtotko. Sadiay met ti pagipananda kadagiti arak a datonda.

²⁹Sinaludsodko kadakuada no ania dagiti nangato a lugar a pappapananda. Iti kasta, ‘Nangato a Disso a Pagdaydayawan’ ti naganda agpapan ita.

³⁰Ibagam ngarud kadagiti Israelita a daytoy ti kunak: Apay a masapul nga aramidenyo dagiti makarimon nga inaramid dagidi kapuonanyo, iti panagdaydayawyo kadagiti didiosenda?

³¹Agpapan ita, idatagyo dagiti isu met laeng a sagut ket tulawanyo dagiti bagbagiyo kadagiti isu met laeng a didiosen babaen iti panangidatagyo kadagiti annakyo kas daton a mapuoran. Kalpasanna, dakayo nga Israelita, umaykayo pay la kaniak nga agimtuod no ania ti pagayatak. Iti naganko nga Apo a sibibiag a Dios isapatak a diak ipalubos nga agsaludsodkayo kaniak iti uray ania.

³²Naikeddengyon a kayatyo ti agbalin a kas kadagiti dadduma a nasion, kas kadagiti tattao nga agnaed kadagiti sabali a pagilian ket agdaydayawkayo kadagiti kayo ken bato, ngem dinto mapasamak dayta.”

³³Kuna ti Apo, “Iti naganko nga Apo a sibibiag a Dios, ballaagankayo nga iti pungtotko, iturayankayto iti napigsa nga ima ken iti amin a pannakabalinko.

³⁴Ipakitakto kadakayo ti pannakabalin ken pungtotko inton ummongenkayo ket alaenkayo kadagiti pagilian a nakaiwarawaraanyo.

³⁵Ipankayto iti ‘Let-ang dagiti Nasion’ ket ukomenkayto sadiay iti rupanrupa.

³⁶No ania ti inaramidko kadagidi kapuonanyo iti let-ang ti Sinai, kasta met ti aramidek kadakayo,” kuna ti Apo a Dios.

³⁷“Naingetto ti panangiturayko kadakayo tapno tungpalenyo ti tulag.

³⁸Ipanawkonto kadakayo dagiti nasukir ken managbasol. Pagtalawekto ida iti daga a pagnanaedanda ita ngem diakto ipalubos nga agsublida iti daga ti Israel. Iti kasta, maammoanyonto a siak ni Yahweh.”

³⁹Kinuna ti Apo a Dios, “Ita, dakay amin nga Israelita, aramidenyo ti kaykayatyo; ituloyyo latta ti agserbi kadagiti didiosenyo. Ngem ballaagankayo a kalpasan daytoy, masapul nga agtulnogkayo kaniak ket diyo ibabain ti nasantoan a naganko babaen iti panagidatagyo iti sagut kadagiti didiosen.

⁴⁰Iti dayta a daga, iti nasantoan a bantayko, iti nangato a bantay ti Israel, agdaydayawkayto amin kaniak, dakay amin nga Israelita. Maragsakanakto kadakayo, ket namnamaek nga idatagyo kaniak dagiti datonyo, dagiti kasayaatan a sagutyo agraman dagiti nasantoan a sagutyo.

⁴¹Awatek sadiay dagiti datonyo kalpasan a nairuarkayo manipud kadagiti pagilian a nakaiwarawaraanyo ket makitanto dagiti nasion a nasantoanak.

⁴²Inton isublikay iti Israel, iti daga nga inkarik nga ited kadagiti kapuonanyo, maammoanyonton a siak ni Yahweh.

⁴³Malagipyonton ti amin a nakababain nga inar-aramidyo ken ti panangtulawyo kadagiti bagbagiyo. Karurodyonto dagiti bagbagiyo gapu kadagiti amin a kinadakes nga inaramidyo.

⁴⁴Dakayo nga Israelita, maammoanyonto a siak ti Apo ta diak ipatay ti dusa a kas maitutop kadagiti dakes ken naalas nga aramidyo, ngem salaknibak ti dayawko.” Daytoy ti kuna ti Apo a Dios.

⁴⁵Nagsao ti Apo kaniak.

⁴⁶Kinunana, “Anak ti tao, sumangoka iti abagatan. Agsaoka iti maibusor iti abagatan, ket agipadtoka iti maibusor iti kabakiran ti abagatan.

⁴⁷Ibagam iti akin-abagatan a bakir a denggenna ti saok, ‘Kitaem, agpuorak ket uramek amin a nagango ken nalangto a kayom. Awanto ti makaiddep iti apuy. Agkayamkamto manipud abagatan agingga iti amianan, ket mariknanto ti tunggal maysa ti pudotna.

⁴⁸Makitanto ti amin a tao a siak nga Apo ti nanguram, ket awanto ti makaiddep.’”

⁴⁹Ngem kinunak, “O Apo a Dios, dimo ipaaramid dayta kaniak; agriririda ta pasig kano met a burburtia ti panagsarsaritak kadakuada.”