Read Iloko Ezekiel 23 Bible Online

Ezekiel 23 - Iloko bible

Ezekiel 23

²Kinunana, “Anak ti tao, adda idi agkabsat a babbai.

³Idi ubbingda nga agnanaed idiay Egipto, napukawda ti kinabirhenda ket nagbalinda a balangkantis a babbai.

⁴Ni Ohola ti inauna (isu ti Samaria), ket ni Oholiba ti adingna (isu ti Jerusalem). Inkallaysak ida a dua ket impasngayandak kadagiti annak.

⁵Nupay asawak ni Ohola, intultuloyna latta ti kinabalangkantisna. Naderrep kadagiti kaayan-ayatna a taga-Asiria.

⁶Mannakigubatda a naka-uniforme iti nangina a lupot, natatan-ok ken nangangatoda nga ofisiales ti armada. Natataerda amin nga agtutubo a turayen dagiti nagkabalio a soldado.

⁷Inted ni Ohola ti bagina a kas balangkantis kadagiti nangato a tattao iti Asiria, ket tinulawanna ti bagina babaen iti panagdaydayawna kadagiti didiosen dagiti nangibukbokanna iti kinaderrepna.

⁸Dina insardeng ti panagbalangkantisna nga inrugina manipud iti panagnaedna idiay Egipto. Idi panawen ti kinabalasitangna, kinakaiddan dagiti lallaki a nangarusibsib iti kinalasbangna.

⁹Isut' gapuna a binay-ak iti ima dagiti kaayan-ayatna a taga-Asiria a nagderrepanna iti kasta unay.

¹⁰Linabusanda, innalada dagiti annakna sada pinatay iti kampilan. Ket sarsaritaen dagiti babbai iti amin a lugar ti nagbanaganna.

¹¹“Nakita daytoy ni Oholiba, ngem narukrukop ken nakarkaro ti kinabalangkantisna ngem ni manangna nga Ohola.

¹²Naderrep met kadagiti natatan-ok ken ofisiales a taga-Asiria ken dagiti mannakigubat a nagkawes kadagiti narangrang nga uniporme. Natataerda nga agtutubo nga ofisiales ti armada.

¹³Nakitak a balangkantis a namimpinsan ni Oholiba ket dakes a kas ken ni manangna.

¹⁴“Kimmaro a kimmaro ti kinabalangkantis ni Oholiba. Nagargari kadagiti ladawan dagiti nangato nga ofisiales ti Babilonia a naikitikit kadagiti bakud ken napintaan iti makapurar a nalabaga. Naputipotan dagiti siketda ket adda napintas a turban kadagiti uloda.

¹⁵

¹⁶Apaman a nakitana dagiti ladawan, rimmugso ti riknana ket nangibaon kadagiti mangayab kadakuada idiay Babilonia.

¹⁷Immay dagiti taga-Babilonia tapno kaiddaenda. Kinaidda ken tinulawanda agingga a nauma kadakuada.

¹⁸Impakitana ti bagina a lamolamo ket binay-anna a maammoan ti amin ti kinabalangkantisna. Naumaak kenkuana a kas iti pannakaumak ken ni manangna.

¹⁹Nailumlom iti kinabalangkantisna ket inulitna dagiti aramidna a kas balangkantis idi balasitang pay idiay Egipto.

²⁰Nagargari kadagiti lallaki a dadakkel ti mabagbagida a kas iti mabagbagi ti kabalio ken kasla kabalio ti panagparuarda.”

²¹(Oholiba, kayatmo nga aramiden manen ti kinabalangkantismo idi addaka idiay Egipto, idi impalubosmo nga abalbalayen dagiti lallaki dagiti susom ket napukawmo ti kinabirhenmo.)

²²“Ita, Oholiba, siak nga Apo a Dios, kastoy ti kunak kenka. Naumakan kadagitoy a kaayan-ayatmo, ngem pagpungtotekto ida ket yegko ida a manglawlaw kenka.

²³Yegkonto amin a taga-Babilonia ken Caldeo, dagiti lallaki a taga-Pekod, Soa ken Koa agraman dagiti amin a taga-Asiria. Ummongek amin dagita natataer ken agtutubo nga ofisiales, amin a natan-ok ken nangato nga ofisiales ti armada.

²⁴Aggapudanto iti amianan a mangdarup kenka. Ikuyogdanto ti adu a soldado agraman dagiti lugan a pakigubat ken dagiti lugan nga agkarga kadagiti masapulda. Sikakalasag ken nakahelmetdanto a manglakub kenka. Yawatkanto kadakuada, ket ukomendakanto kas mayannurot kadagiti lintegda.

²⁵Gapu ta kapungtotka, palubosakto ida a mangaramid iti kaykayatda kenka gapu iti pungtotda. Isinadanto ti agong ken dagiti lapayagmo ket patayendanto dagiti annakmo. Wen, alaendanto ida, ket puorandanto ida a sibibiag.

²⁶Ray-abendanto dagiti pagan-anaymo, ket alaendanto dagiti alahasmo.

²⁷Pasardengekto ti kinaderrepmo ken dagiti naalas nga inar-aramidmo manipud idi addaka idiay Egipto. Dimonton kitaen dagiti imahen wenno malagipen ti Egipto.”

²⁸Kastoy ti kuna ti Apo a Dios, “Yawatkanto kadagiti tattao a kagurguram ken nauman kenka.

²⁹Gapu ta kaguradaka, alaendanto ti amin a nagbannogam, ket panawandakanto a lamolamo. Malukaisanto ti kinabalangkantismo. Ti kinaderrep ken ti kinabalangkantismo

³⁰ti nangyeg iti kastoy a kasasaadmo. Balangkantiska a kinaidda dagiti nasion, ket tinulawam ti bagim babaen iti panagdaydayawmo kadagiti didiosenda.

³¹Tinuladmo ti aramid ni kabsatmo. Ngarud, yegkonto ti dusa kenka a kas iti dusa a sinagabana.”

³²Kuna ti Apo a Dios, “Uminumkanto iti kopa ni kabsatmo, kopa a dakkel ken nauneg ti lansadna. Napno dayta a kopa ket lalaisen ken umsiendakanto ti amin.

³³Agdiwerdiwerkanto kas iti nabartek; kopa ti panagbuteng ken pannakadadael, ti kopa ni kabsatmo a Samaria.

³⁴Arub-obemto ti amin agraman arinsaedna, ket ibarsakmonto ti kopa. Sugatsugatemto ti barukongmo babaen kadagiti ribakna. Mapasamakto amin dagitoy. Ta daytoy ti sao ti Apo a Dios.”

³⁵Kastoy ti kuna ti Apo a Dios, “Agsipud ta linipatan ken tinallikudannak, sagabaemto ti dusa ti kinaderrepmo ken ti kinabalangkantismo.”

³⁶Kinuna ti Apo kaniak, “Anak ti tao, sisasaganaka kadi a mangukom kada Ohola ken Oholiba? Idarummo ida gapu kadagiti nakaal-alas nga inar-aramidda.

³⁷Nakikamalala ken nagpapatayda. Nakikamalalada kadagiti didiosenda. Pinatayda dagiti annakko nga impasngayda. Pinuoranda dagiti annakko a kas daton kadagiti didiosenda.

³⁸Saan la a dayta. Tinulawanda ti Templok, ket saanda a nginilin ti intuyangko nga Aldaw a Panaginana.

³⁹Iti dayta nga aldaw a panangpapatayda kadagiti annakko a kas daton kadagiti didiosen, immayda iti Templok ket tinulawanda!

⁴⁰“Masansan a mangibaonda kadagiti mapan mangawis kadagiti lallaki nga adda iti adayo ket umay dagiti lallaki. Agdigos dagiti agkabsat a babbai, pintaanda ti matada ket isuotda dagiti alahasda.

⁴¹Agtugawda iti nalamuyot a pagiddaan. Iti lamisaan iti sangoda, ikabilda dagiti insenso ken lana ti olibo nga intedko kadakuada.

⁴²Mangngeg ti ariwawa ti nalang-ay a bunggoy dagiti tattao nga aggapu iti let-ang. Pulserasanda dagiti babbai ken balangatanda ida kadagiti agkakapintas a korona.

⁴³Iti kasta, kinunak iti bagik nga us-usarenda a kas balangkantis ti maysa a babai a bimmaket a nakikamkamalala.

⁴⁴Inulit-ulitda ti napan kadagitoy a babbai a balangkantis. Napnapanda kada Ohola ken Oholiba, dagita dakes a babbai.

⁴⁵Maidarumdanto iti pannakikamalala ken pammapatay ket sentensiaanto ida dagiti nalinteg a lallaki. Ngamin, mannakikamalalada ken mammapatayda.”

⁴⁶Kastoy ti kuna ti Apo a Dios, “Mangyegka iti bunggoy a mangriribuk kadakuada ken mangsamsam kadagiti sanikuada.

⁴⁷Bay-am ti bunggoy a mangubor ken mangrangrangkay kadakuada, mangpapatay kadagiti annakda ken mangpuor kadagiti balbalayda.

⁴⁸Pagsardengekto ti immoralidad iti entero a daga a pakaballaagan dagiti amin a babbai tapno dida makikamalala kas kadagiti agkabsat.

⁴⁹Ket dakayo nga agkabsat, agsagabakayto gapu iti kinaderrepyo ken ikaroyonto ti basolyo gapu iti panagdaydayawyo kadagiti imahen. Iti kasta, maammoanyonto a siak ti Apo a Dios.”