Read Iloko Ezekiel 24 Bible Online

Ezekiel 24 - Iloko bible

Ezekiel 24

¹Iti maika-10 nga aldaw, iti maika-10 a bulan iti maikasiam a tawen, kinuna kaniak ti Apo,

²“Anak ti tao, isuratmo ti petsa ita nga aldaw, gapu ta, ita nga aldaw rugian ti ari ti Babilonia a lakuben iti Jerusalem.

³Ipakaammom daytoy a pangngarig kadagiti nasukir a tattaok. Ibagam a siak nga Apo a Dios ti mangibagbaga iti daytoy: ‘Isaangmo ti kaldero, ket punnoem iti danum.

⁴Ipisokmo dagiti kasayaatan a lasag— dagiti abaga ken luppo; ikabilmo met dagiti natulang a paset.

⁵Alaem daytoy a karne iti kasayaatan a karnero; sungrodam ti kaldero iti adu a kayo. Pagburekem ti danum; ket angrem dagiti tulang ken karne.’”

⁶Daytoy ti kunkuna ti Apo a Dios, “Asika pay, sika a siudad dagiti mammapatay! Arigmo ti kaldero nga aglatlati a saan a maug-ugasan. Saggaysa a maadaw dagiti natuptupek a karne, agingga nga awan ti mabati.

⁷Adda panagpapatay iti siudad, ngem naibuyat ti dara iti dakkel a bato, a saan ket nga iti daga tapno magaburan iti tapok.

⁸Binaybay-ak sadiay ti dara, tapno saan a mailemmeng, ket iti kasta, agpungtotak ket agibalesak.”

⁹Daytoy ti kunkuna ti Apo a Dios, “Asika pay, sika a siudad dagiti mammapatay! Siak a mismo ti mangurnos kadagiti kayo a sungrod.

¹⁰Mangyegkayo pay iti ad-adu a kayo! Rubrobanyo ti apuy! Lutoenyo ti karne! Bay-anyo a maatianan ti digo! Paksetenyo dagiti tulang!

¹¹Kalpasanna, isaadyo ti bronse a kaldero nga awan nagyanna iti rabaw dagiti beggang ket bay-anyo a bumeggang. Maikkatto dagiti latina ket nadalusto manen iti imatang ti linteg.

¹²Ngem saanto a pukawen ti apuy ti amin a lati.

¹³Jerusalem, tinulawannaka dagiti dakes nga aramidmo. Nupay pinadasko ti mangdalus kenka, nagtalinaedka latta a natulawan. Saanto a naan-anay ti pannakadalusmo agingga a mariknam ti bileg ti amin a pungtotko.

¹⁴Siak nga Apo ti nagsao. Dimtengen ti tiempo ti panagtignayko. Diak palubosan ti dakes; diak mangngaasi. Madusakan gapu iti inaramidmo.” Daytoy ti kuna ti Apo a Dios.

¹⁵Kinuna kaniak ti Apo,

¹⁶“Anak ti tao, kellaatek nga alaen ti tao nga ipatpategmo unay. Ngem saanka koma nga agreklamo, wenno agsangit wenno aglua.

¹⁷Dimo ipalubos nga adda makangngeg iti saibbekmo. Saanka a rummuar a kas pakakitaan iti panagladingitmo. Dimo abbongan ti rupam. Dika mangan iti taraon dagiti agladladingit.”

¹⁸Iti agsapa iti sumuno a bigat, nakisaritaak kadagiti tattao ket iti rabii, natay ti asawak. Iti sumuno a bigat, tinungpalko ti naibilin kaniak.

¹⁹Sinaludsod dagiti tattao kaniak, “Apay a kastoy ti ar-aramidem?”

²⁰Imbagak ngarud kadakuada, “Nagsao ti Apo kaniak ket imbagana

²¹nga ipakaammok kadakayo nga Israelita ti mensahena. Tulawanto ti Apo ti templona—ti sarikedked a pagtangtangsityo ken pagay-ayatyo a kitkitaen ken sarungkaran. Matayto iti gubat dagiti ubbing a kameng ti familiayo a nabati iti Jerusalem.

²²Tuladenyonto ti ar-aramidek: Diyonto abbongan ti rupayo. Dikayto mangan iti taraon dagiti agladingit.

²³Agabungot ken agsapatoskayto. Dikayto agdung-aw wenno agsangit. Mapukawkayto gapu iti basolyo, ket tunggal maysa umasug iti sabali.

²⁴Kuna ti Apo a ti mapasamak kaniak ti agpaay a ballaagyo. Aramidenyonto amin nga inaramidko. Inton mapasamak daytoy, maammoanyonto nga isu ti Apo a Dios.”

²⁵Kinuna ni Yahweh, “Ita, anak ti tao, ikkatek ti natibker a Templo a pagtangtangsit ken pagragsakanda, pagay-ayatda a kitkitaen ken sarsarungkaran. Alaekto dagiti annakda.

²⁶Iti dayta nga aldaw addanto makalibas nga umay kenka ket ipadamagnanto ti napasamak.

²⁷Iti dayta met la nga aldaw, makasaokanton ket kasaritam ti naisalakan iti pannakadadael. Kastoy ti panagbalinmo a ballaag kadagiti tattao, ket maammoandanto a siak ni Yahweh.”