Read Iloko Ezekiel 28 Bible Online

Ezekiel 28 - Iloko bible

Ezekiel 28

¹Nagsao ti Apo kaniak,

²Kinunana, “Anak ti tao, ibagam iti agturay iti Tiro a siak nga Apo a Dios, kastoy ti kunak kenkuana: ‘Iti kinapalangguadmo, kunam a maysaka a dios. Kas maysa a dios, kunam nga agtugtugawka iti trono a linawlaw dagiti taaw. Nalabit nga ipagarupmo a maysaka a dios, ngem taoka laeng, saanka a dios.

³Ipagarupmo a nasirsiribka ngem ni Danel, nga awan ti palimed a mailemmeng kenka.

⁴Gapu iti sirib ken laingmo, bimmaknangka ket adu ti naurnongmo a balitok ken pirak.

⁵Adu a sanikua ti naurnongmo gapu iti sikapmo nga agtagtagilako. Anian a tangsitmo gapu iti kinabaknangmo.’

⁶“Ngarud, siak nga Apo a Dios, kastoy ti kunak: ‘Agsipud ta ipagarupmo a masiribka a kas maysa a dios,

⁷ibaonkonto dagiti naranggas a kabusor a mangdarup kenka. Dadaelendanto dagiti amin a sanikuam a nagun-odmo babaen iti laing ken siribmo.

⁸Papatayendakanto, ket itanemdakanto iti lansad ti taaw.

⁹Inton umaydaka papatayen, makunamto pay la kadi a maysaka a dios? Inton sangoem dagiti mangpapatay kenka, mataykanto ta saanka met a pudno a dios.

¹⁰Mataykanto a kasla aso iti ima dagiti ganggannaet nga awan diosna. Siak nga Apo a Dios ti nagbilin.’”

¹¹Nagsao manen ti Apo kaniak.

¹²Kinunana, “Anak ti tao, agladingitka gapu iti kinadaksanggasat nga agur-uray iti ari ti Tiro. Ibagam kenkuana a siak nga Apo a Dios, kastoy ti kunak: ‘Pagulidananka idi nga awan ti pagkuranganna. Nagpaiduma idi ti sirib ken taermo.

¹³Nagnaedka idiay Eden a hardin ti Dios, ket nagalahaska iti amin a kita ti napateg a bato: rubi, diamante, topasio, berilio, karnelia, haspe, safiro, esmeralda ken karbunkulo. Adda idi al-alahasmo a balitok. Naaramidda nga agpaay kenka iti aldaw a pannakaparsuam.

¹⁴Nangikabilak sadiay iti nakabutbuteng nga anghel a mangguardia kenka. Nagnaedka iti nasantoan a bantayko ket nagnaka iti baet dagiti rumimatrimat a napateg a bato.

¹⁵Awan ti pakapilawan ti amin nga aramidmo manipud aldaw a pannakaparsuam agingga a rinugiam ti nagaramid iti dakes.

¹⁶Maringgoranka idi nga aggatang ken aglako ket dayta ti nakaipuonan ti panagranggas ken panagbasolmo. Isut' gapuna a pinapanawka iti nasantoan a bantayko. Pinapanawnaka ti anghel a mangguguardia kenka iti baet dagiti rumimatrimat a napateg a bato.

¹⁷Pinagpalangguadmo ti kinataermo ket pinagbalinnaka a maag ti kinalatakmo. Gapu iti daytoy, impasagka iti daga, ket binaybay-anka a pakaballaagan dagiti dadduma nga ari.

¹⁸Gapu ta dakes ti wagas ti panaggatang ken panaglakom, natulawan dagiti lugar a pagdaydayawam. Isut' gapuna a pinuorak ti siudad agingga a dimmapu. Amin a kumita kenka ita, makitadakan a dimmapu.

¹⁹Napukawkan, wen, awankan iti agnanayon, ket mabuteng dagiti amin a nasion a nakaam-ammo kenka. Maamakda amangan no lak-amenda met ti napasamak kenka.’”

²⁰Kinuna ti Apo kaniak,

²¹“Anak ti tao, babalawem ti siudad ti Sidon.

²²Ibagam kadagiti tattao sadiay a siak nga Apo a Dios, kastoy ti kunak: ‘Sidon, siak ti kabusormo. Idaydayawdakto dagiti tattao gapu iti aramidek kenka. Kalpasan ti panangdusak kadagiti agnaed kenka, maammoandanto a siak ti Apo ken no kasano ti kinasantok.

²³Yegkonto dagiti sakit kenka, ket pagayusekto dagiti dara kadagiti kalsadam. Madarupkanto iti amin a suli, ket mapapatayto dagiti tattaom. Iti kasta, maammoamto a siak ni Yahweh.’”

²⁴Kinuna ti Apo, “Awanton kadagiti kabangibang a nasion a nangum-umsi iti Israel ti agbalin manen a kas puris ken siit a mangsugat kenkuana. Maammoandanton a siak ti Apo a Dios.”

²⁵Kinuna ti Apo a Dios, “Isublikto dagiti Israelita. Alaekto ida kadagiti nasion a nangiwarawaraak kadakuada, ket maammoanto dagiti amin a nasion a nasantoanak. Agnaedto dagiti Israelita iti bukodda a daga nga intedko ken ni Jacob nga adipenko.

²⁶Sadiay, agipatakderdanto kadagiti balbalayda ken agmuladanto iti ubas. Addanto kappia sadiay ket natalgedto ti panagbiagda kalpasan ti panangdusak kadagiti nasion a nangum-umsi kadakuada, ket awanton ti pakaan-anoan ti Israel. Iti kasta, maammoandanto a siak ni Yahweh a Diosda.”