Read Iloko Ezekiel 29 Bible Online

Ezekiel 29 - Iloko bible

Ezekiel 29

¹Iti maika-12 nga aldaw, iti maika-10 a bulan ti maika-10 a tawen, nagsao ti Apo kaniak.

²Kinunana, “Anak ti tao, babalawem ti ari ti Egipto. Ibagam kenkuana ken iti entero a pagilianna no kasanonto ti pannakadusada.

³Ibagam a kastoy ti kuna ti Apo a Dios iti ari ti Egipto: ‘Siak ti kabusormo, sika a dakkel a buaya nga agnanaed iti karayan. Kunam a kukuam ti Nile, ken pinarsuam ti karayan.

⁴Banniitakto ti pangalmo, ket dumketto kenka dagiti lames iti karayanmo. Kalpasanna, isang-atkanto iti Nile, agraman dagiti amin a lames a kimpet kenka.

⁵Ipurruakkayto iti let-ang, sika ken dagiti amin a lames. Agdissokanto iti daga, ket saankanto a maikali. Bay-akto ti bangkaymo a kanen dagiti tumatayab ken dagiti animal.

⁶Iti kasta, maammoanto dagiti amin a tattao ti Egipto a siak ni Yahweh.’” Kuna ti Apo, “Dakayo nga Egipcio, nagtalek dagiti Israelita kadakayo ngem awan dumayo iti narukop a runo.

⁷Idi nagsanggirda kadakayo, natukkolkayo ket natudok dagiti abagada ken nablo dagiti bukotda.

⁸Ngarud, siak nga Apo a Dios, ibagak kadakayo nga ibaonkonto dagiti lallaki a mangdarup kadakayo iti kampilan. Papatayendakayto ken dagiti animalyo.

⁹Agbalinto ti Egipto a langalang nga awan matagtagitao. Iti kasta, maammoanyonto a siak ni Yahweh. “Agsipud ta kinunam a kukuam ti Nile, ket sika ti nangaramid,

¹⁰siak ti kabusormo ken ti kabusor ti Nile. Paglangalangekto ti entero nga Egipto manipud siudad ti Migdol iti amianan agingga iti siudad ti Siene iti abagatan nga aglaylayon iti beddeng ti Etiopia.

¹¹Awanto ti tao wenno animal a bumaddek iti dayta a disso. Iti las-ud ti 40 a tawen, awanto ti agnaed sadiay.

¹²Pagbalinekto ti Egipto a kakaroan ti panaglangalangna iti entero a daga. Iti las-ud ti 40 a tawen, agtalinaedto a rebrebba dagiti siudad ti Egipto, rebrebba a nakarkaro ngem ti uray ania a siudad. Pagkallautangekto dagiti Egipcio. Agkamangdanto kadagiti amin a pagilian, ket makipagnaeddanto kadagiti sabali a tattao.”

¹³Kuna ti Apo a Dios, “Kalpasan ti 40 a tawen, pagsubliekto dagiti Egipcio manipud kadagiti nasion a nangiwarawaraak kadakuada.

¹⁴Pagnaedekto ida iti akin-abagatan nga Egipto, ti sigud a taengda. Sadiay, agbalindanto a nakapsut a pagarian,

¹⁵ti kakapsutan kadagiti amin a pagarian. Pulos a didanton iturayan dagiti dadduma a nasion. Pagbalinekto ida nga awan serserbina, ket awanton ti sabali a nasion a mapilitda a mangtungpal iti pagayatanda.

¹⁶Saanton nga agtalek ti Israel iti tulong dagiti Egipcio. Ti daksanggasat a napasamak iti Egipto ti mangipalagipto iti Israel a nagbiddutda iti panagtalekda kadagiti Egipcio. Iti kasta, maammoanto ti Israel a siak ti Apo a Dios.”

¹⁷Iti umuna nga aldaw iti umuna a bulan iti maika-27 a tawen a pannakaitalawmi, nagsao ti Apo kaniak.

¹⁸Kinunana, “Anak ti tao, dinarup ni Nebucadnesar nga ari ti Babilonia ti Tiro. Pinagbaklayna dagiti soldadona iti nadadagsen a karga nga uray la nagkalboda ken nagasgasan dagiti abagada. Ngem isu ken ti armadana awan nagangganabda iti nagbannoganda.

¹⁹Siak nga Apo a Dios, kastoy ngarud ti ibagak kenka: Itedko ti Egipto ken ni Ari Nebucadnesar, ket ipanawnanto ti amin a kinabaknangna. Samsamennanto ti amin a sanikua ti daga kas tangdan dagiti soldadona.

²⁰Itedko kenkuana ti Egipto a kas gunggona ti panagserbi kaniak dagiti soldadona. Daytoy ti kunak nga Apo a Dios.

²¹“Inton mapasamak dayta, papigsaekto dagiti Israelita. Ket sika, Ezekiel, agsaokanto iti lugar a mangngegdaka ti amin tapno maammoanda a siak ni Yahweh.”