Read Iloko Ezekiel 3 Bible Online

Ezekiel 3 - Iloko bible

Ezekiel 3

¹Kinuna ti Dios, “Anak ti tao, kanem daytoy nalukot a pagbasaan. Kalpasanna, inka kasao dagiti Israelita.”

²Nagngangaak ket insubona kaniak ti pagbasaan.

³Kinunana, “Anak ti tao, kanem daytoy nalukot a pagbasaan nga itedko kenka ket agbussogka.” Kinnanko ti pagbasaan. Nasam-it a kasla diro ti ramanna.

⁴Kalpasanna, kinuna ti Dios, “Anak ti tao, inka kadagiti Israelita ket ibagam kadakuada ti aniaman nga ibagak kenka.

⁵Saanka nga ibaon iti maysa a pagilian a narigat a maawatan ti ganggannaet a pagsasaona, no di ket ibaonka kadagiti Israelita.

⁶No ibaonka kadagiti dadakkel a nasion a ganggannaet ti pagsasaoda a dimo maawatan, ipangagdakanto dagiti tattaona.

⁷Ngem awanto kadagiti Israelita ti mayat a dumngeg kenka. Didak pay ipangag. Natangken ti uloda ken natangsitda amin.

⁸Ita, pagbalinenka met a natangken ti ulona ken natured a kas kadakuada.

⁹Pagbalinenka a natangken a kas iti bato, wen, natangken a kas iti diamante. Dika agbuteng kadagita natangken ti ulona a tattao.”

¹⁰Intuloy ti Dios, “Anak ti tao, denggem a nalaing ti amin nga ibagak kenka ket tandaanam.

¹¹Inka kadagiti kailiam a naitalaw a kas balud ket ibagam ti ibagak kadakuada, dumngegda man wenno saan.”

¹²Kalpasanna, impangatonak ti espiritu ti Dios ket manipud iti likudak, nangngegko ti napigsa a timek a kunana, “Idaydayawyo ti dayag ti Apo nga adda sadi langit.”

¹³Nangngegko ti banesbes dagiti agririnnisiris a payak dagiti parsua, ti karadakad dagiti pilid a kas iti kapigsa ti ginggined.

¹⁴Immay kaniak ti mannakabalin nga espiritu ti Dios ket bayat ti panangitayabna kaniak, nariknak ti pungtot ken sakit ti nakemko.

¹⁵Dimtengak idiay Tel Abib iti igid ti Karayan Kebar a pagnaedan dagiti naitalaw a kas balud. Pito nga aldaw a nagyanak sadiay a mailablabeg gapu iti nakita ken nangngegko.

¹⁶Kalpasan ti pito nga aldaw, nagsao ti Apo kaniak.

¹⁷Kinunana, “Anak ti tao, isaadka nga agbantay iti pagilian nga Israel. Ipakaammom kadagiti Israelita dagiti amin nga iballaagko kenka.

¹⁸No ipakaammok a matay ti maysa a managdakdakes a tao, ngem dimo ballaagan wenno pagsardengen nga agaramid iti dakes tapno agbiag, matayto a managbasol, ket singirekto kenka ti darana.

¹⁹Ngem no ballaagam ti managdakdakes ket dina isardeng ti aramidna wenno paglikudan ti kinadakesna, matayto a managbasol, ngem maispalto ti biagmo.

²⁰“No agaramid iti dakes ti nalinteg a tao ket ikabilko iti napeggad a kasasaad, matay no dimo ballaagan. Matay gapu kadagiti basolna ket diakton lagipen dagiti naimbag nga aramidna. Sungbatamto kaniak ti ipapatayna.

²¹No ballaagam ti naimbag a tao tapno saan nga agbasol ket ipangagnaka, agbiagto, ket maispalto met ti biagmo.”

²²Nariknak ti nabileg a pannakabalin ti Apo, ket nangngegko a kinunana kaniak, “Tumakderka ket inka idiay tanap. Kasaokanto sadiay.”

²³Napanak ngarud idiay tanap, ket nakitak sadiay ti dayag ti Apo a kas iti dayag a nakitak iti igid ti Karayan Kebar. Nagpaklebak,

²⁴ngem simrek ti espiritu ti Dios kaniak ket pinatakdernak. Kinuna ti Apo, “Agawidka, ket dika rumrummuar iti balaymo.

²⁵Mareppetkanto iti tali ket saankanto a makaruar a makipulapol iti publiko.

²⁶Bibinegekto dayta dilam tapno dimonto maballaagan dagitoy nasukir a tattao.

²⁷Ngem inton umayka kasao, isublikto ti pannakabalinmo nga agsao. Kunamto kadakuada a dagitoy ti saok. Addanto dagiti dumngeg, ngem didakanto ikaskaso dagiti dadduma, agsipud ta nasukirda a tattao.”